Vu Krištušu krščeni jesmo da, mrtvi grehu buduč, vu novini živlenja hodemo kak je Krištuš jedenkrat vumrl i pokopan na novo živlenje, ne više vumirajuči, je se podignul; ne budemo anda više pokorni grehu ali poželenjam, nego odrešeni od Zakona i oslobođeni po Krištuša milošči od greha i službeniki včinjeni pravice, predajmo kotrige naše na pokorno služenje k živlenju koje smo predi predali bili nečistoči k smrti.
- Kaj anda rečemo? Ostanemo vu grehu da naj milošča obiluje?
- Zevsema ne. Ar koji smo vumrli grehu, kak bi jošče živeli vu njem?
- Je li ne znate da mi vsi, koji smo goder krščeni vu Krištušu Ježušu, vu njegovi smrti jesmo krščeni? Gal 3, 27.
- Ar mi smo z njim po krstu na smrt pokopani da, kak se je Krištuš po zmožnosti oca od mrtveh gore stal, tak i mi vu nova živlenja hodemo. Kol 2,12.
- Ar ako smo mi z njim skup zasađeni vu spodobi njegove smrti, tak budemo takaj vu spodobi gorestajanja z njim skup zasađeni. Žid 12, 7.
- Ar mi to znamo da je bil naš stari človek z njim skupa raspet da se grešno telo skonča i mi več dalje ne služemo grehu.
- Ar koj je vumrl, on je opravičen od greha.
- Ako smo pako vumrli z Krištušem, tak verujemo da takaj skupa z Krištušem budemo živeli
- pokehdob znamo da Krištuš poklamkam se je od mrtveh gore stal, več ne vumira, smrt več nadalje ne bude nad njim ladala.
- Ar pokehdob je grehu vumrl, vumrl je jedenkrat i pokehdob žive, žive Bogu.
- Ravno tak i vi mislete da ste zadnjič grehu odmrli, Bogu pako živete vu Krištušu Ježušu, Gosponu našem.
12.Naj anda ne lada greh vu vašem vmrtelnem telu da bi pokorni bili poželenjam njegovem.
- Ali niti ne podavajte kotrige vaše za oružje krivičnosti grehu, nego se podajte Bogu kakti zmed mrtveh oživuči i kotrige vaše za oružje pravice Bogu.
- Ar greh ne bude gospoduval nad vami ar neste pod Zakonom, nego pod miloščum.
- Kaj anda? Je li budemo grešili pokehdob nesmo pod Zakonom, nego pod miloščum? Zevsema ne.
- Je li ne znate da komu se povdajete za sluge na pokornost, da ste slugi onoga komu pokorni jeste ili grehu na smrt ili pokorščini na pravicu?
- Hvala pako Bogu, kada ste bili slugi greha, jeste sada pokorni iz srca poleg pelde one navuku vu kojem ste bili zvučeni, vu kojega jeste dani.
- Oslobođeni pako od greha, sluge včinjeni jeste pravice.
- Zbog slabosti vašega tela govorim po človečanski ar kak goder ste vi vašem kotrigom dali služiti nečistoči i krivičnosti na krivičnost, ovak sada dajte vašem kotrigom služiti pravičnosti na posvečenje.
- Ar kada ste bili slugi greha, bili ste prosti od pravice.
- Ali kakovu ste onda imali hasen iz oneh zbog kojeh se sada sramujete? Ar njihov konec je smrt.
- Sada pako pokehdob da ste od greha oslobođeni i službeniki Božji postali, imate za vašu hasen posvečenje, za konec pako žitek vekivečni.
- Ar plača greha je smrt, milošča pako Božja je vekivečni žitek, vu Krištušu Ježušu, Gosponu našem.
