Predgovor svetoga Lukača. Nazveščenje Ivanovoga i Ježuševoga prijetja. Sveta Devica pohađa Jalžabetu. Pesma Marije. Narođenje svetoga Ivana. Pesma Zakarijaševa.
- Pokehdob su si vnogi naprvo vzeli v red spraviti pripovedanje oneh stvarih koje se jesu med nami spunile,
- kak su nam izručili oni koji su od početka sami videli i službeniki reči bili,
- videlo se je i meni, koj sem vsa od početka skrbljivo zezvedel, po redu tebi popisati, predobri Teofiluš,
- da spoznaš istinitost oneh rečih vu kojeh si bil podvučen.
- Vu dnevih Herodeša, kralja Judeje, je bil nekoj aldovnik imenom Zakarijaš iz Abijaševoga reda, a njegva žena je bila zmed Aronoveh kčerih i ime nje je bilo Jalžabet.
- Bili su pako obodva pravični pred Bogom pokehdob su živeli poleg vseh zapovedih i običajih Gosponoveh prez krivnje
- i nesu imali deteta zato kajti je Jalžabeta bila neplodna i obodva su vre pri letih bili.
- Včinjeno je pako kad bi po redu svojega vremena aldovničku službu obnašal pred Bogom,
- poleg šege aldovničtva zapal ga je po sreči red da bi kadil kad bi nuter vu Cirkvu Gosponovu išel
- i vsa vnožina ljudstva je bila vani i molila ob vuri kadenja.
- Iskazal se je njemu pako angel Gosponov koj je stal zdesna kadilnoga oltara.
- I kad bi Zakarijaš bil videl angela, zmutil se je i obišel ga je strah.
- Angel pako reče njemu: „Ne boj se, Zakarijaš, ar je posluhnjena tvoja prošnja i tvoja žena Jalžabeta porodi tebi sina i budeš zval njegvo ime Ivan.
- I budeš imal radost i veselje i vnogi se budu nad njegvem narođenjem veselili
- ar bude velik pred Gosponom ter vina i opojnoga napitka ne bude pil i Svetem Duhom se napuni jošče vu vutrobi svoje matere.
- I vnoge zmed izraelskeh sinov obrne k Gosponu, njihovomu Bogu,
- i on pojde naprvo pred njim vu Duhu i moči Elijašovoj da obrne srca ocev k sinom, a nevernike na mudrost pravičneh i pripravi Gosponu zvršeno ljudstvo.“
- I reče Zakarijaš angelu: „Otkud ja to spoznam? Ar ja jesem star, a moja žena je vre pri letih.“
- I odgovori angel ter reče njemu: „Ja jesem Gabrijel koj stojim pred Bogom i poslan sem k tebi da ti ova povem i nazvestim.
- I, nut, ti budeš nem i ne budeš mogel govoriti tja do onoga dana vu kojem se ova dogodiju zato kajti nesi veruval mojem rečjam koje se spuniju ob svojem vremenu.“
- I ljudstvo je čakalo na Zakarijaša i čudilo se je da se on tak dugo mudi vu Cirkvi.
- Kad bi pako van bil izišel, ni mogel z njimi govoriti i spoznali su da je viđenje videl vu Cirkvi i on im je namigaval i ostal je nem.
- I včinjeno je da, kad bi se bili dnevi njegve službe spunili, odišel je vu svoju hižu.
- Za ovemi pako dnevi je Jalžabeta, njegva žena, zanosila i skrivala se je pet mesecov govoreča:
- „Da mi je tak včinil Gospon vu dnevih v kojeh me je prigledal da bi odnel moju sramotu med ljudmi.“
- Vu šestem pako mesecu poslan je bil angel Gabrijel od Boga vu varaš galilejanski kojemu je ime Nazaret,
- k Devici zaručenoj z človekom kojemu je bilo ime Jožef, iz Davidove hiže, a ime device Marija.
- I nuter stupivši angel k njoj reče: „Zdravo, milosti puna, Gospon je z tobum, blagoslovljena jesi ti med ženami!“
- Kad bi to ona bila čula, zmutila se je nad njegvem govorenjem i mislila kakvo bi to bilo pozdravlenje.
- I reče njoj angel: „Ne boj se, Marija, ar si našla milošču pri Bogu.
- Nut, prijela budeš vu vutrobi i porodiš sina i budeš njegvo ime zvala Ježuš.
- Ov bude velik i bude se zval Sin Višnjega i bude njemu Gospodin Bog dal stolicu Davida, njegvoga oca, i bude kraljuval vu hiži Jakopovoj naveke.
- I njegvomu kraljestvu ne bude konca.“
- Reče pako Marija angelu: „Kak to bude pokehdob muža ne spoznavam?“
- I odgovori angel i reče njoj: „Duh Sveti dojde zvrh tebe i krepost Višnjega opsenči tebe i zato ono sveto koje bude iz tebe rođeno zvalo se bude Sin Božji.
- I, nut, Jalžabeta, tvoja rođakina, i ona je zanosila sina vu svojoj starosti i ov mesec je šesti one koja se zove neplodna
- ar pri Bogu ne bude nemoguča nijedna reč.“
- Reče pako Marija: „Nut, službenica Gosponova, naj mi bude poleg reči tvoje!“ I odišel je od nje angel.
- Marija pako podigne se vu oneh dnevih i hitro odide na gore, vu varaš Jude
- i dojde nuter vu hižu Zakarijaša i pozdravi Jalžabetu.
- I dogodilo se je kak je začula Jalžabeta pozdravlenje Marije, genulo se je od radosti dete vu njejinoj vutrobi i Jalžabeta je bila napunjena z Svetem Duhom
- i skriknula je z velikem glasom i rekla: „Blagoslovljena jesi ti med ženami i blagoslovljen je sad tvoje vutrobe.
- I otkud je to meni da dohađa k meni mati mojega Gospona?
- Ar, nut, kak je včinjen glas tvojega pozdravlenja vu mojeh vuhah, genulo se je od radosti dete vu mojoj vutrobi.
- I blažena jesi ti koja si veruvala ar se spuniju vsa ona koja su tebi rečena od Gospona.“
- I reče Marija: „Moja duša izvišava Gospona
- i raduje moj Duh se vu Bogu, mojemu Zveličitelu.
- Kajti se je ogledal na poniznost svoje službenice ar, nut, od sada me blaženu ozoveju vsa pokolenja.
- Ar je včinil meni velika koj je mogučen i njegvo ime je sveto.
- On je milosrden od pokolenja do pokolenja onem koji se njega bojiju.
- Pokazal je mogučnost svoje ruke, raspršal je oholne vu misli svojega srca.
- Ishitel je mogučne iz stolice i izvisil ponizne.
- Gladne je napunil z dobri, a bogate je otpustil prazne.
- Vzel se je za Izraela, svojega slugu, spomenuvši se iz svoje milosrdnosti.
- Kak je govoril našem ocom, Abrahamu i njegvomu plemenu naveke.“
- Ostala je pako Marija pri njoj okolo tri mesece i povrnula se je nazad vu svoju hižu.
- Jalžabeti pako je se ispunilo vreme da bi rodila i porodila je sina.
- I čuli su susedi i njejini rođaki da je Gospon iskazal nad njum svoju milosrdnost i raduvali su se z njum.
- I včinjeno je osmi dan da su došli obrezavat dečareca i zvali su ga po imenu njegvoga oca Zakarijaš.
- Odgovori pako njegva mati i reče: „Ne tak, nego se Ivan bude zval!“
- I rečeju njoj: „Vendar nikoga ni vu tvojem rodu koj bi se zval ovem imenom!“
- Namegnuli su pako njegvomu ocu kak bi ga on hotel zvati.
- I isprosil si je pismenu tablicu i napisal je govoreči: „Ivan je njegvo ime.“ I vsi su se začudili.
- Otprla se pako jesu taki njegva vusta i rešil se je njegov jezik i on je pregovoril i blagoslavljal Boga.
- I obišel je strah vse njihove susede i po vseh bregih Judeje jesu se razglasile vse ove reči
- i vsi koji su je čuli, vzeli su si je vu svoje srce govoreči: „Gdo, štimaš, bude to dete?“ Ar je z njim bila ruka Gosponova.
- I Zakarijaš, njegov otec, je bil napunjen z Svetem Duhom i prorokuval je govoreči:
- „Blagoslovljen budi Gospodin Bog izraelski ar je pohodil i otkupil svoje ljudstvo
- i podignul je nam rog zveličenja vu hiži Davida, svojega sluge,
- kak je govoril po vustah svojeh sveteh prorokov, koji su bili od početka,
- da nas oslobodi od našeh neprijatelov i iz ruk vseh oneh koji nas odurjavaju,
- da iskaže milosrdnost našem ocem ter se spomene iz svojega svetoga Zakona,
- iz prisege koju je prisegel Abrahamu, našemu ocu, da nam dâ
- da mi, oslobođeni iz ruk našeh neprijatelov, njemu prez straha služimo,
- vu svetosti i pravičnosti pred njim vse dneve našega živlenja.
- I ti, dete, budeš se prorok Višnjega zval ar ti budeš pred licem Gospona naprvo hodilo da pripraviš njegve pute
- i daš spoznanje zveličenja njegvomu ljudstvu na otpuščanje njihoveh grehov.
- Po srčenoj milosrdnosti našega Boga vu kojoj je nas pohodil ishod iz visine
- da rasvetli one koji vu tmici i vu senci smrti sede i ravna naše noge na put mira.“
- Dete pako je raslo i objačuvalo se vu duhu i je bilo vu puščinah tja do onoga dneva vu kojem bi se pokazalo Izraelu.
