Ne sme se prevzetno suditi zbog službenikov božanskeh; karaju se Korintijanci koji zbog službenikov i prijeteh darov dičili se budu kak da bi od sebe imeli i izvišavajuči se zametali su takaj apoštola premda nje Pavel vu Krištušu je rodil; veli da zakratko došel bude vu Korintuš gde krive apoštole karal bude.
- Tak nas naj štima vsaki človek kakti Krištuševe službenike i razdeljitele božanskeh skrovnostih.
- Ovde se od razdeljitelov potrebuje da se vsaki verni znajde.
- Meni je pako najmenje ako se ja od vas ali od kakvoga človečjega suda sudim, nego niti ja sam sebe ne sudim.
- Ar se ja vu ničem ne spoznajem krivca, ali zato jošče nesem opravičen, koj pako mene sudi, je Gospon.
- Zato najte suditi pred vremenom doklam ne dojde Gospon koj bude takaj ono vu tmici skrito razsvetil i očituval namenenja src i onda bude vsaki hvalu od Boga imal.
- Ova pako, bratja, preobrazil sem na meni i Apolonu zaradi vas, da se nad nami vučite, da se, kak zgora pisano je, jeden proti drugomu ne naduva zbog drugoga.
- Ar gdo tebe razlučava? Kaj pako imaš kaj nesi dobil? Ako pako dobil jesi, kaj se dičiš kak da ne bi bil dobil?
- Vre ste se zasitili, vre ste bogati postali, prez nas kraljujete i bar da bi kraljuvali da bi i mi z vami kraljuvali.
- Ar štimam da je Bog nas apoštole (svetu) pokazal kakti najzadnje i kakti na smrt odlučene ar smo za gledališče postali svetu, angelom i ljudem.
- Mi smo bedaki zaradi Krištuša, vi pako jeste pametni vu Krištušu; mi smo slabi, vi pako jeste jaki; vi jeste odičeni, mi pako jesmo zavrženi.
- Tja do ove vure gladujemo i žeđamo, mi jesmo ogoleni, tučemo se z pesnicami i nigdi nemamo stalnoga opstanka.
- Mi delamo i trudimo se z rukami našemi; mi se preklinjamo, a mi blagoslavljamo; mi se preganjamo, a mi podnašamo,
- mi se blaznimo, a mi molimo, kakti smet ovoga sveta jesmo postali, kakti zavržek tja do sadašnjega dneva.
- Ova ne pišem zato da vas osramotim, nego vas kakti moje najdragše sine opominam.
- Ar da bi deset jezer navučitelov imali vu Krištušu, tak vendar nemate vnogo ocev. Ar vu Ježušu Krištušu jesem ja vas po Evangelijumu porodil.
- Prosim anda vas: nasledniki moji budete kak i ja jesem Krištušev!
- Zato poslal sem k vam Timotejuša koj je sin moj najdragši i veren vu Gosponu, koj vas opomene z putov mojeh koji su vu Krištušu Ježušu, kak povsud vu vsakoj cirkvi vučim.
- Kak da ne bi imel volju k vam dojti, tak su se naduli nekoji.
- Dojdem pako k vam brzo ako Gospon bude hotel i spoznal budem ne govorenje oneh koji naduti jesu, nego krepost.
- Ar ni v govorenju Kraljestvo Božje, nego vu kreposti.
- Kaj hočete: z šibum budem išel k vam ali z ljubavjum i duhom krotkoče?
