Ježuš zvrači tridesetiosemletnoga betežnika i pokažuje Židovom svoju oblast da to on v sobotu sme včiniti kak takaj svoje božansko poslanje.
- Zatem je bil svetečni dan Židovov i išel je gore vu Jeruzalem.
- Vu Jeruzalemu pako je ovčja kupelj koja se po židovski zove Betžajda i ima pet lop.
- Vu oveh je ležala velika vnožina betežneh, slepeh, šantaveh, vsehnujučeh koji su čakali na gibanje vode.
- Ar angel Gosponov je stalno vreme dole dohađal vu jezero i voda je došla vu gibanje. I koj je po gibanju vode prvič dole izišel vu jezero, on je ozdravel, kakov bi goder beteg bil imal.
- Onde pako je bil nekoj človek koj je bil trideset i osem let betežen.
- Ovoga kad bi Ježuš bil videl ležati i spoznal da je vre dugo, reče njemu: „Hočeš li zdrav postati?“
- Betežni odgovori njemu: „Gospone, nemam človeka koj bi me dole spuščal vu jezero kad se voda burka ar doklam ja idem, vre drugi pred menum dole izide.“
- Reče njemu Ježuš: „Stani se, vzemi svoju postelju i hodi!“
- I sproti je zdrav postal ov človek i vzel svoju postelju i hodil. On isti pako dan je bila sobota.
- Onda rečeju Židovi onomu koj je bil ozdravljen: „Sobota je, ne smeš svoje postelje nositi!“
- On odgovori njim: „Koj me je zdravoga včinil, on mi je rekel: ‛Vzemi svoju postelju i hodi!’“
- Onda pitaju njega: „Gdo je ov človek koj ti je rekel: ‛Vzemi svoju postelju i hodi!’?“
- On pako koj je bil zdrav včinjen, ni znal gdo bi on bil ar se je Ježuš vugnul pred vnožinum ljudstva koje se je na onem mestu nahađalo.
- Zatem ga najde Ježuš vu Cirkvi i reče njemu: „Nut, ti si sada zdrav postal, naj več grešiti da ti se kaj goršega ne dogodi.“
- Na to odide ov človek i nazvesti Židovom da je Ježuš koj je njega zdravoga včinil.
- Zato su Židovi preganjali Ježuša kajti je ova v sobotu včinil.
- Ježuš pako odgovori njim: „Moj Otec tja do sada posluje i ja poslujem.“
- Zato anda jesu Židovi jošče više iskali njega skončati kajti je on ne samo prestupljuval sobotu, nego takaj Boga imenuval svojega Oca ter se Bogu jednakoga načinjal.Ježuš anda odgovori i reče njim:
- „Stanovito, stanovito velim vam: Sin nikaj ne more iz samoga sebe včiniti, nego kaj vidi da čini Otec ar vsa koja čini on, ova jednakem načinom čini takaj Sin.
- Ar Otec ljubi Sina i njemu pokažuje vsa koja on sam čini i bude njemu jošče vekša od oveh pokazal da se vi budete začudili.
- Ar kak goder Otec obuđuje mrtve i oživljuje, tak i Sin oživljuje koje hoče.
- I Otec nikoga ne osudi, nego je ves sud predal Sinu
- da vsi poštuju Sina kak oni poštuju Oca.Koj ne poštuje Sina, ne poštuje niti Oca koj je njega poslal.
- Stanovito, stanovito velim vam: koj moju reč posluša ter veruje onomu koj je mene poslal, on ima vekivečni žitek i ne dohađa na sud, nego iz smrti prehađa na žitek.
- Stanovito, stanovito velim vam da dojde vura, i sada je, kada mrtvi budu čuli glas Sina Božjega i koji njega budu čuli, budu živeli.
- Ar kak Otec ima žitek sam vu sebi, tak je dal i Sinu da ima žitek sam vu sebi
- i on mu je dal oblast sud držati kajti je on Sin Človečji.
- Najte se čuditi zvrhu toga ar dojde vura vu kojoj vsi koji su vu grobih budu čuli glas Sina Božjega.
- I oni koji su dobro činili, pojdu na gorestajanje žitka, koji su pako zlo činili, na gorestajanje suda.
- Ja od samoga sebe nikaj ne morem činiti. Kak ja čujem, tak sudim i moj sud je pravičen ar ja ne iščem moju volju, nego volju onoga koj je mene poslal.
- Ako ja od samoga sebe svedočanstvo dajem, tak moje svedočanstvo ni istinsko.
- Drugi je koj od mene svedoči i ja znam da je istinito ono svedočanstvo koje on od mene daje.
- Vi ste poslali k Ivanu i on je istini svedočanstvo daval,
- ja pako od človeka ne prijemljem svedočanstvo, nego ja ova govorim da se zveličite.
- On je bil goruči i svetuči i posvet i vi ste se hoteli za vur raduvati vu njegvoj svetlosti.
- Ali ja vam imam vekše svedočanstvo neg je ono Ivana. Ar dela koja je meni Otec dal da ja nje dovršim, ova ista dela koja ja činim davaju svedočanstvo od mene da je mene Otec poslal.
- I Otec koj je mene poslal, on je od mene svedočil, ali vi niti ste gda njegov glas čuli niti njegvu spodobu videli.
- I vi njegvu reč nemate opstojno vu sebi kajti vi ne verujete onomu kojega je on poslal.
- Vi pretresavate Pisma kajti štimate da vu njih najdete žitek vekivečni, a ova jesu koja od mene svedočiju,
- ali vi nečete k meni dojti da bi žitek imali.
- Ja od ljudih ne prijemljem diku,
- ali vas poznam ja da vi vu sebi nemate ljubavi.
- Ja jesem došel vu imenu mojega Oca, a vi mene ne prijemljete; ako koj drugi vu svojem lastovitem imenu dojde, ovoga vi budete prijeli.
- Kak morete vi veruvati pokehdob diku jeden od drugoga prijemljete, a diku koja je jedino od Boga ne iščete?
- Ne štimajte da sem ja vaš optužitel pri Ocu, vaš optužitel je Mojžeš vu kojega se vi ufate.
- Ar da bi vi veruvali Mojžešu, tak bi morebiti takaj meni veruvali ar on je od mene pisal. 1Moj 3,15; 22,18; 5Moj 18,15.
- Ako pako vi njegvem Pismam ne verujete, kak budete mojem rečjam veruvali?“
