Ježuš posti vu puščini i onde se skušava, ide vu Nazaret i rastolnačuje od sebe včinjeno Izajijaševo proročanstvo zbog česa ga Nazarejanci iz brega dole hititi hočeju. Ide vu Kafarnaum, izganja vraga, ozdravlja punicu Petrovu i čini kajkakva druga čudočinstva.
- Ježuš pako pun Svetoga Duha povrnul se je od Jordana i bil je peljan od Duha vu puščinu.
- Tam je bil četrdeset dnevov i bil je skušavan od vraga. I vu oneh dnevih nikaj ni jel i kad bi se bili ovi dokončali, je zagladel.
- Rekel je pako njemu vrag: „Ako si Sin Božji, reči ovomu kamenu da kruhom postane.“
- A Ježuš je njemu odgovoril: „Pisano je da ne žive človek ob samem kruhu, nego ob vsakoj reči Božji.“
- I vrag je njega peljal na goru visoku i pokazal je njemu vsa kraljestva okrugljine zemeljske vu hipu vremena
- i reče njemu: „Tebi dam vsu ovu oblast i diku njihovu ar su meni predana i komu ja hoču, tomu je dam,
- ti anda ako se budeš vklanjal pred menum, vsa budu tvoja.“
- A Ježuš odgovori i reče njemu: „Pisano je: ʻGosponu, tvojemu Bogu, budeš se vklanjal i njemu samomu služil.ʼ“
- I peljal je njega vu Jeruzalem i postavil ga je na vrhunec Cirkve i rekel je njemu: „Ako si Sin Božji, spusti se otud dole!
- Ar je pisano da je zapovedal svojem angelom od tebe da te čuvaju
- i da te na rukah nosiju da morebiti ne vražiš na kamen tvoju nogu.“
- A Ježuš odgovori i veli njemu: „Rečeno je: ʻNe skušavaj Gospona, tvojega Boga!ʼ“
- I kad bi vrag bil dokončal vse skušavanje, odstupil je od njega za nekoj čas.
- I povrnul se je Ježuš vu kreposti Duha vu Galileju i razišel se je glas od njega po vsoj državi.
- I on je vučil vu njihoveh sinagogah i od vseh se je zvišaval.
- I došel je vu Nazaret, gde je bil othranjen, i išel je poleg svoje navade v sobotni dan nuter vu sinagogu i podignul se je da bi čtel Pismo.
- I bila je njemu dana knjiga Izajijaša proroka. I kak je otprl knjigu, našel je mesto gde je bilo pisano:
- „Duh Gosponov je zvrhu mene: zato je mene namazal i poslal mene nazveščat Evangelijum vbogem, ozdravljat koji su skrušenoga srca,
- sužnjem nazveščat otpuščenje i slepem viđenje, zlomljene otpustit proste, obznanjuvat prijetno leto Gosponovo i dan naplačenja.“
- I kad bi zasukal bil knjigu, dal je nju nazad dvorniku i vsel si je. I vseh oči vu sinagogi jesu bile vu njega vuprte.
- Počel je pako njim govoriti: „Denes se je ispunilo ovo pismo vu vašeh vuhih.“
- I vsi su njemu svedočanstvo davali i čudili su se nad milostivnemi rečmi koje su ishađale iz njegveh vust i rekli su: „Je li to ni Jožefov sin?“
- I reče njim: „To se razme, vi mi budete rekli ovu prispodobu: ʻVračitel, zvrači sam sebe!ʼ Kulika jesmo čuli včinjena vu Kafarnaumu, včini takaj ovde vu tvojoj domovini!“
- Reče pako: „Stanovito velim vam da nijeden prorok ni prijeten vu svojoj domovini.
- Vu istini velim vam: vnoge vdovice bile su vu dnevnih Elijaša vu Izraelu kad je bilo zaprto nebo tri leta i šest mesecov tak da je bil veliki glad nastal po vsoj zemlji
- ter vendar k nijednoj zmed njih ni bil poslan Elijaš, nego samo vu Sareptu Sidona k ženi vdovici.
- I za Elizejuša proroka bili su vu Izraelu vnogi gubavi i nigdo zmed njih ni bil očiščen nego Naaman Sirijanec.“
- I vsi vu sinagogi postali su puni srditosti kad bi ova bili čuli
- i podignuli su se i ishitili ga zvun varaša i vodili su ga na vrh gore na kojoj je bil zezidan njihov varaš da bi ga naglavce dole porinuli.
- On pako je oposred njih prek prešel i odišel.
- I išel je dole vu Kafarnaum, varaš Galileje, i onde je nje vučil po sobotah.
- I osupnuli su se nad njegvem navukom ar je bilo njegvo govorenje puno oblasti.
- I bil je vu sinagogi nekoj človek koj je imal nečistoga duha i iskriknul je velikem glasom
- govoreči: „Puščaj nas, kaj nam je z tobum, Ježuš Nazarenski? Je li si došel da nas pogubiš? Ja te poznam gdo si, Sveti Božji!“
- I pokaral ga je Ježuš govoreči: „Zanemi i izidi iz njega!“ I kad bi ga bil vrag dole hitil na sredinu, izišel je iz njega i nikaj mu ni naškodel.
- I vse je obišel strah i razgovarjali su se med sobum govoreči: „Kakva je to reč pokehdob z oblastjum i močjum zapoveda nečistem duhom i ishađaju?“
- I razišel se je glas od njega po vseh mestah države.
- Podignul se je pako Ježuš iz sinagoge i išel je vu Šimunovu hižu. Punica pako Šimunova je imala veliku zimljicu i prosili su ga za nju.
- I stane ober nje i zapove zimljici i ostavila je nju. I sproti se je stala i njim dvorila.
- Kad bi pako Sunce bilo zašlo, vsi koji su imali betežne z vsakojačkemi nevoljami, vodili su je k njemu. A on je na vsakoga zmed njih ruke gore stavljal i nje ozdravljal.
- Ishađali su pako vragi iz vnogeh kričeči i govoreči: „Ti si Sin Božji!“ I grozil se je njim i ni im pustil govoriti ar su znali da je on Krištuš.
- Kad bi pako bil nastal dan, odišel je v pusto mesto i vnožine jesu ga iziskavale i došle su tja do njega i zdržavale su ga da ne bi od njih odišel.
- On pako je njim rekel: „Ja moram i drugem varašem nazveščati Kraljestvo Božje ar sem zato poslan.“
- I prodekuval je vu sinagogah galilejanskeh.
