Pokažuje ljubavi potreboču, opravke njejineh, stalnost ter izvišenost nad verum i ufanjem i ostalemi dari božanskemi.
- Ako bi z jeziki ljudih i angelov govoril, ljubavi pako ne bi imal, tak bi bil kakti bučeči brunc ali tutneči cimbal.
- I ako bi dar prorokuvanja imal i znal vse skrovnosti i imal vse znanosti i ako bi imal tuliku veru da bi mogel prenašati gore, ljubavi pako ne bi imal, tak nikaj nesem.
- I ako bi ja ves moj imetek razdeljil za hranu siromakov i ako bi predal moje telo na požganje, ne bi pako imal ljubavi, tak mi nikaj ne hasni.
- Ljubav je trpljivna, je dobrotivna, ljubav ni nenavidna, ne barače nepremišljeno, ne napuhava se,
- ni oholna, ne išče svojega, ne jadi se, ne misli zloga,
- ne raduje se nad krivicum, veseli se pako nad istinum,
- vsa podnaša, vsa veruje, vsa se ufa, vsa trpi!
- Ljubav nigdar ne prestane makar se proročanstva zatereju ali jeziki prestaneju ali se znanosti skončaju.
- Ar iz strane spoznajemo, a iz strane prorokujemo.
- Kada pako dojde kaj je zvršeno, onda se zatere kaj je strančno.
- Dok sem bil dete, govoril sem kakti dete, pameten sem bil kakti dete, mislil sem kakti dete. Kad sem pako vrsten človek postal, othitil sem koja su bila dečinska.
- Sada vidimo kakti čez zrcalo vu tenji, onda pako od lica do lica; sada spoznajem neg iz jedne strane, onda pako spoznam kak sem i ja spoznan.
- Sada pako ostaju vera, ufanje i ljubav, ova troja, ali najvekša med njimi je ljubav.
