Kara one koji se pravdaju pred sucem poganinskem; zbraja nekoje grehe vu koje zapleteni Kraljestvo Božje ne budeju ladali; nekoja su dopuščena, veli, koja nesu hasnovita i zbog razlučneh zrokov pokažuje da se praznosti morati je habati.
- Sme se gdo zmed vas imajuči posel proti drugomu suditi pred krivičnemi, a ne pred svetemi?
- Je li ne znate da sveti budu sveta ovoga sudili? I ako se od vas sudil bude svet, je li jeste nevredni koji bi i najmenša sudili?
- Je li ne znate da angele sudili budemo? Kuliko več svetska?
- Ako anda svetske sude budete imeli, zavržene koji su vu Cirkvi, nje postavete za suce.
- Na sramotu vašu velim: tak li ni med vami mudroga nikoga koj bi mogel suditi med bratom svojem?
- Nego brat se z bratom pravda, i to pred nevernemi?
- Vre zadnjič i kruto pregreška je med vami pokehdob sude med vami imate. Zakaj rajši krivicu ne prijemljete? Zakaj rajši prevaru ne trpite?
- Nego vi krivicu i prevaru činite, ter to bratom.
- Je li ne znate da krivični Kraljestvo božansko ne budu ladali? Ne bludete: niti prazniki niti bolvanomolci niti lotriši
- niti mehkiši niti svojega spola prazniki niti tati niti skupci niti pijanci niti preklinjavci niti zgrabljivci Kraljestvo Božje budu ladali.
- I takovi ste nekoji bili, ali oprani jeste, ali posvečeni jeste, ali opravičeni jeste vu imenu Gospona našega Ježuša Krištuša i vu Duhu Boga našega.
- Vsa su mi dopuščena, ali ne hasniju vsa, vsa su mi dopuščena, ali ja se pod ničiju oblast ne dam.
- Hrana je trbuhu i trbuh hrani, Bog pako i ovoga i ovu pod nikaj spravi, telo pako neje praznosti, nego Gosponu i Gospon telu.
- Bog pako je i Gospona obudil i nas bude obudil po kreposti svojoj.
- Je li ne znate da tela vaša kotrigi jesu Krištuševi? Je li anda vzemši kotrige Krištuševe včinim kotrige kurvinske? Zevsema ne.
- Je li ne znate ki se pridruži kurvi, z njum jedno telo postane? Ar budu (veli) dva v jednem telu.
- Koj se pako pridruži Gosponu, jeden duh je z njim.
- Bežete praznost! Vsaki greh koje[g] goder čini človek zvun tela je, koj pako prazni, proti telu svojemu greši!
- Je li ne znate da kotrigi vaši jesu cirkva Duha Svetoga koj vu vas je, kojega imate od Boga i neste sami svoji?
- Ar ste za dragu cenu kupljeni. Dičete i nosete Boga vu telu vašem!
