Sveti Ježuša Krištuša Evangelijum popisan po svetem Janušu

Povnoženje pet hlebov i dveh rib. Ježuš hodi po morju. Neprestojna jestvina. Njegvo Telo i njegva Krv je jestvina i pitvina. Vnogi se nad tem spačuju i ostaviju njega. Njegvi apoštoli ostaju pri njem, ali Ježuš prenazvešča da jeden zmed njih je hudoben.

Zatem odide Ježuš prek Galilejanskoga morja koje je vuz varaš Tiberijaš.Mat 14,13; Mark 6,32.
I njega je nasleduvala velika vnožina ljudstva ar su videli znamenja koja je činil nad betežnemi.
Izide anda Ježuš na goru i onde si sede z svojemi vučeniki.
Bil je pako nablizom Vuzem, svetečni dan Židovov.
Kad bi anda Ježuš bil podignul oči i videl da k njemu velika vnožina ljudih prihađa, reče Filipu: „Otkud kupimo kruha da bi ovi jeli?“
Ovo pako je on rekel da bi ga skušal ar on je znal kaj bude včinil.
Filip odgovori njemu: „Za dvesto desetakov ni njim dosta kruha da vsaki neg jedno malo dobi.“
Onda reče njemu jeden zmed njegveh vučenikov, Jandraš, brat Šimuna Petra:
„Ovde je jeden dečak koj ima pet jačmenoveh hlebov i dve ribe, ali kaj su ova med tulike?“
Reče pako Ježuš: „Včinete da se posede ljudstvo!“ Na onem pako mestu je bilo vnogo trave. Poselo je anda muškeh glav vu broju okolo pet jezer.
Vzeme anda Ježuš hlebe i poklamkam bi on bil zahvalil, podelji nje med one koji su se poseli. Spodobno i od rib, kuliko su hoteli.
Kad su se pako zasitili, reče on svojem vučenikom: „Poberite falatce koji su preostali da pod nikaj ne prejdu.“
Onda su pobrali i napunili dvanajst košar falatcev koji su od pet jačmenov hlebov preostali onem koji su jeli.
Ovi anda ljudi, kad bi bili videli čudo koje je Ježuš včinil, rečeju: „Ov je stanovito on Prorok koj ima na svet dojti!“
Kad bi pako Ježuš bil spoznal da budu došli i njega pograbili da ga načiniju kraljem, pobegel je ipak na goru on sam.Mat 14,23; Mark 6,46.
Kad bi pako bil nastal večer, izidu njegvi vučeniki k morju.
I stupiju vu ladju i dojdu prek morja vu Kafarnaum. Bila je pako vre nastala tmica i Ježuš ni bil došel k njim.
Morje pako je se zdigalo pokehdob da je velik veter puhal.
Kad bi se anda na dvadeset i pet ali trideset tečajevbili odveslili, opaziju Ježuša zvrhu morja hoditi i čisto blizu k ladji dohađati – i oni su se bojali.
On pako reče njim: „Ja jesem, ne bojte se!“
Oni su ga anda hoteli prijeti vu ladju i sproti je postala ladja pri zemlji vu koju su išli.
Drugi dan je videla vnožina, koja je prek morja stala, da nikakve druge ladje zvun ove jedne ni bilo ovde i da Ježuš ni bil stupil z svojemi vučeniki vu ladju, nego su njegvi vučeniki sami bili odišli.
Druge pako ladje jesu nadošle iz Tiberijaša kraj mesta gde su jeli kruh poklamkam je Gospon zahvalil.
Kad bi anda vnožina bila videla da Ježuša ne bi bilo ovde niti njegveh vučenikov, stupili su vu ladju i došli vu Kafarnaum pokehdob su iskali Ježuša.
I poklamkam bi ga bili našli prek morja, rečeju njemu: „Mešter, kad si sim došel?“
Ježuš odgovori njim i reče: „Stanovito, stanovito velim vam: vi mene ne iščete zato kajti ste videli znamenja, nego kajti ste jeli od kruhov ter se zasitili.
Ne trudete se za jestvinum koja gine, nego koja ostaje na žitek vekivečni, koju vam Sin Človečji bude dal ar ovu je zaznemenuval Bog Otec.“ Mat 3,17;17,5. Gore 1, 32.
Onda mu oni rečeju: „Kaj imamo činiti da dela Božja delamo?“
Ježuš odgovori i reče njim: „Ovo je Božje delo da verujete vu onoga kojega je on poslal.“1Jan 3,23.
A oni rečeju njemu: „Kakvo anda ti činiš znamenje da je vidimo i tebi verujemo? Kaj delaš?
Naši oci jesu vu puščini jeli manu kak je pisano: ‛Kruh iz Neba je njim dal jesti.’“2Moj 16,14; 4Moj 11,7; Šolt 77,24; Knj Mudr 16,20.
Onda njim reče Ježuš: „Stanovito, stanovito velim vam: Mojžeš ni vam dal kruh iz Neba, nego moj Otec daje vam pravi kruh iz Neba.
Ar ovo je kruh Božji koj je iz Neba dole stupil i svetu daje žitek.“
Onda oni rečeju njemu: „Gospone, daj nam vsigdar ovoga kruha!“
Ježuš pako reče njim: „Ja jesem kruh žitka: koj k meni dojde, ne bude gladen i koj vu me veruje, ne bude nigdar žeđen.
Ali ja jesem vam rekel da vi jeste mene videli i neste veruvali.
Vse kaj meni daje Otec, dojde k meni, a koj k meni dojde, ja onoga ne ishitim van
ar ja jesem iz Neba dole stupil, ne da ja včinim moju volju, nego volju onoga koj je mene poslal.
Ovo je pako volja Oca koj je mene poslal da ja od onoga kaj je on meni dal, nikaj ne zgubim, nego da ja to na poslednji dan obudim.
Ovo je pako volja mojega Oca koj je mene poslal da vsaki koj vidi Sina i vu njega veruje, ima vekivečni žitek i ja njega na poslednji dan obudim.“
Židovi su zato nad tem morguvali da je on rekel: „Ja jesem živi kruh koj jesem iz Neba dole stupil.“
I rekli su: „Je li ov ni Ježuš, Jožefov sin čijega oca i mater mi poznamo? Kak anda veli ov: ‛Ja jesem iz Neba dole stupil?’“ Mat 13,55.
Odgovori anda Ježuš i reče njim: „Ne morgujte med sobum!
K meni nigdo ne more dojti ako njega ne bude vlekel Otec koj je mene poslal i ja njega obudim na poslednji dan.
Vu Prorokih je pisano: ‛I oni budeju Božji vučeniki.’ Vsaki koj je čul od Oca ter se vučil, on ide k meni.
Ne da bi gdo bil videl Oca, nego on koj je od Boga: on je videl Oca.“ Mat 11,27.
„Stanovito, stanovito velim vam: koj vu me veruje, ima žitek vekivečni.
Ja jesem kruh živlenja.
Vaši oci jesu vu puščini jeli manu ter su pomrli.
Ovo pako je kruh koj je iz Neba dole stupil da koj jé od njega, ne vumre.
Ja jesem živi kruh koj je iz Neba dole stupil.
Koj od ovoga kruha jé, bude naveke živel i kruh kojega ja budem dal, je moje telo za živlenje sveta.“
Pregovarjali su se anda Židovi med sobum i rekli: „Kak nam more ov svoje telo dati jesti?“
Ježuš pako reče njim: „Stanovito, stanovito velim vam: ako ne budete jeli telo Sina Človečjega i njegvu krv pili, tak ne budete vu sebi imali živlenja.
Koj jé moje telo i pije moju krv, ima žitek vekivečni i ja njega obudim na poslednji dan.
Ar moje telo je istinito jestvina i moja krv je istinito pitvina.1Kor 11,27.
Koj jé moje telo i pije moju krv, on ostaje vu meni i ja vu njem.
Kak je mene poslal živuči Otec i ja zbog Oca živem, tak bude takaj on koj jé mene živel zbog mene.
Ovo je kruh koj je iz Neba dole stupil, ne kak mana koju su jeli vaši oci ter su pomrli. Koj jé ov kruh, bude naveke živel.“
Ovo je rekel vu sinagogi kad je vu Kafarnaumu vučil.
Kad bi anda to vnogi zmed njegveh vučenikov bili čuli, rekli su: „Ovo govorenje je tvrdo i gdo nje more poslušati?“
Kajti je pako Ježuš sam pri sebi znal da su zbog toga njegvi vučeniki morguvali, rekel je njim: „Kaj vas to spačuje?
Ako anda budete videli Sina Človečjega tam gore stupiti gde je predi bil?
Duh je koj oživljuje, telo nikaj ne hasni. Ove reči koje ja vam jesem govoril jesu duh i živlenje.
Ali med vami jesu nekoji koji ne veruju.“ Ar Ježuš je znal od početka koji bi bili oni koji ne veruju i gdo bude njega izdal.
I rekel je: „Zato jesem ja vam rekel: ‛K meni nigdo ne more dojti ako mu ne bude od mojega Oca dano.’“
Od ovoga časa jesu vnogi zmed njegveh vučenikov nazad odišli i nesu več z njim hodili.
Reče anda Ježuš dvanajstem: „Je li i vi hočete oditi?“
A Šimun Peter odgovori njemu: „Gospone, k komu pojdemo? Ti imaš reči vekivečnoga žitka.
I mi jesmo veruvali i spoznali da si ti Krištuš,Sin Božji.“
Ježuš odgovori njim: „Je li ja vas dvanajstere nesem izebral i jeden zmed vas je vrag?“
On pako je govoril od Judaša Iškarijota, Šimunovoga sina, ar ov je imal njega izdati pokehdob je bil jeden zmed dvanajsteh. Mat 16,15.16.