Razlučnem davaju se razlučni jednoistoga Duha Svetoga dari da na primer tela človečanskoga vsaki naj dužnost svoju zvrši ter spoznajuči da povratno med sobum pripomaganje potrebuju, med sobum se naj pomažeju: i tak je Krištuš vu Cirkvi svojoj skrbel za razlučne ljudih stališe.
- Od duhovneh pako darov, bratja, neču da nikaj ne bi znali.
- Vi znate da, kad ste bili poganini, k nemem bolvanom jeste išli kak ste bili vođeni.
- Zato vam na znanje dajem da nigdo koj vu Duhu Božjem govori, ne preklinja Ježuša. I nigdo ne more reči: „Gospon Ježuš“, nego vu Duhu Svetem. [Šolt] 9, 28.
- Milošče pako darov jesu razlučene, al neg jeden je Duh
- i službe jesu razlučne, ali neg jeden je Gospon
- i opravlenja jesu razlučena, ali neg jeden je Bog koj vsa vu vseh opravlja.
- Vsakomu se pako daje očituvanje Duha na hasen.
- Jednomu se najmre po Duhu Svetem daje reč mudrosti, drugomu pako reč znanosti vu onem istem Duhu.
- Drugomu vera vu onem istom Duhu, drugomu dar vračenja po onem istem Duhu,
- drugomu čuda činiti, drugomu prorokuvanje, drugomu raspoznavanje duhov, drugomu vsakojačke vrsti jezikov, drugomu tolnačenje govorenj.
- Vsa pako ova čini jeden i isti Duh koj vsakomu razdeljuje kak hoče.
- Ar kak goder telo jedno je i kotrigov ima vnogo, vsi pako kotrigi tela, pokehdob ih je vnogo, vendar jedno telo jesu, tak i Krištuš.
- Ar vu jednem Duhu vsi mi vu jedno telo okrščeni jesmo, ali Židovi ali poganini, ali slugi ali slobodni, i vsi vu jednem Duhu napojeni jesmo.
- Ar i telo ni jeden kotrig, nego vnogi.
- Ako reče noga: „Pokehdob nesem ruka, nesem od tela.“, je li zato ni od tela?
- I ako reče vuho: „Pokehdob nesem oko, nesem od tela.“, je li zato ni od tela?
- Ako je celo telo oko, gde je čujenje? Ako je celo telo čujenje, gde je dihanje?
- Sad pako postavil je Bog kotrige, vsakoga zmed njih na telo kak je hotel.
- Da bi pako vsi bili jeden kotrig, gde bi bilo telo?
- Sada pako vnogi zadnjič kotrigi, jedno pako telo.
- Ne more pako oko reči ruki: „Pomoči tvoje ne potrebujem“ ali opet glava nogam: „Niste mi potrebni“.
- Nego vnogo bolje, koji vidiju se kotrigi tela najslabeši biti, jesu najpotrebneši.
- I koje štimamo najneplemeniteše kotrige biti tela, ove z najvekšem poštenjem opstiramo i koja nepoštena jesu naša, najvekše poštuvanje imaju.
- Poštena pako naša nikaj ne potrebuju, nego Bog je tak zjednačil telo da je onomu kotrigu kojem je kaj menjkalo obilneše poštenje dal.
- Da ne bude nesloga vu telu, nego naj kotrigi jeden za drugoga skrb ima.
- I ako kaj trpi jeden kotrig, skupa trpiju vsi kotrigi, ali ako se diči jeden kotrig, skup raduju se vsi kotrigi.
- Vi pako jeste Krištuševo telo i kotrigi med sobum.
- I Bog je zadnjič nekoje vu Cirkvi postavil: prvič apoštole, drugoč proroke, tretjič navučitele, zatem one koji čuda delaju, potlam koji imaju dare vračenja, pomaganja, ravnanja, vsakojačke vrsti jezike govoriti, tolnačiti reči.
- Je li su pako zato vsi apoštoli? Je li su vsi proroki? Je li su vsi navučiteli?
- Je li vsi delaju čuda? Je li vsi imaju krepost vračenja? Je li vsi vsakojačke vrstijezike govoriju? Je li vsi tomačiju?
- Trsete se pako za bolšemi dari. I jošče izvišenešega puta vam pokažem.
