Ježuševo povračanje vu Galileju. Njegvo razgovarjanje z Samaritankum. Veruvanje Samaritancev. Ježuš ozdravlja sina nekojega kraljevskoga časnika.
- Kad bi anda Ježuš bil spoznal da su čuli farizejuši da Ježuš više vučenikov čini i krsti nego Ivan, Gore 3,22,
- (akoprem Ježuš ni sam krstil, nego njegvi vučeniki)
- tak je ostavil Judeju i odišel je gore vu Galileju.
- Moral je pako čez Samariju prehađati.
- Dojde anda vu nekoj varaš Samarije koj se zove Sikar, poleg kotara kojega je Jakop dal svojemu sinu Jožefu. 1Moj 48,22; 33,19.
- Ovde pako je bil zdenec Jakopa.Kajti se anda Ježuš je bil od puta zatrudil, sel si je dole na zdenec. Bilo je pako okolo šeste vure.
- I dojde nekoja žena iz Samarije zajimat vode. Ježuš reče njoj: „Daj mi piti!“
- (Njegvi pako vučeniki bili su odišli vu varaš da bi kupili hranu.)
- Ona pako samaritanska žena reče njemu: „Kak ti, pokehdob si Židov, potrebuješ piti od mene koja sem samaritanska žena?“ Vendar Židovi nemaju nikakvoga opčinstva z Samaritanci.
- Ježuš odgovori i reče njoj: „Da bi ti dar Božji spoznavala i gdo je on koj veli tebi: ‛Daj mi piti’, tak bi morebiti ti bila prosila njega i on bi ti bil dal živu vodu.“
- Reče njemu žena: „Gospone, ti niti imaš z čem bi zajel i zdenec je glibok – otkud anda imaš ti živu vodu?
- Jesi li ti vekši od našega oca Jakopa koj je nam dal ov zdenec? On sam je iz njega pil, njegva deca i njegva marha.“
- Ježuš odgovori i reče njoj: „Vsaki koj pije od ove vode, njega ipak žeđa. Koj pako bude pil od vode koju mu ja dam, njega ne bude žeđalo naveke,
- nego voda koju mu ja dam postane vu njem zdenec vode koja vu vekivečni žitekzvira.“
- Reče njemu žena: „Gospone, daj mi te vode da več ne žeđam niti več ne hodim sim zajimat.“
- Reče njoj Ježuš: „Hodi, zovi tvojega muža i dojdi sim!“
- Žena odgovori i reče: „Ja nemam muža!“ Reče njoj Ježuš: „Prav si rekla: ‛Ja nemam muža!’
- Ar pet mužov jesi imala i kojega sada imaš, ni tvoj muž – to si prav rekla!“
- Reče njemu žena: „Gospone, ja vidim da si ti prorok.
- Naši oci jesu se na ovem bregu vklanjali, a vi velite da vu Jeruzalemu je ono mesto gde se je morati vklanjati.“
- Reče njoj Ježuš: „Žena, veruj meni da dojde vura kada vi niti na ovem bregu niti vu Jeruzalemu ne budete se vklanjali Ocu.
- Vi ne znate komu se vklanjate, mi znamo komu se vklanjamo ar zveličenje je iz Židovov.
- Ali dojde vura i sada je kada se pravi vklanjavci budu vklanjali Ocu vu duhu i vu istini ar i Otec išče takve vklanjavce.
- Bog je duh i koji se njemu vklanjaju, moraju se njemu vu duhu i istini vklanjati.“ 2Kor 3, 17.
- Reče njemu žena: „Ja znam da dojde Mesijaš (koj se imenuje Krištuš). Kada pako on dojde, tak nam vsa nazvesti.“
- Reče njoj Ježuš: „Ja jesem koj z tobum govorim!“
- I na to dojdu njegvi vučeniki i čudili su se da je z ženum govoril. Nigdo vendar ni rekel: „Kaj pitaš“, ali „Kaj govoriš z njum?“
- Žena anda ostavi svoj vrč i odide vu varaš i reče ljudem:
- „Hote i poglejte človeka koj je meni povedal vsa koja goder jesem včinila. Je li ov ni Krištuš?“
- Izidu anda iz varaša i dojdu k njemu.
- Medtemtoga su njega prosili vučeniki govoreči: „Mešter, jeđ!“
- On pako reče njim: „Ja imam hranu za jesti koju vi ne poznate!“
- Onda rečeju vučeniki med sobum: „Je li mu je gdo donesel za jesti?“
- Ježuš reče njim: „Moja hrana je da činim volju onoga koj je mene poslal da opravim njegvo delo.
- Ne li, vi velite, da žetva stoprv za četiremi meseci dojde? Nut, ja velim vam: podignite vaše oči i poglejte kotare ar su vre beli za žetvu. Mat 9,37; Luk 10,2.
- I koj ženje, prime plaču i spravlja sad na žitek vekivečni tak da se sejač i žnjač skupa veseliju.
- Ar vu tom je ova reč istinska: ‛Drugi je koj seje, a drugi koj ženje.’
- Ja sem vas poslal žet kaj vi neste obdelali, drugi su obdelali, a vi jeste vu njihovo delo nuter zašli.“
- Iz ovoga pako varaša jesu vnogi zmed Samaritancev vu njega veruvali zaradi govorenja žene koja je svedočila: „On mi je povedal vsa koja goder jesem včinila.“
- Kad bi anda Samaritanci k njemu bili došli, oprosili su njega da bi on ondeostal. I on je dva dni ostal.
- I vnogo više ih je veruvalo vu njega zaradi njegvoga govorenja.
- A ženi jesu rekli: „Mi vre vezda ne verujemo zaradi tvojega govorenja ar mi sami jesmo čuli i znamo da ov je istinito Zveličitel sveta.“
- Za dnevi pako dnevi je on odonud izišel i povdal se je vu Galileju
- ar sam Ježuš je svedočil da prorok vu domovini svojoj nema nikakvoga poštenja. Mat 6,4; Luk 4,24.
- Kad bi anda bil došel vu Galileju, jesu njega Galilejanci prijeli kajti su videli vsa koja je on ob svetečnem dnevu včinil vu Jeruzalemu ar oni jesu takaj bili došli na svetečni dan.
- On je anda ipak došel vu Kanu Galileje gde je vodu na vino obrnul. I ovde je bil nekoj kraljevski kojega sin je beteguval vu Kafarnaumu.
- Ov, kad bi bil čul da je Ježuš iz Judeje došel vu Galileju, povdal se je k njemu i oprosil njega da bi dole išel i zvračil njegvoga sina ar je počimal vumirati.
- Na to reče njemu Ježuš: „Ako znamenja i čuda ne vidite, tak ne verujete.“
- Reče njemu kraljevski: „Gospone, hodi dole prvlje nego vumre moj sin.“
- Reče njemu Ježuš: „Pojdi, sin tvoj žive!“ I ov človek je veruval reči koju je njemu rekel Ježuš i odišel je.
- Kad bi pako on vre dole bil išel, došli su njemu naprot njegvi slugi ter su mu nazvestili i povedali da njegov sin žive.
- Onda je od njih zveđal vuru ob kojoj si je on bolje počutil. A oni rečeju njemu: „Včera ob sedmi vuri je njega ostavila zimljica.“
- Onda je spoznal otec da je bila ona vura vu kojoj je njemu rekel Ježuš: „Sin tvoj žive“ i veruval je on i vsa njegva hiža.
- Ovo drugo znamenje je činil Ježuš jošče kad je iz Judeje došel vu Galileju.
