Ivan nazvešča pokoru. Daje svedočanstvo od Krištuša i njega krsti. Rodoslov Ježuša Krištuša.
- Vu petnajstem pako letu cesarstva Tiberijuša cesara, kad bi Poncijuš Pilatuš ravnal Judeju, Herodeš četrtu stran Galileje, Filip pako, njegov brat, četrtu stran Itureje i trakonitanske države, a Lizanijaš četrtu stran Abiline,
- pod aldovničkemi poglavari Anašem i Kajfašem, včinjena je bila reč Gosponova zvrhu Ivana, Zakarijaševoga sina, vu puščini.
- I došel je vu ves jordanski kotar i prodekuval je krst pokore na otpuščanje grehov.
- Kak je pisano vu Knjigi govorenj Izajijaša proroka: „Glas kričečega vu puščini: ʻPripravljajte put Gosponov, ravne včinete njegve steze.
- Vsaka dolica naj se spuni i vsaki breg i brežanjek naj se ponizi i krivorjava naj postaneju ravna i škrabljava glatki puti.
- I vse človečanstvo bude videlo zveličenje Božje.ʼ“
- Rekel je anda vnožinam koje su ishađale da bi se od njega krstile: „Vi, kačje leglo, gdo vas je navčil bežati pred budučum srditostjum?
- Činete anda vreden sad pokore i ne podstupete se reči: ʻMi imamo Abrahama za oca.ʼ Ar velim vam da je Bog mogučen iz ovoga kamenja obuditi sine Abrahamu!
- Ar sekira je vre položena na korenje drevja. Vsako anda drevo koje ne doprinaša dober sad iseče se i vu ogenj se hiti.“
- I pitale su ga vnožine, govoreče: „Kaj anda moramo činiti?“
- On pako odgovori i reče njim: „Koj ima dve halje, naj da jednu onomu koj nikakve nima i koj ima jestvinu, naj ravno tak včini.“
- Došli su pako i publikanuši da bi se krstili i rekli su njemu: „Navučitel, kaj moramo včiniti?“
- A on reče njim: „Nikaj več ne potrebujte nego kaj vam je određeno.“
- Pitali su ga pako i vojniki, govoreči: „Kaj moramo i mi včiniti?“ I reče njim: „Nikoga ne zbijte, nikoga ne mrazite i zadovoljni budite z vašum plačum.“
- Pokehdob bi pako ljudstvo štimalo i vsi vu svojeh srcah mislili od Ivana, ne bi li on bil Krištuš,
- odgovori Ivan govoreči vsem: „Ja vas doisto krstim z vodum, ali dojde jakši od mene, kojemu ja nesem vreden odvezati remenje obutelji. On vas bude krstil vu Svetem Duhu i vu ognju.
- Kojega vejača je vu njegveh rukah i bude čistil svoje guvno i spravil pšenicu vu svoj škedenj, pleve pako bude zežgal z nevgasljivem ognjom.“
- Vnoga doisto i druga je on vučil i nazveščal ljudstvu.
- Herodeš pako, četrtostrančni oblasnik, pokehdob je bil od njega pokaran zaradi Herodijašice, njegvoga brata žene, i zaradi vseh zloč koje je včinil Herodeš,
- pridal je i to zvrhu vsega da je Ivana vu vuzu postavil.
- Dogodilo se je pako kada bi vse ljudstvo bilo krščeno da je bil i Ježuš krščen i kad je molil, otprlo se je nebo
- i Duh Sveti je v telovni spodobi kakti golub na njega dole došel i včinjen je glas iz neba: „Ti si moj ljubljeni sin, vu tebi se je meni dopalo.“
- I isti Ježuš je bil, kad je započel, okolo trideset let star i bil je držan za sina Jožefovoga, koj je bil sin Helijov, koj je bil sin Matatov,
- koj je bil sin Levijov, koj je bil sin Melkijov, koj je bil sin Jamov, koj je bil sin Jožefov,
- koj je bil sin Matatijov, koj je bil sin Amosov, koj je bil sin Nahumov, koj je bil sin Hezlijov, koj je bil sin Nageov,
- koj je bil sin Matatov, koj je bil sin Matatijov, koj je bil sin Semeov, koj je bil sin Jožefov, koj je bil sin Judašov,
- koj je bil sin Joamov, koj je bil sin Rezov, koj je bil sin Zorobabelov, koj je bil sin Salatijelov, koj je bil sin Nerijov,
- koj je bil sin Melkijov, koj je bil sin Adijov, koje je bil sin Kozanov, koj je bil sin Elmadanov, koj je bil sin Herov,
- koj je bil sin Ježušev, koj je bil sin Elijezerov, koj je bil sin Jorimov, koj je bil sin Matatov, koj je bil sin Levijov,
- koj je bil sin Simeonov, koj je bil sin Judašov, koj je bil sin Jožefov, koj je bil sin Jonašov, koj je bil sin Elijakimov,
- koj je bil sin Meleov, koj je bil sin Menov, koj je bil sin Matataov, koj je bil sin Natanov, koj je bil sin Davidov,
- koj je bil sin Jeseov, koj je bil sin Obedov, koj je bil sin Boozov, koj je bil sin Salmonov, koj je bil sin Nasonov,
- koj je bil sin Aminadabov, koj je bil sin Aramov, koj je bil sin Ezronov, koj je bil sin Farezov, koj je bil sin Judašov,
- koj je bil sin Jakopov, koj je bil sin Izakov, koj je bil sin Abrahamov, koj je bil sin Tareov, koj je bil sin Nakorov,
- koj je bil sin Sarugov, koj je bil sin Ragavov, koj je bil sin Falegov, koj je bil sin Heberov, koj je bil sin Saleov,
- koj je bil sin Kajinanov, koj je bil sin Arfaksadov, koj je bil sin Semov, koj je bil sin Noemov, koj je bil sin Lamekov,
- koj je bil sin Matuzalemov, koj je bil sin Henokov, koj je bil sin Jaredov, koj je bil sin Malaleelov, koj je bil sin Kajinanov,
- koj je bil sin Henosov, koj je bil sin Setov, koj je bil sin Adamov, koj je Božji.
