Ježuš ispričava svoje vučenike koji v sobotu lati trgaju, vrači v sobotu, izbere dvanajst apoštolov, brežno prodečtvo.
- Dogodilo se je vu drugoj soboti po prvoj da bi čez strn prehađal, njegvi pako vučeniki trgali su lati, nje med rukami zruljili i jeli.
- Nekoji pako zmed farizejušev rekli su njim: „Zakaj činite kaj ni slobodno včiniti v sobotu?“
- I Ježuš odgovori i reče njim: „Niti to neste čteli kaj je včinil David kad bi gladen bil on i oni koji su z njim bili?
- Kak je bil zašel vu Božju hižu i kruhe naprvostavlanja vzel ter jel i dal onem koji su z njim bili, koje vendar nikomu ni slobodno jesti, nego samem aldovnikom.“
- I reče njim: „Sin Človečji je takaj sobote gospon.“
- Dogodilo se je pako da je i drugu sobotu vu sinagogu išel i vučil. I onde je bil nekoj človek kojega desna ruka je bila vsehnjena.
- Pazili su pako pisci i farizejuši je li bude v sobotu vračil da bi kaj našli zbog česa ga bi tužili.
- On pako je znal njihova mišlenja i reče človeku koj je imal vsehnjenu ruku: „Stani se i postavi se na sredinu.“ I on se je stal i tam postavil.
- Ježuš pako reče njim: „Ja vas pitam je li slobodno v sobotu dobro činiti ali zlo? Živlenje obdržati ali pogubiti?“
- I on nje vse naokolo pogleda i reče človeku: „Pretegni tvu ruku!“ I on ju je pretegnul i njegva ruka je zdrava postala.
- Oni su pako čisto iz pameti bili izišli i dogovarjali su se med sobum kaj bi včinili Ježušu.
- Včinjeno je pako vu oneh dnevih, izišel je na breg molit i sprevodil je vsu noč vu molenju Boga.
- I kad bi dan bil nastal, dozval je svoje vučenike i zmed njih je izebral dvanajst (koje je takaj apoštole imenuval):
- Šimuna, kojega je ozval Petrom, i Andraša, njegvoga brata, Jakopa i Januša, Filipa i Bartola,
- Mateja i Tomaša, Jakopa, Alfejuševoga sina, i Šimuna koj se zove Tekmec,
- i Judaša, Jakopovoga brata, i Judaša Iškarioteša koj je bil izdavec.
- I kad bi z njimi bil dole izišel, stane na ravnici gde je bil šereg njegveh vučenikov i velika vnožina ljudstva iz cele Judeje i Jeruzalema i od morja i Tiruša i Sidona,
- koji su došli da bi ga poslušali i zvračili se od svojeh betegov. I oni koji su se trapili od nečisteh duhov jesu bili zvračeni.
- I vsa vnožina je iskala priliku njega se doteknuti ar je iz njega moč ishađala i vse je zvračila.
- I on podigne svoje oči na svoje vučenike i reče: „Blaženi jeste vi siromaki ar je vaše Kraljestvo Božje.
- Blaženi jeste vi koji vezda gladujete ar se zasitite. Blaženi jeste vi koji se vezda plačete ar se budete smejali.
- Blaženi budete kada vas budu ljudi odurjavali i kada vas budu razdružuvali i pšanili i vaše ime kakti zločesto ishitavali zaradi Sina Človečjega.
- Veselete su vu onem dnevu i radujte se ar, nut, vaš najem je obilen vu Nebesih ar su ravno tak njihovi oci včinili prorokom.
- Ništar manje, jaj vam, bogatuši, ar imate vaše obraduvanje.
- Jaj vam, koji ste zasičeni ar budete gladuvali. Jaj vam, koji se vezda smejete ar budete tuguvali i plakali se!
- Jaj vam, kada vas ljudi budu hvalili ar su ravno tak njihovi oci včinili krivem prorokom.
- Ali ja velim vam koji me poslušate: ljubete vaše neprijatele, dobro činete onem koji vas odurjavaju.
- Blagoslavljajte one koji vas preklinjaju i molete za one koji vas opšanuju.
- I koj te vudri na jedno lice, podeni mu i drugo. I onomu koj ti jemlje plašč, ne brani mu takaj halje.
- Vsakomu pako koj te prosi, daj, a od onoga koj odnaša koja su tvoja, ne potrebuj nazad.
- I kak hočete naj vam čine ljudi, ravno tak i vi njim včinete.
- I ako ljubite one koji vas ljubiju, kakva vam milošča bude? Ar i grešniki ljubiju one od kojeh se oni ljubiju.
- I ako dobro činite onem koji vam dobro činiju, kakva milošča vam bude? Pokehdob i grešniki to isto činiju.
- I ako posuđujete onem od kojeh se ufate nazad dobiti, kakva milošča vam bude? Ar i grešniki posuđuju grešnikom da jednaka nazad dobe.
- Nego, ljubete vaše neprijatele, dobro činete i posuđujte kad se nikaj nazad ne ufate i vaš najem bude velik i budete sini Višnjega ar je on dobrotiven zvrhu nezahvalneh i zločesteh.
- Budite anda milosrdni kak je i vaš Otec milosrden.
- Najte suditi i ne budete suđeni, najte pogubljuvati i ne budete pogubljeni. Otpustete i otpusti se vam.
- Dajte i podelji se vam: dobru, nagnjetenu, skup strešenu i preobilnu meru budu dali vu vaš naručaj. Ar z onum istum merum z kojum vi budete merili, bude se vam nazad merilo.“
- Povedal im je pako takaj priliku: „Je li more slepec slepca voditi? Ne li da obodva vu jamu opadeju?
- Vučenik neje zvrhu meštra, vsaki pako bude zvršen ako bude kak je njegov mešter.
- Kaj pako glediš na skalicu vu oku tvojega brata, a brvna koje je vu tvojem lastovitem oku ne opažuješ?
- Ali kak moreš reči bratu tvojemu: ʻBrate, pusti da ispuknem skalicu iz tvojega okaʼ, pokehdob si sam vu tvojem oku brvna ne vidiš? Skazlivec, ishiti prvič brvno iz tvojega oka i onda gledaj da iznemeš skalicu iz oka tvojega brata.
- Ar ono drevo ni dobro koje zločest sad rodi niti ni zločesto drevo koje rodi dober sad.
- Ar se vsako drevo spoznaje iz svojega sada ar niti iz trnja ne bereju smokve niti iz šipka ne trgaju grozdje.
- Dober človek iz dobroga kinča svojega srca doprinaša dobro, a zločest človek iz zločestoga kinča doprinaša zlo. Ar iz obilnosti srca govoriju vusta.
- Pak kaj me zovete: ʻGospone, Gosponeʼ, a ne včinite kaj velim?
- Vsaki koj k meni dohađa i posluša moja govorenja ter nje zvršava, pokažem vam komu je spodoben.
- Spodoben je človeku zidajučemu hižu koj je gliboko kopal i postavil temelj zvrhu pečine, kad je pako nastala povodnja, vuprla se je voda vu hižu i ni ju mogla genuti ar je bila vtemeljena zvrhu pečine.
- Koj pako posluša i ne včini, spodoben je človeku koj je svoju hižu zezidal na zemlji prez temelja, vu koju se je vuprla voda i mahom je opala i podrtina one hiže je velika postala.“
