Iz vere, veli, opravičeni ne lestor z ufanjem dičimo se, nego takaj vu suprotivčinah ar ako Krištuš za nas jošče nepobožne je vumrl, vnogo bolje bude nas oslobodil vre opravičene po krvi svojoj i kak po jednoj Adamovoj nepokornosti vsi smo zagrešili, tak se po jednoj Krištuševoj pokornosti od vnogeh pregreških opravičujemo na žitek vekivečni.
- Pokehdob smo mi samo po veri opravičeni postali, imajmo mir z Bogom po našem Gosponu Ježušu Krištušu,
- po kojem mi takaj moremo pristupiti po veri k ovoj milošči vu kojoj stojimo i dičimo se z ufanjem dike sinov Božjeh.
- Mi se pako ne lestor z tem dičimo, nego takaj z suprotivčinami pokehdob znamo da suprotivčina opravlja trpljivnost,
- trpljivnost pako iskušenje, iskušenje pako ufanje,
- ufanje pako neosramočuje ar ljubav Božja je izlejana vu našeh srcah po Duhu Svetem koj je nam dan.
- Ar k čemu je Krištuš, doklam smo jošče slabi bili, poleg vremena za nepobožne vumrl?
- Ar teško je za pravičnoga gdo vumrl ar za dobroga bi morebiti gdo smel vumreti.
- Preporuča pako ljubav svoju Bog med nami ar doklam smo jošče grešniki bili, poleg vremena
- Krištuš za nas je vumrl, vnogo anda bolje sada opravičeni vu krvi njegovoj budemo odrešeni od srditosti po njem.
- Ar ako doklam smo neprijateli bili, pomirjeni jesmo z Bogom, po smrti Sina njegovoga vnogo bolje pomirjeni i zveličeni budemo po živlenju njegovem.
- Ne lestor pako to, nego takaj dičimo se vu Bogu, po Gosponu našem Ježušu Krištušu po kojem smo sada pomirenje zadobili.
- Zbog česa kak po jednem človeku greh na svet ov je došel i po grehu smrt i tak je čez vse ljudi smrt došla, v kojem su vsi grešili.
- Ar tja do Zakona bil je greh na svetu, greh se pako ne bude računal doklam Zakona ni bilo.
- Nego ladala je smrt od Adama tja do Mojžeša takaj nad onemi koji nesu pregrešili na spodobu prekršenja Adamovoga koj je pelda budučega.
- Ali ali neje kak greh, tak i dar ar ako ih je po pregrešenju jednoga vnogo vumrlo, tak je vnogo bolje milošča božanska i dar vu milošči jednoga človeka, Ježuša Krištuša, vu vnogeh obiluvala.
- I ni kak po jednem greh, tak i dar ar sud zadnjič je iz jednoga pregrešenja na skvarjenje, milošča pako je iz vnogeh pregreških na opravičenje.
- Ar ako jednoga pregrešenjem smrt ladala je po jednem, vnogo bolje obilnost milošče i daruvanja i pravice prijemši, vu živlenju kraljuvali budu po jednem Ježušu Krištušu.
- Kak je anda po jednoga pregrešenju na vse ljudi smrt došla na skvarjenje, tak i po jednoga pravičnosti je na vse ljudi milošča došla na opravičenje živlenja.
- Ar kak po nepokornosti jednoga človeka grešniki postali su vnogi, tak i po pokornosti jednoga pravični postaneju vnogi.
- Zakon pako došel je vmes da bi obilneše postalo pregrešenje. Gde je pako obiluvalo pregrešenje, tam je jošče bolje obiluvala milošča.
- Da kak je kraljuval greh k smrti, tak naj takaj kraljuje milošča po pravici na žitek vekivečni, po Ježušu Krištušu, Gosponu našemu.
