Ni prijemal Pavel hranu od Korintijancev kojem je prodekuval da vsaku priliku spačke odneme akoprem po vnogeh pokazih potvrđuje da bi mu bilo slobodno, nego na vsaki način prilagođuje se da z tem više na klanjanje Bogu dopelja, Korintijance opominjavši na sleduvanje oneh koji na mestu majdanstva drčiju ali se vu borenju trse, veli da on takaj telo svoje kroti.
- Nesem sloboden? Nesem apoštol? Je li nesem Krištuša Ježuša, Gospona našega, videl? Je li neste vi delo moje vu Gosponu?
- Iako nesem drugem apoštol, nego vendar vam jesem ar pečak apoštolstva mojega vi jeste vu Gosponu.
- O[d]govor moj pred onemi koji me pitaju je ov.
- Je li nemamo oblast jesti i piti?
- Je li nemamo oblast ženu sestru okolo voditi kak i ostali apoštoli i brati Gosponovi i Kefas?
- Ali samo ja i Barnabaš nemamo oblasti to činiti?
- Gdo vojuje ob svojem strošku kada? Gdo sadi gorice i sada njegovoga ne je? Gdo pase čredu ter ne je od mleka njejinega?
- Je li poleg človeka to velim? Je li i Zakon ne veli ova?
- Ar pisano je vu zakonu Mojžeševem: „Ne zaveži gupca vršečega vola.“ Je li na vole ima skrb Bog?
- Je li ne veli to vnogo bolje zbog nas? Ar zaradi nas pisana jesu. Ar koj orje, mara vu ufanju orati i koj mlati, vu ufanju da sada dobi, mlati.
- Ako smo mi vam duhovna sejali, je li je to kaj velikoga da mi vaša telovna ženjemo?
- Ako su drugi oblasti vaše delniki, zakaj ne bolje mi? Ali oblasti ove nesmo se vžili, nego vsa podnašamo da ne bi kakovu spačku dali Evangelijumu Krištuševomu.
- Je li ne znate da oni koji vu svetem mestu posluju, koja iz svetoga mesta jesu, jeju i koji oltaru služiju, z oltarom se deliju?
- Tak je i Gospon odredil da oni koji Evangelijum nazveščaju, od Evangelijuma živeju.
- Ja pako z ničem zmed oveh nisem si poslužil. Nesem pako ova pisal da bi se z menum tak godilo ar vnogo bolje bi bilo meni vumreti, kak da bi gdo diku moju pod nikaj spravil.
- Ar ako budem Evangelijum nazveščal, ni meni dika ar je to dužnost moja ar jaj si ga meni ako ne budem Evangelijuma nazveščal.
- Ar ako z dobre volje činim, plaču imam, ako pak nerad, služba je meni zaufana.
- Koja je anda plača moja? Da Evangelijum nazveščajuči, zahman nazveščam Evangelijum, da se oblasti moje vu Evangelijumu zlo ne vživam.
- Ar kada sloboden bil jesem od vseh, vseh slugu mene načinil jesem da bi ih više pridobil.
- I včinjen jesem Židovom kakti Židov da Židove dobim.
- Onem koji su pod Zakonom, kak da bi bil pod Zakonom (kak da sam ne bi bil pod Zakonom) da bi one koji pod Zakonom bili jesu, dobil. Onem koji prez Zakona bili jesu, kak da bi prez Zakona bil (akoprem prez Zakona Božjega ne bi bil, nego pod Zakonom bi bil Krištuševem) da bi pridobil one koji prez Zakona bili jesu.
- Postal jesem slabem slab da bi slabe dobil. Vsem sem vse postal da bi vse zveličene včinil.
- Vsa pako činim zarad Evangelijuma, da ovoga delnik postanem.
- Je li ne znate da oni koji se vu drkališču vtekaju za vadlju, vsi zadnjič drčiju, ali neg jeden prime plaču? Tak drčete da ju dobite.
- Vsaki pako koj se za borenje zvršava, zdržava se od vseh ter oni zadnjič da sprhljivu korunu zadobiju, mi pako nesprhljivu.
- Ja anda tak drčim, ne kakti za nestanovito, tak harcujem, ne kakti po zraku šikajuči,
- nego vkročujem telo moje i nje priganjam v sužanstvo da ja morebiti, kad drugem prodekujem, sam zahičen ne postanem.
