Korintijance podvuča od hižnoga zakona i vživanja njegovoga ter nerazvezljivoga zaveza; neoženjenem preporuča nezakonstvo i kak se verni proti tovarušici neverni zadržavati ima ter da vsaki slednji vu kojem stališu k veri je pozvan naj ostane; devojačtvo zakonskomu stališu pretpostavlja; ženu, poklamkak bi bil tovaruš vumrl, slobodnu rekuči da naj ide za koga hoče vu Gosponu za muž.
- Od kojeh pako jeste pisali meni: dobro je človeku ne doteknuti se žene,
- zbog praznosti pako vsaki ženu svoju naj ima i vsaka muža svojega naj ima.
- Muž naj ženi dužnost spuni, spodobno takaj i žena mužu.
- Žena tela svojega oblast nema, nego muž. Spodobno pako i muž tela svojega oblast nema, nego žena.
- Najte kratiti jeden drugomu, zvun ako morebiti iz provoljenja za vreme da služite molitvi i opet potlam skup se izidete da vas ne skušava Šatan zbog nezdržljivosti vaše.
- To pako velim poleg dopuščenja, ne poleg zapovedi
- ar hoču da bi vsi bili kak ja sam, ali vsaki lastoviti dar ima od Boga: jeden zadnjič ovak, drugi pako ovak.
- Velim pako neoženjenem i vdovicam: dobro je njim ako tak ostaneju kak i ja.
- Ako se pako ne zdrže, naj za muža idu. Ar bolje je za muža iti kak goreti.
- Onem pako koji su vu zakonskem stališu, zapovedam ne ja, nego Gospon da se žena od muža ne odluči.
- Ako pako odide, naj ostane prez muža ali se naj z mužom svojem pomiri. I muž ženu naj ne ostavi.
- Ar ostalem ja velim, ne Gospon. Ako koj brat ženu ima nevernu i ova privolji stanuvati z njim, naj ju ne otpusti.
- I ako koja verna žena ima muža nevernoga i ov privolji z njum stanuvati, naj ne otpusti muža
- ar posvečen je muž neverni po ženi verni i posvečena je žena neverna po mužu vernem ar drugač bi deca vaša nečista bila, sada pako jesu sveta.
- Ako pako neverni othađa, naj odide ar ni sužanstvu podvržen brat ali sestra vu takoveh, vu miru pako pozval je nas Bog.
- Ar otkud znaš, žena, je li muža zveličenoga činiš? Ali otkud znaš, muž, je li ženu zveličenu činiš?
- Zvan vsakomu kak je razdeljil Gospon, vsakoga kak je pozval Bog, tak naj hodi i kak vu vseh cirkvah vučim.
- Obrezan gdo je pozvan, naj se ne čini neobrezanoga. Je gdo neobrezan pozvan, naj se ne obreže.
- Obrezavanje nikaj ni i nepreokruženje nikaj ni, nego obdržavanje zapovedih Božjeh.
- Vsaki vu kojem zvanju je pozvan, vu onem naj ostane.
- Sluga pozvan jesi? Ne maraj, ali vendar ako moreš postati sloboden, rajši vživaj.
- Ar koj vu Gosponu je pozvan sluga, slobodnjak je Gosponov; spodobno koj sloboden pozvan je, sluga je Krištušev.
- Za dragu cenu kupljeni jeste, najte postati slugi ljudih.
- Vsaki vu kem je pozvan, bratja, vu ovem naj ostane pri Bogu.
- Za device pako nemam zapovedi Gospone. Tolnač pako dajem kakti koj jesem milosrdnost zadobil od Gospona da budem veren.
- Štimam anda da je ovo dobro zbog sadašnje potreboče ar je človeku dobro tak biti.
- Jesi privezan k ženi, tak ne išči odvezanje. Jesi pako odvezan od žene, tak ne išči žene.
- Ako se pako oženiš, tak nesi zagrešil. I ako se vuda devica, tak ni zagrešila. Ništar manje vendar takvi budu imali tela traplenje. Ja vam pako praščam.
- To vendar ja velim, bratja, vreme je kratko. To samo ostaje da oni koji imaju žene, budeju kak da ih ne bi imali.
30.I oni koji se plačeju, kak da se ne bi plakali i oni koji se vesele, kak da se ne bi veseleli i koji kupuju, kak da ne bi ladali.
- I oni koji se ovoga sveta vživaju, kak da se ga ne bi vživali ar spodoba ovoga sveta [prejde].
- Ja sem najmre želel da bi vi prez skrbi bili. Koj je prez žene, skrbi samo za ona koja su Gosponova kak se bi Bogu dopal.
- Koj pako ima ženu, skrbi se za ona koja su sveta kak bi se ženi dopal i on je razdeljen.
- I žena koja nema muža i devica misli na ona koja su Gosponova da bude na telu i vu duhu sveta. Koja pako zamužna je, misli koja su sveta kak bi se dopala mužu.
- Zatem to na hasen vašu velim, ne da zanjke vam nastavim, nego zato kajti je pošteno i kajti dopuščenje daje prez prečke Boga moliti.
- Ako pako gdo štima da je grdo za devicu njegovu pokehdob je opstarela i drugač biti ne more, kaj hoče, naj čini: ne greši ako ide za muža.
- Kada si pako gdo tvrdno v srcu svojem naprvo vzeme, neimajuči potreboču, oblast pako imajuči nad voljum svojum i to je dosudil vu srcu svojem zadržati devicu svoju, dobro čini!
- Anda i koj za muža da devicu svoju, dobro čini i koj ne da, bolje čini.
- Žena privezana je k zakonu doklam muž njejin žive, ako pako vumre muž njejin, oslobođena je, naj prejde za muža za kojega hoče, samo vu Gosponu.
- Blaženeša pako bude ako tak ostane poleg tolnača mojega, štimam pako da i ja Duha Božjega imam.
