Akoprem bolvanskoga aldova jestvine neje vu sebi neslobodno jesti pokehdob bolvan nikakovoga neje opravka ali oblasti, ne smeju se vendar jesti ako ali dušnovesti je suprotivno ali ako je slabešem na spačku, niti oveh jedenje ali nejedenje čini človeka bolšega.
- Od oneh pako koja se bolvanom alduju, znamo da smo vsi podvučeni. Vučenost napuhava, ljubav pako popravlja.
- Ako pako štima da zna kaj, jošče ni spoznal kak je potrebno njemu znati.
- Ako pako gdo ljubi Boga, ov spoznan je od njega.
- Od jestvin pako koje se bolvanom alduju znamo da nikaj ni bolvan na svetu i da nigdo drugi ni Bog, nego jeden.
- Ar premda jesu koji se zoveju bogi, ali vu Nebu, ali na Zemlji (pokehdob vnogo je bogov i vnogo gosponov),
- mi vendar lestor jednoga Boga imamo, Oca, iz kojega su vsa i mi vu njem, i jednoga Gospona Ježuša Krištuša, po kojem vsa i mi po njem.
- Ali ni vu vseh znanost. Ar nekoji pokehdob jošče sada vu dušnoj vesti za bolvana nekaj drže, kak da bi bolvanom alduvano bilo, jeju i dušnavest njihova pokehdob je slaba, oskruni se.
- Jestvina pako ne preporuča nas Bogu. Ar niti ako jeli budemo, obilneši budemo niti ako jeli ne budemo, ne pomenjka nam.
- Viđte pako da morebiti ova vaša sloboščina spačka ne postane slabem.
- Ar ako gdo videl bude onoga koj ima znanje pri bolvanskem goščenju sedečega, je li se ne bude dušnovest njegova, pokehdob je slaba, napeljala na jedenje jestvin bolvanom alduvaneh?
- I pogine slabi vu tvojoj znanosti brat zbog kojega Krištuš je vumrl?
- Tak pako grešeči proti bratu i vražeči dušnovest njihovu slabu, proti Krištušu grešite
- zaradi česa ako jelo spačuje brata mojega, ne budem jel mesa naveke da ne spačim brata mojega.
