Obuđenje Lazara. Židovi drže tolnač kak bi mogli Ježuša vmoriti. Kajfaš prorokuje.
- Bil je pako nekoj betežen imenom Lazar iz Betanije, iz gradišča Marije i Marte, njejine sestre.
- (Marija pako je bila ona koja je Gospona namazala z mastjum i njegve noge brisala z svojemi lasmi,kojeh brat Lazar je bil betežen.)
- Njegve anda sestre pošljeju k njemu govoreče: „Gospone, nut, kojega ti ljubiš, je betežen.“
- Kad bi pako Ježuš to bil čul, reče njim:„Ov beteg ni nasmrt, nego na diku Božju da se po njem odiči Sin Božji.“
- Ježuš pako je ljubil Martu i njejinu sestru (Mariju) i Lazara.
- Kad bi anda bil čul da je on betežen, onda je on zadnjič jošče dva dni ostal na onem istem mestu gde je bil,
- zatem pako reče svojem vučenikom: „Hodmo ipak vu Judeju!“
- Rečeju njemu vučeniki: „Mešter, sad su te Židovi iskali kamenuvati ter ipak ideš tam?“
- Ježuš odgovori: „Je li ni dvanajst vur vu dnevu? Ako gdo po dnevu hodi, tak se ne popikne kajti on vidi svetlost ovoga sveta,
- ako pako gdo po noči hodi, popikne se kajti nema pri sebi svetlosti.“
- Ova je on govoril i zatem reče njim: „Lazar, naš prijatel, spi, ali ja idem da ga iz sna obudim.“
- Onda rečeju njegvi vučeniki: „Gospone, ako spi, tak ozdrave.“
- Ježuš pako je rekel od njegve smrti, a oni su štimali da on od spanja sna govori.
- Zato anda je njim Ježuš očivesto rekel: „Lazar je vumrl
- i ja se zbog vas veselim kaj nesem bil tam da mi verujete. Ali hodmo mi k njemu!“
- Onda reče Tomaš, koj se zove Dvojek, svojem skupvučenikom: „Tak hodmo i mi da z njim vumremo!“
- Kad bi anda Ježuš bil došel, najde njega vre četiri dni vu pokopališču ležečega.
- (Betanija pako je bila blizu Jeruzalema, okolo petnajst tečajeveh odalečena.)
- Vnogi pako Židovi jesu bili došli k Marti i Mariji da bi je zbog njihovoga brata batriveli.
- Kad bi anda Marta bila čula da Ježuš prihađa, izišla je njemu naproti. Marija pako je doma sedela.
- Onda Marta reče Ježušu: „Gospone, da si ti bil ovde, moj brat ne bi bil vumrl.
- Ali ja i vezda znam da vsa koja goder ti od Boga prosiš, bude tebi Bog dal.“
- Reče njoj Ježuš: „Tvoj brat bude se stal.“
- Marta reče njemu: „Ja znam da se stane ob gorestajanju na Sudnjem dnevu.“ Luk 14,14. Gore 6,40.
- Reče njoj Ježuš: „Ja jesem gorestajanje i živlenje: koj vu me veruje, bude živel ako je takaj vumrl
- i vsaki koj žive i vu me veruje, naveke ne bude vumrl. Je li ti to veruješ?“
- Ona reče njemu: „I kruto, Gospone, ja verujem da ti jesi Krištuš, Sin živoga Boga koj je na ov svet došel.“
- I kad bi to ona bila izvustila, odide i skrovce pozove svoju sestru Mariju i reče: „Mešter je ovde i zove tebe.“
- Kad bi to ona bila čula, hitro se stane i dojde k njemu.
- Ar Ježuš jošče ni bil došel vu gradišče, nego je jošče bil na onem mestu gde mu je bila Marta naproti došla.
- Kad bi pako Židovi, koji su pri njoj vu hiži bili i nju batriveli, videli da se je Marija hitro stala i izišla, jesu nju nasleduvali i rekli: „Ona ide k grobu da se tam plače.“
- Kad bi anda Marija tam bila došla gde je bil Ježuš i njega zgledala, opade k njegvem nogam i reče njemu: „Gospone, da si ti bil ovde, tak ne bi bil vumrl moj brat.“
- Kad bi nju anda Ježuš bil videl plačuču i Židove, koji su z njum bili došli, plačuče, zasenetil se je vu duhu i samoga sebe zmutil
- i reče: „Gde ste ga položili?“ Oni rečeju njemu: „Gospone, hodi i viđ!“
- I rasplakal se je Ježuš.
- Rečeju anda Židovi: „Nut, kak ga je ljubil!“
- Nekoji pako zmed njih rečeju: „Kaj ov, koj je oči sleporođenoga otprl, ni mogel včiniti da on ne bi vumrl?“ Gore 9,6.
- Ježuš, anda ipak se vu sebi samem osupne i dojde k pokopališču. Bilo je pako duplje i kamen je bil na nje položen.
- Reče Ježuš: „Odvalete kamen!“ Reče njemu Marta, sestra onoga koj je bil vumrl: „Gospone, vre smrdi ar on vre četiri dni leži.“
- Reče njoj Ježuš: „Je li ti ja nesem rekel da ako veruješ, budeš videla Božju diku?“
- Odvaliju anda kamen. Ježuš pako podigne svoje oči gore i reče: „Otec, ja tebi dajem hvalu da si me posluhnul.
- Ja pako jesem znal da ti mene vsigdar posluhneš, ali zaradi ljudstva koje okolo stoji, ja to jesem rekel da veruju da ti mene jesi poslal.“
- Ova kad bi on bil izvustil, zakriči z velikem glasom: „Lazar, izidi van!“
- I mrtvi sproti izide van, zvezan na nogah i rukah z povoji, a njegov obraz je bil z potnem rupcom obvit.Onda reče njim Ježuš: „Razvežite njega i pustete njega oditi!“
- Vnogi pako zmed Židovov koji su bil došli k Mariji i Marti i videli koja je Ježuš činil jesu vu njega veruvali.
- Nekoji pako zmed njih jesu odišli k farizejušem i njim povedali koja je Ježuš činil.
- Onda su poglavari aldovnički i farizejuši skup zebrali spravišče ter govorili: „Kaj činimo? Ov človek čini vnoga znamenja.
- Ako njega ovak pustimo, vsi budu vu njega veruvali i dojdeju Rimljani ter naše mesto i ljudstvo otmeju.“
- Jeden pako zmed njih, Kajfaš imenom, koj je bil ovoga leta poglavar aldovnički, reče njim: „Vi nikaj ne znate“, Dole 18,14,
- „niti ne mislite da je za vas bolje ako jeden človek vumre za ljudstvo nego da ves narod pogine.“
- Ovo pako ni on od samoga sebe rekel, nego, pohekdob da je bil ovoga leta poglavar aldovnički, je prorokuval da bude Ježuš za narod vumrl,
- i ne samo za narod, nego da on takaj raspršanu decu Božju bude skupa vu jedno zebral.
- Od ovoga anda dana jesu mislili njega skončati.
- Zato Ježuš več ni očivesto med Židovmi okolo hodil, nego je odišel vu kotar poleg puščine, vu varaš koj se zove Efrem i ovde se je on z svojemi vučeniki zadržaval.
- Bil je pako blizu Vuzem židovski i vnogi su iz ovoga kotara pred Vuzmom odišli gore vu Jeruzalem da bi se očistili.
- Ovi anda jesu iskali Ježuša ter govorili jeden proti drugomu kad su vu Cirkvi stali: „Kaj se vam vidi? Kaj ne dojde k svetečnomu dnevu?“ Poglavari pako aldovnički i farizejuši jesu dali zapoved da ako bi gdo zeznal gde bi on bil, naj bi nazvestil da ga pograbiju.
