Narođenje Ježuša Krištuša koje se po angelu nazvešča pastirom. Ježuševo obrezavanje i alduvanje. Simeonovo proročanstvo. Jana proročica. Ježuš med navučiteli vu Cirkvi.
- Včinjeno je pako vu oneh dnevih da je izišla zapoved od Auguštuša cesara da bi se popisal ves svet.
- Ov popis prvi je bil včinjen po Cirinušu, sirijanskem poglavniku.
- I išli su vsi da bi se popisali, vsaki vu svoj varaš.
- Podignul se je pako i Jožef od Galileje, iz varaša Nazaret v Judeju, vu Davidov varaš koj se zove Betlehem, zato kajti je bil iz hiže i pokolenja Davidovoga,
- da bi se zapisal z Marijum, sebi zaručenum tovarušicum, koja je bila noseča.
- Dogodilo se je pako kad bi onde bila, spunili su se dnevi da bi rodila.
- I porodila je svojega prvorođenoga sina i povila ga je v plenice i položila ga je v jasle zato kajti nesu imali prostora vu oštariji.
- Bili su pako pastiri vu onem istem kotaru koji su skoznuvali i nočnu stražu držali nad svojum čredum.
- I, nut, angel Gosponov stane pred nje i svetlost Božja opstre nje i kruto se jako jesu zbojali.
- I reče njim angel: „Najte se bojati ar, nut, nazveščam vam veliko veselje koje bude vsemu ljudstvu
- ar se je vam danas vu Davidovomu varašu narodil Zveličitel koj je Krištuš Gospon.
- I ovo vam je znamenje: najdete dete v plenicah povito i položeno vu jasle.“
- I sproti je nastala z angelom vnožina nebeskoga šerega koji su hvalili Boga i govorili:
- „Dika Bogu na visini, a na Zemlji mir ljudem koji su dobre volje.“
- I včinjeno je kad bi od njih odišli angeli vu Nebesa, govorili su pastiri med sobum: „Prejdimo do Betlehema i poglejmo to dugovanje koje je včinjeno i koje nam Gospon je pokazal.“
- I došli su šetujuč i našli su Mariju i Jožefa i dete v jaslah položeno.
- Kad bi pako bili videli, onda su spoznali da je istinito kaj je njim bilo povedano od deteta.
- I vsi koji su čuli, čudili su se nad onemi koja se njim od pastirov jesu povedala.
- Marija pako je zadržala vse ove reči i nje premišljavala vu svojem srcu.
- I povrnuli su se pastiri i dičili i hvalili Boga vu vseh koja su čuli i videli, kak je njim bilo povedano.
- I poklamkam bi se bilo ispunilo osem dnevov da bi se obrezalo dete, zvano je bilo ime njegvo Ježuš, kak je bilo zvano od angela prvlje nego bi se bilo prijelo vu vutrobi.
- I poklamkam bi se bili spunili dnevi njejinega očiščavanja, primerom zapovedi Mojžeševe donesli su njega vu Jeruzalem da bi ga postavili pred Gospona,
- kak je pisano vu zapovedi Gosponovi da vsako muško koje prvič otpira vutrobu matere, naj bude Gosponu posvečeno.
- I da bi dali aldov primerom kak je rečeno vu zapovedi Gosponovi: dve grlice ali dva golubiče.
- I, nut, bil je nekoj človek vu Jeruzalemu imenom Simeon i ov človek je bil pravičen i bogaboječ i čakal je na oveselenje Izraela i Duh Sveti je bil vu njem.
- I bilo je njemu nazveščeno od Duha Svetoga da ne bude videl smrti doklam predi ne bude videl Gosponovoga Namazanoga.
- I dojde po nadehnenju Duha vu Cirkvu. I kad su detešce Ježuša njegvi roditeli nuter donesli, da bi včinili poleg običaja zapovedi za njega,
- onda je on njega prijel vu svoj naručaj i blagoslavljal Boga ter rekel:
- „Vezda otpuščaš, Gospone, slugu tvojega poleg reči tvoje vu miru
- ar su moje oči videle tvoje zveličenje
- koje si pripravil pred licem vsega ljudstva
- kakti kakvu svetlost na rasveščenje poganinov, a na diku tvojega puka izraelskoga.“
- I njegov otec i mati čudili su se nad onemi koja se jesu govorila od njega.
- I blagoslovil je nje Simeon i rekel je Mariji, materi njegvi: „Nut, ov je postavljen na porušenje i na gorestajanje vnogeh vu Izraelu i na znamenje kojemu se bude suproti govorilo
- i tvoju lastovitu dušu prebode meč da se očituju mišlenja iz vnogeh src.“
- I bila je nekakva proročica, Jana, kči Fanuelova, iz Azerovoga pokolenja, ova je veliku starost bila stignula i živela je z svojem mužom sedem let po svojem devojačtvu
- i ova je bila vdovica do osemdeset i četiri leta stara koja ni ishađala iz Cirkve i služila je Bogu z postom i molitvum dan i noč.
- I ova je onu istu vuru nadošla i hvalu davala Gosponu i od njega je govorila vsem koji su čakali na otkuplenje Izraela.
- I kak su vsa poleg Zakona Gosponovoga dovršili, povrnuli su se vu Galileju, vu svoj varaš Nazaret.
- Dete pako je raslo ter se je objačuvalo i bilo je puno mudrosti i milošča Božja je bila vu njem.
- I njegvi roditeli jesu hodili vsako leto vu Jeruzalem k svetečnomu vuzmenomu danu.
- I kad bi on bil postal dvanajst let star, išli su poleg navade gore vu Jeruzalem k svetečnomu danu.
- I po dovršeneh dnevih, kad bi se nazad bili povrnuli, zaostalo je dete Ježuš vu Jeruzalemu i njegvi roditeli nesu ga zgrešili.
- Kajti su pako štimali da se nahađa vu društvu, prešli su jeden dan puta i iziskavali su njega med rođaki i znanci.
- I kajti ga nesu našli, povrnuli su se vu Jeruzalem i iskali su njega.
- I dogodilo se je, za tremi dnevi našli su njega vu Cirkvi sedečega posred navučitelov koje on je poslušal i nje spitaval.
- Vsi pako koji su ga čuli, jesu se osupnuli nad razumnostjum i njegvemi odgovori.
- I kad bi ga bili zagledali, čudili su se. I njegva mati reče njemu: „Sinko, zakaj si nam tak včinil? Nut, tvoj otec i ja jesmo tebe z žalostjum iskali!“
- A on reče njim: „Kaj je da ste me iskali? Je li ne znate da je meni potrebno biti vu oneh koja su mojega Oca?“
- I oni nesu razmeli reč koju je njim govoril.
- I odišel je z njimi dole i došel je vu Nazaret i bil je njim podložen. I njegva mati je zadržala vse ove reči vu svojem srcu.
- I Ježuš je napreduval vu mudrosti, i vu dobi, i vu milošči pri Bogu i pri ljudih.
