Ježuš vu Petrovi lađi. Petrova rib lovina. Zvračenje nekojega gubavoga i gutum vudrenoga. Matejevo pozvanje. Ježuš zagovarja svoje vučenike zbog postov.
- Dogodilo se je pako kad bi ljudstvo navalilo na njega da bi poslušalo reč Božju i on bil stal pri jezeru Genezaret,
- zagledal je dve ladje kraj jezera stati, ribiči pako bili su izišli i prepirali mreže.
- I stupi vu jednu zmed ladjih koja je bila Šimunova i prosi ga da bi nekuliko od zemlje otisnul. I sel si je i navučal je ljudstvo iz ladje.
- Kad bi pako bil prestal govoriti, reče Šimunu: „Peljaj na gljublinu i rasprestrete vaše mreže na lovinu.“
- I odgovori Šimun i reče njemu: „Navučitel, celu noč jesmo delali i nikaj nesmo vlovili, ali na tvoju reč rasprestrem mreže.“
- I kad bi to bili včinili, zavjeli su obilnu vnožinu rib, tak da se je trgala njihova mreža.
- I namegnuli su pajdašem koji su bili vu drugoj ladji da bi došli ter njim pomogli. I došli su i napunili su obodve ladjice tak da bi se skoro vtapljale.
- Kaj kad bi videl Šimun Peter, opade pred Ježuševe noge govoreči: „Hodi od mene, Gospone, ar sem ja grešen človek.“
- Ar je obišla osupnjenost njega i vse koji su z njim bili nad ribami koje su bili zavjeli.
- Spodobno takaj Jakopa i Januša, sine Zebedejuševe, koji su bili Šimunovi pajdaši. I reče Ježuš Šimunu: „Ne boj se, od vezda vre budeš ljudi lovil.“
- I kad bi ladje k zemlji bili privlekli, ostavili su vsa i nasleduvali njega.
- I dogodilo se kad je vu jednem zmed varašev bil, i, nut, onde je bil nekoj človek pun gube. I kad bi videl bil Ježuša, opade na lice i prosi njega govoreči: „Gospone, ako hočeš, moreš me očistiti.“
- A on pretegne ruku, dotekne se njega i reče: „Hoču, budi očiščen!“ I sproti je guba odišla od njega.
- I on je zapovedal njemu da ne bi nikomu povedal: „Nego hodi, pokaži se aldovniku i alduj za tvoje očiščenje, kak je zapovedal Mojžeš, njim na svedočanstvo.“
- Razišel se je pako glas od njega jošče bolje i skup shađala se je vnožina da bi ga poslušala i da bi se zvračila od svojeh betegov.
- On pako je odišel vu puščinu i molil je Boga.
- I dogodilo se je na nekoj dan da je on sedel i vučil. I sedeli su tam takaj farizejuši i Zakona navučiteli koji su došli iz vseh vesih Galileje, Judeje i iz Jeruzalema i moč Gosponova je bila za nje zvračiti.
- I, nut, doneseju ljudi na postelji nekojega človeka koj je bil gutum vudren i iskali su kak bi ga mogli nuter zanesti i pred njega deti.
- I kajti oni pred vnožinum ljudstva nesu našli od koje strani bi njega nuter zanesli, izišli su na krov i čez črepovje spustili su njega z posteljum na sredinu pred Ježuša.
- Kojeh veru kad bi on bil videl, reče: „Človek, otpuščaju se tebi grehi tvoji!“
- I počeli su misliti pisci i farizejuši govoreči: „Gdo je ov koj govori blaznosti? Gdo more otpuščati grehe, nego sam Bog?“
- Kad bi pako bil spoznal Ježuš njihova mišlenja, odgovori i reče njim: „Kaj mislite vu vašeh srcah?
- Kaj je lekše reči: ʻOtpuščaju se tebi grehi tvojiʼ, ali reči: ʻStani se i hodiʼ?
- Da pako znate da Sin Človečji ima oblast na Zemlji otpuščati grehe“, (reče gutum vudrenomu), „Tebi velim: ʻStani se, vzemi tvoju postelju i hodi vu tvoju hižu.ʼ“
- I sproti se je pred njimi gore stal, odnesel postelju na kojoj je ležal i odišel je vu svoju hižu velikodičeč Boga.
- I osupnenje je vse prevzelo i velikodičili su Boga. I napunili su se z strahom govoreči: „Mi smo denes čudnovita dugovanja videli!“
27. Zatem je izišel i zagledal nekojega publikanuša imenom Levi, sedečega na malti, i reče njemu: „Nasleduj mene!“ - I on se je stal, vsa ostavil i njega nasleduval.
- I pripravil mu je Levi veliko goščenje vu svojoj hiži i bila je velika vnožina publikanušev i drugeh koji su z njimi pri stolu sedeli.
- I morguvali su njihovi pisci i farizejuši i rekli su njegvem vučenikom: „Zakaj s publikanuši i grešniki jete i pijete?“
- A Ježuš odgovori i reče njim: „Oni koji su zdravi, ne potrebuju vučitela, nego oni koji su betežni.
- Ja nesem došel zvat na pokoru pravične, nego grešnike.“
- A oni su rekli njemu: „Zakaj Ivanovi vučeniki gusto postiju i moliju, ravno tak takaj farizejuški vučeniki, a tvoji jeju i piju?“
- On pako reče njim: „Je li morete včiniti da bi svati postili dok je z njimi zaručnik?
- Dojdu pako dnevi kad se zaručnik od njih proč vzeme, onda se budu postili vu oneh dnevih.“
- Povedal im je pako takaj priliku: „Nigdo ne meče od nove oprave krpu na staru opravu, drugač i novu razdere i staroj ne pristoji se krpa od nove.
- I nigdo ne vleva novo vino vu stare mešine, drugač rastrga novo vino mešine i ono scuri i mešine pod nikaj prejdu.
- Nego novo vino mora se v nove mešine vlejati i obodvoje se opčuva.
- I nigdo koj staro vino pije, ne potrebuje mahom novo ar veli: ʻTo staro je boljše.ʼ“
