Ježuš pere noge svojem vučenikom, nazvešča izdavanje Judaševo i daje novu ljubavi zapoved.
- Pred vuzmenem svetkom, pokehdob je znal Ježuš da je došla njegva vura da bi iz ovoga sveta išel k Ocu, on pako svoje, koji su bili na svetu, bi ljubil, tak je nje tja do konca ljubil. Mat 26,2 i sl.; Mark 14,1 i sl.; Luk 22,1 i sl.
- I po dokončanoj večerji, kad bi vrag vre bil postavil Judašu Iškarijotešu, Šimunovomu sinu, vu srce da bi njega izdal
- i akoprem bi on znal da je njemu Otec vsa vu ruke dal, da je on od Boga izišel i k Bogu ide,
- stane se od večerje, podloži svoju opravu iz sebe, vzeme ručnik i z njim se opaše.
- Onda vleje vode vu medenicu i počme prati noge svojem vučenikom i brisati z ručnikom z kojem je bil opasan.
- Dojde anda k Šimunu Petru. Peter pako reče njemu: „Gospone, ti li budeš meni noge pral?“
- Ježuš odgovori i reče njemu: „Kaj ja činim, toga ti sada ne razmeš, ali ti to budeš potlam razmel.“
- Reče njemu Peter: „Ti mi naveke ne budeš nog pral!“ Odgovori njemu Ježuš: „Ako te ja ne operem, tak ne budeš imal dela z menum!“
- Reče njemu Šimun Peter: „Gospone, ne samo moje noge, nego takaj ruke i glavu.“
- Reče njemu Ježuš: „Koj je vmiven, on več ne potrebuje, nego da noge opere, tak je on ves čist. Takaj vi jeste čisti, ali ne vsi.“
- Ar on je znal gdo bi on bil koj bi ga izdal, zato je rekel: „Vi neste vsi čisti.“
- Poklamkam bi on njihove noge bil opral i svoju opravu na se del, sede si ipak k stolu i reče njim: „Je li znate kaj sem vam ja včinil?
- Vi mene zovete ‛Mešter’ i ‛Gospone’ i vi prav velite ar ja to jesem.
- Ako anda ja, Gospon i Mešter, jesem pral vaše noge, tak i vi takaj morate jeden drugomu noge prati
- ar ja jesem vam dal peldu da i vi tak činete kak sem ja vam včinil.
- Stanovito, stanovito velim vam: sluga ni vekši od svojega gospona niti poslani ni vekši od onoga koj ga je poslal. Mat 10,24; Luk 6,40. Dole 15,20.
- Ako vi ova znate, blaženi jeste vi ako li primerom toga včinite.
- Ja ne govorim od vas vseh. Ja znam koje ja jesem izebral, ali Pismo mora se spuniti: ‛Koj kruh z menum jé, podiže proti meni svoju petu.’ Šolt 49,10.
- Ja vam to vre sada povedam, prvlje nego se dogodi, da vi, kad se dogodi, verujete da ja jesem.
- Stanovito, stanovito velim vam: koj prijemlje kakvoga kojega ja pošljem, on mene prijemlje, koj pako mene prijemlje, prijemlje onoga koj je mene poslal.“
- Kad bi Ježuš ova bil zvustil, postal je vu duhu turoben i svedočil je i rekel: „Stanovito, stanovito velim vam da jeden zmed vas bude mene izdal!“
- Gledali su anda vučeniki jeden na drugoga dvoječi od kojega bi on govoril.
- Jeden pako zmed njegveh vučenikov, kojega je ljubil Ježuš, je ležal vu Ježuševem naručaju.
- Ovomu anda namegne Šimun Peter i reče njemu: „Gdo je od kojega on govori?“
- Onda se ov nasloni na Ježuševa prsa i reče njemu: „Gospone, gdo je?“
- Ježuš odgovori: „On je kojemu ja kruh kojega ja omačem budem podal.“ I on omoči kruh i poda ga Judašu Iškarijotešu, Šimunovomu sinu.
- I po založaju vlezne vu njega Šatan. I Ježuš reče njemu: „Kaj kaniš činiti, to čini skorom.“
- To pako ni nigdo razmel zmed oneh koji su sedeli pri stolu zakaj on to je njemu rekel.
- Ar nekoji jesu štimali da Ježuš, pokehdob je Judaš mošnju imal, je njemu rekel: „Kupi ona koja su nam potrebna za dan svetečni!“ ali da bi kaj vbogem dal.
- Kad bi anda on bil založil, sproti je van izišel.Bila je pako noč.
- Poklamkam bi anda on van bil izišel, reče Ježuš: „Vezda je Sin Človečji odičen i Bog je vu njem odičen!
- Ako je Bog vu njem odičen postal, tak bude Bog njega takaj vu sebi samem odičil i on ga bude sproti odičil.
- Dečica, jošče kratek čas jesem pri vas. Vi budete mene iskali, ali, kak sem ja Židovom rekel: ‛Kam ja othađam, tam vi nemrete dojti’, to ja sada vam velim. Gore 7,34.
- Ja vam dajem novu zapoved da se med sobum ljubite. Kak sem ja vas ljubil, da se takaj vi med sobum ljubite. Mat 22,30. Dole 15,12.
- Vu tom budu vas svi spoznali da ste moji vučeniki ako li se med sobum budete ljubili.“
- Reče njemu Šimun Peter: „Gospone, kam ti othađaš?“ Ježuš odgovori: „Kam ja othađam, tam ti mene ne moreš sada nasleduvati, ti pako mene budeš kesneše nasleduval.“
- Reče njemu Peter: „Zakaj te ja sada ne morem nasleduvati? Ja hoču za te moje živlenje položiti.“
- Odgovori njemu Ježuš: „Ti za me hočeš položiti tvoje živlenje? Stanovito, stanovito velim tebi: prvlje nego pevec zapopeva, trikrat me budeš zatajil.“ Luk 22,34.
