Pobožne žene sprevađaju Ježuša i skrbe se za njegovo zdržavanje. Prilika od semena i sejača. Rođaki Ježuševi. Vtišuje viher, oslobađa nekojega z vragom opseđenoga, zvrači nekoju krvotočnu ženu i obuđuje od mrtveh Jajirovu kčer.
- I včinjeno je zatem da je on po varaših i vesih putuval, prodekuval i Kraljestvo Božje nazveščal i oni dvanajst jesu bili z njim
- i nekoje žene koje su bile zvračene od hudeh duhov i betegov: Marija koja se zove Magdalena, iz koje je sedem vragov izišlo,
- i Joana Kuzova, žena Herodešovoga dvorskoga, i Suzana i vnoge druge koje su njemu z svojem imetkom služile.
- Kad bi se pako velika vnožina ljudstva skup spravila ter iz varašev k njemu hitreli, reče vu priliki:
- „Izišel je sejač sejat svoje seme i vu sejanju je nekoje opalo poleg puta i je potlačeno i ptice nebeske jesu nje pozobale.
- I drugo je opalo na pečinu i kad bi bilo niknulo, je posehnulo ar ni imalo vlage.
- I drugo je opalo med trnje i trnje koje je z njim skupa zraslo je nje zadušilo.
- I drugo je opalo vu dobru zemlju i izišlo je ter je doprineslo stovrsnoga sada.“ Ova kad bi govoril, je kričal: „Koj ima vuha na poslušanje, naj posluša!“
- Pitali su ga pako njegovi vučeniki: „Kaj znamenuje ta prilika?“
- On pako reče njim: „Vam je dano znati skrovnosti Kraljestva nebeskoga, ostalem pako vu prilikah da oni akoprem glediju, vendar ne vidiju i akoprem čuju, vendar ne razmeju.
- Ova pako prilika to znamenuje: seme je reč Božja.
- Koji su pako poleg puta, jesu oni koji ju poslušaju, zatem nadojde vrag i vzeme reč iz njihovoga srca da ne bi veruvali ter se zveličili.
- A koji na pečini, jesu oni koji kad reč čuju, nju z veseljem prijemlju, ali ovi korenja nemaju, oni do časa veruju i vu vremenu skušavanja odstupljuju.
- Koje je pako v trnje opalo, jesu oni koji su reč posluhnuli, ali od skrbih i bogatstva i nasladnostih živlenja vu koje se povdavaju zadušuju se ter ne donašaju sada.
- Koje je pako vu dobru zemlju opalo, jesu oni koji reč poslušaju ter nju obdržiju z dobrovoljnem i najboljšem srcem i sad donašaju vu trpljivnosti.
- Nigdo pako vužganu svetnicu ne pokriva z posudum niti ju ne meče pod postelju, nego ju postavlja na svečnjak da oni koji dohađaju vu hižu, vidiju svetlost.
- Ar nikaj ni tak otajnoga kaj se ne bi očituvalo niti nikaj ni tak skritoga kaj se ne bi spoznalo i na očivesnost došlo.
- Pazete anda kak poslušate ar koj ima, njemu se da, a koj goder nema i kaj štima da ima, vzeme se od njega.“
- Došli su pako k njemu mati i njegvi brati i nesu mogli do njega dojti pred vnožinum ljudstva.
- I bilo je njemu oglašeno: „Tvoja mati i tvoji brati stoje vani i hočeju te videti.“
- On pako odgovori i reče njim: „Moja mati i moji brati jesu oni koji reč Božju poslušaju i nju zvršavaju.“
- Včinjeno je pako vu nekojem dnevu da je on stupil vu ladjicu i njegvi vučeniki i reče njim: „Prepeljajmo se na onu stran jezerišča!“ I stupili su nuter.
- Kad bi se pako bil peljal, je zaspal i nadošel je na jezerišče kruto silni viher i zalevali su se i pogibali.
- I pristupili su i zbudili njega govoreči: „Navučitel, pogibljemo!“ I on se stane, zagrozi se vetru i stočnoj vodi i henjali su i postala je tišina.
- Njim pako reče: „Gde je vaša vera?“ Oni se pako jesu bojali i čudili med sobum govoreči: „Gdo, štimaš, je ov da on takaj vetrom i morju zapoveda i jesu mu pokorna?“
- I prepeljali su se v državu Gerazencov koja je naproti Galileje.
- I kad bi na zemlju bil izišel, dojde njemu naproti nekoj človek koj je vre dugo vremena vu sebi imal vraga i oprave ni oblačil niti ni vu hiži ostajal, nego vu pokopališčah.
- Ov, kak je zapazil Ježuša, opadne pred njega i iskrikne z velikem glasom i reče: „Kaj je meni z tobum, Ježuš, sin višnjega Boga? Prosim te, ne muči me.“
- Ar je nečistomu duhu zapovedal da bi izišel iz človeka ar je vnogo vremena tomu bilo kak ga je popal i bil je vezan z lanci i vu železneh putah čuvan, ali on je rastrgal vezila i bil je od vraga gonjen vu puščine.
- Pital ga je pako Ježuš govoreči: „Kak ti je ime?“ A on reče: „Legio“, kajti je bilo vnogo vragov vu njega vleznulo.
- I prosili su ga da im ne bi zapovedal vu prepast iti.
- Bila je pako onde velika čreda svinj koje se jesu pasle na bregu i prosili su ga da bi im dopustil vu nje vlesti. I dopustil je njim.
- Izišli su anda vragi iz človeka i vleznuli su vu svinje i z silum se je čreda čez strmec prekopitila vu jezerišče i podušila se je.
- Kad su videli pastiri kaj je bilo včinjeno, pobegnuli su i razglašuvali su to po varašah i po selih.
- Izišli pako gledat kaj se je dogodilo i došli su k Ježušu i našli su človeka iz kojega su bili vragi izišli da je oblečen i zdrave pameti sedel pri nogah Ježuševeh i bojali su se.
- Oni pako koji su videli, pripovedali su njim kak je bil zvračen od legijona.
- I prosila ga je vsa vnožina ljudstva države Gerazencov da bi od njih odišel ar je nje bil velik strah obišel. On pako je stupil vu ladju ter se je povrnul.
- I prosil ga je on človek iz kojega su vragi izišli da bi on pri njem ostal. Ježuš ga pako je od sebe otpustil govoreči:
- „Povrni se vu tvoju hižu i pripovedaj kulika ti je včinil Bog.“ I odišel je i je nazveščal po celem varašu kulika je njemu včinil Ježuš.
- Včinjeno je pako kad bi se bil povrnul Ježuš, prijela ga je vnožina. Ar su vsi na njega čakali.
- I, nut, dojde nekoj človek kojemu je bilo ime Jajiruš i on je bil poglavar sinagoge i opadne pred Ježuševe noge i prosi njega da bi vu njegvu hižu išel
- ar je imal jedinu kčer okolo dvanajst let staru i ova je vmirala. I dogodilo se je kad bi išel da ga je ljudstvo stiskalo.
- I nekoja žena koja je vre dvanajst let krvni otok trpela i ves svoj imetek vračitelom zdavala, niti se od nijednoga ni mogla zvračiti,
- pristupi odzada i dotekne se kraja njegve oprave i sproti se je vstavil njejin krvni otok.
- I reče Ježuš: „Gdo me se je doteknul?“ Pokehdob su pako vsi tajili, reče Peter i oni koji su z njim bili: „Navučitel, vnožine te stiščeju i rivaju, pak veliš: ʻGdo me se je doteknul?ʼ“
- A Ježuš reče: „Negdo me se je doteknul ar sem spoznal da je od mene krepost izišla.“
- Pokehdob bi pako žena bila videla da se nemre skriti, trepetajuč dojde i opade pred njegve noge i očituje zrok zbog kojega se je njega doteknula i kak je sproti zdrava postala.
- A on reče njoj: „Kči, tvoja vera je tebe zdravu včinila! Hodi vu miru!“
- Doklam bi on jošče govoril, dojde nekoj k poglavaru sinagoge i reče: „Kči tvoja je vumrla, naj ga truditi!“
- Ježuš pako, koj je bil čul te reče, odgovori ocu dekljičke: „Ne boj se, samo veruj i ona bude oživela.“
- I kad bi vu hižu bil došel, nikoga ni puščal z sobum nuter iti nego Petra i Jakopa i Januša i oca i mater dekljičke.
- Vsi pako jesu se plakali i nju narekuvali. On pako reče: „Ne plačite se, dekljička ni vumrla, nego spi.“
- I osmehavali su njega ar su znali da je bila vumrla.
- On ju pako prime za ruku i skrikne govoreči: „Dekljička, stani se!“
- I njejin duh se je povrnul i sproti se je stala. I zapovedal je njoj jesti dati.
- I osupnuli su se njejini roditeli, on pako je njim zapovedal da ne bi nikomu povedali kaj se je dogodilo.
