Muž z otkritum, žena pako pokritum mora moliti glavum; Korintijance kara da na opslužavanje večerje Gosponove jeden na drugoga ne čeka, nego se med sobum svadiju; naprvo stavivši medtemtoga njim šakramenta presvetoga tela Krištuša naređenje i pregrešku ter kaštigu nedostojno k ovome pristupljujučeh.
- Nasledniki moji budete kak i ja jesem Krištušev.
- Hvalim pako vas, bratja, da se z mene vu vseh spominjate i kak sem predaval vam, zapovedi moje obdržavate.
- Hoču pako da vi znate da vsakoga muža glava je Krištuš, glava pako žene je muž, glava pako Krištuševa je Bog.
- Vsaki muž moleči ali prorokujuči z pokritum glavum pogrđuje glavu svoju.
- Vsaka pako žena moleča ali prorokujuča z nepokritum glavum pogrđuje glavu svoju ar to je tuliko kak da bi bila obrita.
- Ar ako se žena ne pokrije, naj se obrije, ako je pako mrsko ženi se obriti ali oštriči, naj pokriva glavu svoju.
- Muž zadnjič ne mora pokrivati glavu svoju pokehdob je kip i dika Božja, žena pako je dika muža.
- Ar ni muž iz žene, nego žena iz muža.
- Ar muž ni stvorjen zbog žene, nego žena zbog muža.
- Zato mora žena oblast (peču) imeti na glavi zaradi angelov.
- Medtemtoga niti je muž prez žene niti žena prez muža vu Gosponu.
- Ar kak je žena z muža, ovak i muž po ženi, vsa pako z Boga.
- Vi sami sudete je li se pristoji da žena nepokrita moli Boga.
- Je li ista narava ne vuči vas da zadnjič muž ako duge lasi pusti, sramota je za njega,
- žena pako ako duge lasi ima, dika je njoj pokehdob lasi za pokrivalo njoj dani jesu.
- Ako se pako gdo vidi svadljivica biti, mi takove navade nemamo niti Cirkva Božja.
- Ovo pako zapovedam nehvaleči da se ne k bolšemu, nego k gorešemu skup shađate.
- Prvič doisto kada se skup spravite vu Cirkvu, čujem da su odelenja med vami i z jedne strani verujem.
- Ar potrebno je da i krivoverstva med vami budeju da i ti skušani očivesti budu med vami.
- Kad se anda skupa shađate zajedno, vre se ne drži Gosponova večera.
- Ar vsaki jesti svoju večeru vre predi podstupljuje se. Ter nekoj istom gladuje, drugi pako je pijan.
- Je li nemate hiž za jesti i piti? Ali Cirkvu Božju zamečete i osramočujete one koji nikaj nemaju? Kaj ču vam reči? Je li vas budem hvalil? Vu tom vas ne hvalim.
- A ja sem prijel od Gospona kaj sem i vam takaj predal: da Gospon Ježuš vu onoj noči vu kojoj je bil izdan je vzel kruh
- i zahvalil ter ga prelomil i rekel: „Vzemete i ječte: ovo je moje telo koje za vas se bude predalo. Ovo činete na moje spominjanje.“
- Spodobno vzel je po zvršenoj večeri i pehar govoreči: „Ov pehar je novi Zakon vu mojoj krvi. Ovo včinete kuliko goder puti budete pili na moj spomenek.“
- Ar kuliko goder puti budete ov kruh jeli, i pehar pili, budete nazveščali smrt Gosponovu doklam dojde.
- Zato koj goder bude ov kruh jel, ali pehar Gosponov pil nevredno, bude krivec tela i krvi Gosponove. Jan 6,59.
- Naj pako človek skuša sebe samoga ter tak naj jé od ovoga kruha i pije iz ovoga pehara.
- Ar koj jé i pije nevredno, on sam sebi jé i pije sud pokehdob ne razlučava telo Gosponovo.
- Zato jesu med vami vnogi slabi i betežni i vnogi spiju.
- Ar da bi sami sebe sudili, zaisto ne bi bili suđeni.
- Kada se pako sudimo, tak se od Gospona pokorimo da se z ovem svetom ne skvarimo.
- Zato, bratja moja, kada se k jelu skup shađate, tak jeden drugoga počekajte.
- Ako je gdo gladen, naj jé doma da se na sud skup ne izidete. Ostala pako naredim kada dojdem.
