Ježuš ozdravlja stotničkoga slugu i obuđuje sina nekoje vdovice iz Najima. Ivan pošilja k Ježušu dva zmed svojeh vučenikov. Ježuš čini vnoga čuda i daje Ivanu svedočanstvo. Nekoja grešnica maže njegve noge.
- Poklamkam pako bi vse svoje reči bil dokončal pred ljudstvom, išel je nuter vu Kafarnaum.
- Sluga pako nekojega stotnika, koj je njemu kruto drag bil, ležal je betežen na smrt.
- I kad bi od Ježuša bil čul, poslal je k njemu starešine Židovov i prosil njega da bi došel i zvračil njegvoga slugu.
- Oni pako, kad bi k Ježušu bili došli, prosili su ga kruto jako govoreči njemu: „On je vreden da mu to včiniš
- ar ljubi naš narod i on je nam zezidal sinagogu.“
- Ježuš je pako z njimi išel. I kad vre ne bi daleko bil od hiže, pošlje stotnik k njemu prijatele govoreči: „Gospone, ne trudi se ar nesem vreden da dojdeš pod moj krov.
- Zbog česa takaj nesem samoga sebe za vrednoga držal da bi k tebi došel, nego reci rečjum i ozdrave moj dečak.
- Ar sem i ja človek pod oblastjum postavljen i imam pod sobum vojnike ter rečem ovomu: ʻPojdi!ʼ i ide, i drugomu: ʻDojdi!ʼ i dojde, i mojemu slugi: ʻVčini to!ʼ i včini.“
- Kaj kad bi Ježuš bil čul, čudil se je i obrnuvši se reče vnožini koja ga je nasleduvala: „Stanovito velim vam: niti vu Izraelu nesem tulike vere našel.“
- I kad bi se oni koji su bili poslani domom bili povrnuli, našli su zdravoga slugu koj je bil betežen.
- I včinjeno je zatem da je išel vu varaš koj se zove Najim i z njim su išli njegvi vučeniki i velika vnožina ljudih.
- Kad bi se pako bil približaval k vratam varaša, nut, znašan je bil nekoj mrtvec koj je bil jedini sin svoje matere koja je bila vdovica i z njum je išla vnožina ljudstva iz varaša.
- I kad bi nju bil zagledal Gospon, od milosrdnosti genul se je nad njum i reče njoj: „Ne plači se!“
- I pristupi i tekne se lesa. (Oni pako koji su ga nosili, jesu postali.) I reče: „Mladenec, tebi velim: stani se!“
- I podignul se je mrtvec i počel govoriti. I dal je njega njegvoj materi.
- Obišel je pako vse strah i velikodičili su Boga govoreči: „Podignul se je med nami velik prorok“ i: „Bog je pohodil svoje ljudstvo.“
- I razišel se je ov glas od njega po vsoj Judeji i po vsoj državi naokol.
- I obznanili su Ivanu njegvi vučeniki vsa ova.
- I Ivan pozove k sebi dva zmed svojeh vučenikov i pošlje nje k Ježušu govoreči: „Ti li si koj dojti imaš, ali drugoga čakamo?“
- Kad bi pako bili ljudi k njemu došli, rekli su: „Ivan Krstitel je nas k tebi poslal govoreči: ʻTi li si koj dojti imaš, ali drugoga čakamo?ʼ“
- (Onu istu vuru pako je vnoge zvračil od betegov i ran i zeleh duhov i vnogem slepem je daruval vid.)
- I odgovori i reče njim: „Hote, nazvestete Ivanu koja ste čuli i videli: da slepi pregledavaju, hromi hodiju, gubavi se očiščuju, gluhi čuju, mrtvi se gore staju, siromakom se Evangelijum nazvešča
- i blažen je koj se goder vu meni ne spači!“
- I kad bi posleniki Ivanovi bili odišli, počel je vnožinom od Ivana govoriti: „Kaj ste izišli vu puščinu gledat? Trstiku koja se od vetra sim pak tam giblje?
- Ali kaj ste izišli videt? Človeka z mehkemi opravami oblečenoga? Nut, koji su vu drageh opravah i koji živeju vu nasladnostjah, jesu vu kraljevskeh hižah.
- Ali kaj ste izišli videt? Proroka? Zaisto velim vam: i više nego proroka.
- Ov je od kojega je pisano: ʻNut, ja pošiljam mojega angela pred tvojem licem, koj pripravi tvoj put pred tobum.ʼ
- Ar velim vam: med onemi koji su od žen rođeni, ni nijeden vekši prorok nego je Ivan Krstitel. Koj je pako vu Kraljestvu Božjem najmenjši, je vendar vekši nego je on.“
- I vse ljudstvo koje je čulo i publikanuši jesu opravičuvali Boga i dali su se krstiti z Ivanovem krstom.
- Farizejuši pako i pravdoznanci jesu zavrgli tolnač Božji na svû lastovitu škodu i nesu dali od njega krstiti.
- Reče pako Gospon: „Komu anda prispodobim ljudi ovoga pokolenja? I komu su spodobni?
- Spodobni jesu deci koja sede na trgu i med sobum govore i vele: ʻMi smo vam na piščale igrali i neste plesali, mi smo narekuvali i neste se plakali.ʼ
- Ar je došel Ivan Krstitel i ni jel kruha niti pil vina, pak velite: ʻOn ima vraga.ʼ
- Došel je Sin Človečji, on jê i pije, pak velite: ʻNut, ov človek je ožeruh i pijanac, prijatel publikanušev i grešnikov.ʼ
- I opravičena je mudrost od vse svoje dece.“
- Prosil ga je pako nekoj zmed farizejušev da bi z njim jel. I stupi nuter vu hižu farizejuša i sede si k stolu.
- I, nut, nekoja žena, koja je bila vu varašu grešnica, kak je zeznala da je sel k stolu vu farizejuševoj hiži, donesla je alabastrenu posudu drage maste
- i stane odzad k njegvem nogam i počme njegve noge z suzami polevati, a z lasmi svoje glave je brisala i kušuvala njegve noge i z mastjum mazala.
- Kad bi pako to bil videl farizejuš koj ga je pozval, reče vu sebi govoreči: „Ov da bi bil prorok, zaisto bi znal koja i kakva je to žena koja se njega dotikava ar je grešnica.“
- I odgovori Ježuš i reče njemu: „Šimun, imam ti nekaj povedati.“ A on reče: „Mešter, poveđ!“
- „Nekoj posudbenik je imal dva dužnika: jeden mu je bil dužen petsto denjarov, a drugi pedeset.
- Pokehdob pako ne bi imali otkud bi vrnuli, je dug obodvem prikazal. Koj anda njega više ljubi?“
- Odgovori Šimun i reče: „Sudim da on kojemu je više prikazal.“ A on reče njemu: „Prav si sudil!“
- I obrne se k ženi i reče Šimunu: „Vidiš li ovu ženu? Zašel sem vu tvoju hižu i nesi mi dal vodu za moje noge, ova pako je z suzami polevala moje noge i z svojemi lasmi brisala.
- Kušec mi nesi dal, ova pako otkad je nuter došla, ni prestala mojeh nog kušuvati.
- Z oljem nesi namazal moju glavu, ova je pako z maščum mazala moje noge.
- Zato velim tebi: otpuščaju se njoj vnogi grehi pokehdob da je vnogo ljubila. Komu se pako menje otpušča, menje ljubi.“
- Reče pako njoj: „Otpuščaju se tebi grehi!“
- I oni koji su pri stolu skupa sedeli počeli su vu sebi govoriti: „Gdo je ov koj takaj grehe otpušča?“
- Reče pako ženi: „Tvoja vera je tebi pomogla! Hodi vu miru!“
