Dar jezikov veli da je menjši kak dar prorokuvanja, dapače nehasnovit ako menjka koj bi nje rastolmačil; daje njim anda naredbu poleg koje se darov oveh redno vživati moreju i ženam zapoveda vu cirkvi mučati.
- Nasledujte ljubav, hlepete za duhovnemi, najbolje pako da prorokujete.
- Ar koj z tuđem jezikom govori, ne govori ljudem, nego Bogu ar ga nigdo ne posluša. Vu duhu pako govori skrovnosti.
- Ar koj prorokuje, ljudem govori na napredek i opominanje i obatrivenje.
- Koj govori z ljudskem jezikom, samoga sebe pobolšava, koj pako prorokuje, Cirkvu božansku napreduje.
- Hoču pako da vi vsi govorete z jeziki, bolje pako da prorokujete. Ar vekši je koj prorokuje kak koj govori z jeziki, zvan ako bi rastolnačeval da Cirkvi k napretku bi bilo.
- Sada pako, bratja, ako dojdem k vam z jeziki govoreči, kaj vam hasnel budem ako vam ne budem govoril ali vu očituvanju ali vu znanosti ali v prorokuvanju ali v navuku?
- Vendar koja jesu prez živlenja glas davajuča, ali žvegla ali citara, ako razlučnost v glasu ne daju, kak se bu znalo ono kaj se žvegla ali na citaru igra?
- Ar ako nepravoga glasa da trubenta, gdo se k boju pripravljal bude?
- Tak i vi ako po jeziku razumnu reč ne date, kak se znalo bude ono kaj se govori? Ar budete v zrak govoreči.
- Tak vnogo, kak štimaj[u], fel jezikov je na svetu ovem, vendar pako nijeden ni prez glasa.
- Ako anda ne budem znal krepost glasa, budem onomu komu govorim nerazumljiv i koj govori, meni nerazumljiv.
- Tak i vi, pokehdob pohlepniki duhovneh jeste, na napredek Cirkve iščete da obiljujete.
- I zato koj govori z jezikom, naj moli da bi rastolmačil.
- Ar ako molim z jezikom, duh moj moli, pamet pako moja je prez sada.
- Kaj je anda? Molil budem vu duhu, molil budem i z pametjum, popeval budem vu duhu, popeval budem v pameti.
- Vu ostalom, ako blagoslavljali budete vu duhu, koj spunjava mesto nepodvučenoga, kak bude rekel „Amen“ na tvoj blagoslov? Pokehdob kaj veliš, ne zna.
- Ar ti zadnjič dobro hvalu daješ, ali drugi se ne napreduje.
- Hvalu dajem Bogu mojemu da ja vseh vas jezik govorim.
- Ali vu Cirkvi hoču pet rečih z pametjum mojum govoriti da i druge podvučim kak deset jezer rečih vu tuđem jeziku.
- Bratja, ne budete deca z pametjum, nego z zločestočum deca budete, z pametjum pako zvršeni budete.
- Vu Zakonu pisano je: „Pokehdob vu drugeh jezikih i z drugemi vusnicami budem govoril ljudstvu ovomu ter niti tak ne budu poslušali mene“, veli Gospon.
- Jeziki anda jesu na znamenje ne vernem, nego nevernem, proročanstva pako ne nevernem, nego vernem.
- Ako se anda skup izide cela Crkva zajedno ter vsi naj z jeziki govoriju, naj vlezneju pako nepodvučeni ali neverni, je li ne rečeju da norite?
- Ako bi pako vsi prorokuvali ter naj vlezne koj neverni ali nepodvučeni, pokaže se od vseh i osudi se od vseh,
- otajna srca njegovoga očitna postaneju ter tak opadivši na lice, klanjal se bude Bogu valujuči da zaisto Bog vu vas je.
- Kaj je anda, bratja? Kad se skup izidete, vsaki zmed vas šoltara ima, navuk ima, očituvanje ima, jezik ima, rastolnačenje ima, vsa naj na napredek bivaju.
- Ako gdo z jezikom govori, tak to dva ali najviše tri ter jeden za drugem naj čini, a jeden naj rastolnačuje.
- Ako pak ne bude rastolnačitela, tak naj muči vu cirkvi, sebi naj govori i Bogu.
- Proroki pako dva ali tri naj govoriju, a ostali naj rasuđuju.
- Ako pako drugomu očituvano bude sedečemu, prveši naj tiho bude.
- Ar morete vsi, jeden za drugem, prorokuvati da se vsi vuče i vsi opomeneju.
- I duhi prorokov prorokom podvrženi jesu.
- Ar ni Bog nesloge, nego mira. Kak takaj po vseh cirkvah svecev vučim.
- Žene vu cirkvi naj tiho budu ar im se ne dopušča govoriti, nego podložne biti moraju, kak Zakon veli.
- Ako se pako kaj navčiti hočeju, doma muže svoje naj pitaju. Ar za ženu mrsko je da vu cirkvi govori.
- Je li od vas reč Božja izišla ali je samo do vas došla?
- Ako gdo vidi se prorok biti ali duhovni, naj spozna koja vam pišem kajti Gosponove jesu zapovedi.
- Ako pako gdo ne zna, ne bude se za njega znalo.
- Zato, bratja, želete prorokuvati i govoriti z jeziki ne branete.
- Vsa pako pošteno i poleg reda naj bivaju.
