Korintijance kara da vu rodopraznosti očivesto živučega bi trpeli, kojega nenazočni predaje Šatanu opominajuči da, očistivši zloč kvasa, čisti Vuzem opslužiju i neče da bi se z očivesnemi grešniki pajdašili.
- Očivesno se čuje med vami praznost, i takva praznost kakova niti med poganini, tak da gdo ženu oca svojega ima.
- I vi ste napuhnjeni, a ne bolje da bi se žalostili da bi se izvrgel zmed vas koj to delo čini.
- Ja zadnjič, nenazočen z telom, nazočen pako z duhom, vre sem opsudil kakti nazočen onoga koj je tak včinil,
- vu imenu Gospona našega Ježuša Krištuša skup spravivši se vi i duh moj z krepostjum Gospona našega Ježuša,
- naj se preda ovakov Šatanu na pogublenje tela da se duh zveliči na dan Gospona našega Krištuša.
- Neje dobro dičenje vaše. Ne znate da malo kvasa celo testo zakvasi?
- Iščite stari kvas da postanete novo testo kak jeste nekvašeni.Ar naš vuzmeni janjec je alduvan.
- Tak anda ne gostemo se z starem kvasom niti z kvasom zločestoče i hmanjice, nego z nekvasnem kruhom čistoče i istine.
- Pisal sem vam vu listu da se ne zmešate z prazniki.
- Ali ne štimam z prazniki sveta ovoga ali z skupci ali z zgrabljivci ali bolvanomolci ar drugač bi bili morali z ovoga sveta iziti.
- Sada pako pisal sem vam da se z njimi ne zmešate ako on koj se imenuje brat, je praznik ali skupec ali bolvanomolec ali preklinjavec ali pijanec ali zgrabljivec: z takovem niti ne ječte.
- Ar kaj mi je potrebno one koji su z vama suditi? Ne li vi sudite one koji su znutra?
- Ar one koji su vani bude Bog sudil. Zvržete zločestoga zmed vas!
