Korintijancem jošče telovnem ne mogel Pavel zakrite vere skrovnosti nazveščati ar se svadili jesu zbog oneh koji lestor službeniki jesu pokehdob jedini Bog more milošče ter kreposti napredek podeljiti i da jedini Krištuš je vere temelj zvrhu kojega gdo dobro ali zlo bude nadozidal, očituvalo se bude na dan zveđanja. Ne sme se oskruniti Cirkva Božja, koja mi jesmo, niti se naj nigdo vu službenikih božanskeh ne diči.
- I ja, bratja, nesem mogel vam govoriti kakti duhovnem, nego kakti telovnem. Kakti mali deci vu Krištušu,
- mleko sem vam za piti dal, ne hranu ar jošče neste mogli nje vživati se, nego niti sada jošče ne morete ar ste jošče telovni.
- Ar pokehdob je med vami nenavidost i svadenja, je li neste telovni ter je li poleg človeka ne hodite?
- Ar kada gdo veli: „Ja zadnjič jesem Pavlov.“
Drugi pako: „Ja Apolov“, je li neste ljudi? Kaj je anda Apolo? A kaj je Pavel?
- Službeniki onoga kojemu ste veruvali i vsakomu kak je Gospon podeljil.
- Ja jesem zasadil, Apolo je poleval, ali Bog dal je rastenje.
- Anda niti koj je zasadil, je kaj niti koj poleva, nego koj rastenje daje, Bog.
- Koj pako sadi i koj poleva, jedno jesu. Vsaki pako lastovitu plaču prime poleg dela svojega.
- Ar smo mi pomočniki božanski; Božja njiva jeste, Božje zidanje jeste.
- Poleg milošče božanske, koja dana je meni, kakti mudri stanjomešter jesem temelj položil, drugi pako nadozidava. Vsaki pako naj gledi kak bude nadozidal.
- Ar temelj drugi nigdo ne more položiti zvun onoga koj položen je, koj je Krištuš Ježuš.
- Ako gdo pako nadoziđe na temelj ov zlato, srebro, drago kamenje, drva, seno, steblo strnensko,
- vsakoga delo očivesto bude ar dan Gosponov pokaže pokehdob se po ognju raskrije i vsakoga delo kakove je, ogenj zveđal bude.
- Ako kojega delo ostane, koje je nadozidal, plaču dobi.
- Ako kojega delo zgori, kvaren bude, on pako bude zveličen tak vendar kakti po ognju.
- Je li ne znate da Cirkva Božja jeste i Duh Božji stanuje vu vas?
- Ako pako gdo Cirkvu Božju oskruni, skončal ga bude Bog. Ar Cirkva Božja je sveta, koja vi jeste.
- Naj se nigdo ne zapelja: ako gdo štima se med vami muder biti na svetu ovem, naj bedak postane da bude muder.
- Ar mudrost sveta ovoga bedastoča je pri Bogu. Ar pisano je: „Pograbim mudre vu prevari njihove.“
- I opet: „Gospon zna mišlenja mudreh pokehdob čalarne jesu.“
- Nigdo se anda naj ne diči vu ljudih.
- Ar vsa su vaša, ali Pavel ali Apolo ali Cefaš ali svet ali živlenje ali smrt ali vezdašnja ali buduča ar vsa su buduča,
- vi pako Krištuševi jeste, Krištuš pako Božji.
