Marija maže Ježuša. Židovi hočeju Lazara skončati. Ježušev vuhod vu Jeruzalem. Poganini hočeju videti Ježuša. Sad Ježuševe smrti. Glas iz neba. Nevernost Židovov. Reč Božja je sudec.
- Šest dnevov anda pred Vuzmom dojde Ježuš vu Betaniju gde je bil Lazar koj je bil vumrl i od Ježuša bil obuđen. Mat 26,6; Mark 14,3.
- Ovde su pako njemu naredili večerju, a Marta je dvorila, Lazar pako je bil jeden zmed oneh koji su z njim pri stolu sedeli.
- Marija anda vzeme drage maste iz prave špikinarde i maže Ježuševe noge i njegve noge briše z svojemi lasmi i hiža je bila od duhe te masti napunjena.
- Reče anda jeden zmed njegveh vučenikov, JudašIškarijot koj je njega buduč izdal:
- „Zakaj ni ova mast za tristo denjarov prodana i dano siromakom?“
- To pako ni on rekel kak da bi on skrb imal na siromake, nego kajti je bil tat, mošnju imal i nosil ona koja su bila nuter vržena.
- Reče anda Ježuš: „Pustete ju da to ona za dan mojega pokapanja čini.
- Ar siromake vsigdar imate pri vas, mene pako nemate vsigdar.“
- Poklamkam bi pako velika vnožina Židovov bila zeznala da je on ovde, došli su, ne samo zbog Ježuša, nego da bi takaj Lazara videli kojega on od mrtveh obudil.
- Poglavari pako aldovnički jesu držali tolnač da bi takaj Lazara skončali
- kajti vnogi Židovi jesu zaradi njega odišli i veruvali vu Ježuša.
- Kad bi pako drugi dan vnožina ljudstva, koja je bila došla k svetečnomu dnevu, čula bila da Ježuš dohađa vu Jeruzalem, Mat 21,1; Mark 11,1; Luk 19,29,
- vzeli su palmove svrži i išli su njemu naproti i kričali: „Hozana! Blagoslovljen koj dohađa vu Gosponevem imenu, kralj izraelski!“ Mat 21,9.
- I Ježuš najde osleka i sede si na njega, kak je pisano: Zak 9,9; Mat 21,7; Mark 11,7; Luk 19,35,
- „Ne boj se, kči sijonska, nut tvoj kralj dohađa sedeči na žrebetu oslice.“ Mat 21,5.
- Ova njegvi vučeniki spočetka nesu razmeli, nego kad je bil odičen Ježuš, onda se iz toga jesu spomenuli da su ova od njega bila pisana i da zato jesu ova njemu včinjena.
- Ljudstvo pako, koje je bilo pri njem kad je Lazara iz pokopališča pozval i od mrtveh obudil, je davalo svedočanstvo.
- Zato takaj je njemu ljudstvo naproti išlo, kajti je čulo da je on ovo znamenje včinil.
- Farizejuši anda jesu med sobum rekli: „Viđte da nikaj ne opravimo! Nut, ves svet ide za njim!“
- Zmed oneh pako koji su gore došli da bi se o svetečnom dnevu vklanjali, bili su nekoji poganini.
- Ovi su anda pristupili k Filipu, koj je bil od Betžajide galilejanske, i prosili su njega govoreči: „Gospone, mi bi radi videli Ježuša.“
- Filip dojde i vjavi to Jandrašu, Jandraš pako i Filip jesu to Ježušu vjavili.
- Ježuš pako odgovori njim i reče: „Došla je vura da se odiči Sin Človečji.
- Stanovito, stanovito velim vam: ako pšenično tega zrno vu zemlju ne opadne i ne vumre,
- tak ono ostaje samo, ako pako vumre, tak vnogo sada doprinaša.Koj ljubi svoju dušu, on ju bude zgubil, koj pako svoju dušu odurjava na ovem svetu, on ju bude na žitek vekivečni opčuval. Mat 10,39; 26,25; Mark 8,25; Luk 9,24; 17,33.
- Ako gdo hoče meni služiti, on naj mene nasleduje i gde ja jesem, onde naj bude takaj moj službenik.Ako gdo meni služi, njega bude moj Otec poštuval.
- Moja duša je sada turobna, pak kaj hoču ja reči? Otec, oslobodi me od ove vure! Ali zato sem ja došel vu ovu vuru.
- Otec, odiči tvoje ime! “ Na to nadojde glas iz neba: „Ja jesem odičil ter ipak budem odičil!“
- Ljudstvo anda, koje je ovde stalo i ov glas čulo, je reklo: „Grmelo je.“ Drugi su rekli: „Angel je z njim govoril!“
- Ježuš odgovori i reče: „Ov glas ni zarad mene došel, nego zaradi vas. Gore 11,42; 6,44.
- Vezda dohađa sud zvrhu sveta, vezda bude poglavar ovoga sveta van ishičen.
- I ja, ako budem od Zemlje izvisen, budem vsa k meni vlekel.“
- (Ovo pako je on rekel nameneči z kakvum smrtjum on bude vumrl.)
- Onda odgovori njemu ljudstvo: „Mi smo iz Zakona čuli da Krištuš vekom ostaje, kak ti anda veliš: ‛Sin Človečji zvisiti’? Gdo je taj Sin Človečji?“ Šolt 109,4; Ezek 37,25; Dan 7,14.
- Ježuš pako reče njim: „Jošče malo časa je svetlost pri vas. Hodete, doklam imate svetlost da vas tmica ne zastigne ar koj po tmici hodi, on ne zna kam ide.
- Verujte vu svetlost, doklam imate svetlost, da budete sini svetlosti.“ Ova kad bi Ježuš bil izvustil, je odišel i skril se pred njimi.
- Premda bi pako on tulika znamenja bil včinil pred njimi, oni vendar nesu vu njega veruvali.
- Da bi se ispunilo govorenje Izajijaša proroka koje je on govoril: „Gospone, gdo veruje našoj reči i ruka Gosponova komu je očituvana?“ Iz 53,1.
- Zato nesu oni mogli veruvati ar Izajijaš je ipak rekel:
- „On je njihove oči oslepel i njihovo srce optvrdel da oni z očmi ne vidiju i srcem ne razmeju i ne obrneju se niti je ja ne zvračim.“ Iz 6,9.
- Ova je rekel Izajijaš kad je videl njegvu diku i od njega govoril.
- Ništarmanje vendar i zmed poglavarov jesu vnnogi vu njega veruvali, ali zaradi farizejušev nesu valuvali da ne bi iz sinagoge bili van hičeni.
- Ar su bolje ljubili diku ljudih nego diku Božju.
- Ježuš pako je kričal i rekel: „Koj vu me veruje, on ne veruje vu me, nego vu onoga koj je mene poslal.
- I koj mene vidi, on vidi onoga koj je mene poslal.
- Ja jesem kakti svetlost došel na svet da vsaki koj vu me veruje, ne ostane vu tmici. Gore 1,5 i sl. 8,12; 12,35.36.
- I ako gdo moje reči posluša i ne obdržava, ja njega ne sudim ar ja nesem došel sudit sveta, nego zveličit sveta.
- Koj mene zameče i ne prijemlje moje reči, on ima koj ga sudi. Reči koje ja jesem govoril, one ga budu sudile na poslednjem danu. Gore 3,18.
- Ar ja nesem od samoga sebe govoril, nego Otec koj je mene poslal, on mi je dal zapoved kaj imam govoriti i kaj vučiti.
- I ja znam da je njegva zapoved žitek vekivečni. Zato kaj ja govorim, govorim tak kak je meni rekel Otec.“
