Po spomenku nezahvalneh Židovov, gusto puti zbog razlučneh grehov od Boga kaštiganeh, nje od spodobneh plaši; od skušavanja človečanskoga i od božanske vu skušavanjih pomoči; ne lestor bolvanomolstvo morati je bežati, nego i stol oneh koji jestvine bolvanom alduvane jeju zato kajti po tom vidiju se na bolvane nekaj držati i zato kajti su na spačku slabem.
1.Ar vam ja neču zamučati, bratja, da su vsi naši oci pod oblakom bili i vsi su čez morje prešli.
- I vsi su pod Mojžešem vu oblaku i vu morju krščeni.
- I vsi su jednoistu duhovnu hranu blaguvali
- i vsi su jednoisti duhovni napitek pili (pili su pako iz duhovne pečine koja je nje nasleduvala, ova pečina pako je bil Krištuš).
- Ali zmed njih više ih se ni dopalo Bogu ar su poraženi vu puščini.
- Ova su nam na peldu včinjena da ne budemo poželni zleh kak su i oni poželeli. 4Moj 11,33.34.
- Niti ne postanete bolvanomolci kak nekoji zmed njih, kak je pisano: „Sel si je puk jesti i piti i stali su se igrati.“ 2Moj 32,6.
- Niti ne praznujmo kak su nekoji zmed njih praznuvali i poginulo ih je jeden dan dvadeset tri jezera.
- Niti ne skušavajmo Krištuša kak su ga nekoji zmed njih skušavali ter od kač poginuli.
- Niti ne morgujte kak su nekoji zmed njih morguvali i pog[ubljeni] od skončitela.
- Vsa pako ova vu priliki jesu se njim dogodila, pisana pako jesu na opominanje nam z kojem zadnje vreme živemo.
- Zato koj štima da stoji, naj pazi da ne opadne.
- Naj vas nikakovo skušavanje ne popade zvun človečanskoga, Bog pako je veren – on vas ne bude dal zvrhu vašeh močih skušavati, nego bude pri skušavanju takaj takov ishodek dal da morete podnesti.
- Zbog česa, preljubljeni moji, bežete od bolvanomolstva,
- kakti pametnem govorim, vi sami sudete kaj velim.
- Pehar blagoslovlenja kojega blagoslavljamo, ne li skupvživanje krvi Krištuševe? I kruh kojega lamljemo, ne li skupvživanje tela Gosponovoga?
- Ar jeden kruh, jedno telo jesmo vnogi, vsi koji od jednoga kruha delniki jesmo.
- Viđte Izraela poleg tela: ne li koji jeju aldove, delniki jesu oltara?
- Kaj anda? Je li rečem da bolvanom alduvano je kaj? Ali da bolvan je kaj?
- Ali koja alduju poganini, vragom alduju, a ne Bogu. Neču pako da vi pajdaši postanete vragov: ne morete pehar Gosponov piti i pehar vražjega.
- Ne morete stola Gosponova delniki biti i stola vražjega.
- Je li hočemo Gospona dražiti? Je li smo jakši kak on? Vsa su meni slobodna, ali vsa ne hasniju.
- Vsa su meni slobodna, ali vsa ne pobolšavaju.
- Nigdo svoje naj ne išče, nego kaj je drugoga.
- Vse kaj se v mesarnici prodaje, ječte, nikaj nespitavajuči zaradi dušnovesti.
- Ar Gosponova je zemlja i obilnost njejina.
- Ako vas gdo zmed nevernikov zove i hočete iti, vse kaj se vam naprvo stavlja, ječte nikaj nespitavajuči zaradi dušnovesti.
- Ako pak gdo reče: „Ovo je alduvano bolvanom“, najte jesti zaradi njega koj je na znanje dal i zaradi dušnovesti,
- dušnovest pako ne velim tvoju, nego drugoga. Ar zakaj bi se sloboščina moja sudila od drugoga dušnovesti?
- Ako ja z zahvalnostjum delnik bivam, zakaj se blaznim za to da hvalu dajem?
- Ali vi anda jete ali pijete ali drugo kaj činite, vsa na diku Božju činete.
- Prez spačke budete Židovom i poganinom i Cirkvi Božjoj
- kak se i ja vu vseh vsem dopadam neiščuči kaj meni hasnovito je, nego kaj vnogem da zveličeni postaneju.
