Ježuš opomina na pokoru, k čemu mu je dvojvrsni dogođaj priliku dal, zatem naprvo stavlja priliku od figovoga dreva. Ozdravlenje nekoje sklučene žene v sobotu. Prilika od muštardovoga zrna i od kvasa. Vuska vrata. Herodeš, lisica. Narekuvanje nad skončanjem Jeruzalema.
- Bili su pako ono isto vreme nekoji onde koji su mu obznanili od Galilejancev koje je dal Pilatuš poražati ravno onda kad su alduvali.
- I odgovori i reče njim: „Štimate li da su ovi Galilejanci zmed vseh Galilejancov najvekši grešniki bili kajti su tuliko pretrpeli?
- Nesu, velim vam, nego ako ne budete pokoru včinili, vsi ravno tak poginete.
- Ali štimate li da su oni osemnajst zvrhu kojeh se je zrušila kula vu Siloje ter nje vubila takaj vekši krivci bili nego vsi ljudi koji su stanuvali vu Jeruzalemu?
- Nesu, velim vam, nego ako ne budete pokoru včinili, vsi ravno tak poginete.“
- Rekel je pako i ovu priliku: „Imel je nekoj figovo drevo zasađeno vu svojem vinogradu i došel je na njem sad iskat i ni našel.
- Reče pako goričaru: ʻNut, vre tri leta jesu otkad dohađam sad iskati na ovoj figi i ne nahađam ga: podseci ju anda ar k čemu zavjimlje zemlju?ʼ
- A on odgovori i reče njemu: ʻPuščaj ju jošče ovo leto doklam ju okopam i zagnjojim.
- Morebiti da doprinese sada, ako pak ne, buduč ju podseci.ʼ“
- I vučil je vu njihovi sinagogi ob sobotah
- i, nut, je bila nekoja žena koja je duha nevolje osemnajst let imala i bila je sklučena i nikak ni mogla gore pogledati.
- Koju kad bi videl Ježuš, pozval je nju k sebi i reče njoj: „Žena, ti si od tvojega betega oslobođena!“
- I postavil je na nju ruke i sproti se je osovila i dičila Boga.
- Odgovori pako sinagoge poglavar koj se je razljutil da je Ježuš v sobotu vračil i reče ljudstvu: „Šest danov je vu kojeh se mora delati, vu oveh anda dohađajte i dajte se vračiti, a ne vu sobotni dan.“
- Odgovori pako njemu Gospon i reče: „Vi skazlivci, je li vsaki zmed vas vu sobotu ne odvežuje svojega vola ali osla od jaslih ter ga vodi napajat?
- Ovu pako Abrahamovu kčer, koju je Šatan, nut, čez osemnajst let bil privezal, je li je ni bilo potrebno odvezati od ovoga vezila vu sobotni dan?“
- I kad bi to bil rekel, sramuvali su se vsi njegvi suprotivniki, ves puk pako je se veselil nad vsemi zmožnemi čini koji su bili po njem včinjeni.
- Rekel je anda: „K čemu je spodobno Kraljestvo nebesko i komu je budem prispodobil?
- Spodobno je muštardovom zrnu koje je vzel človek i posejal na svojem vrtu i raslo je i postalo je veliko drevo i ptice nebeske jesu počivale na njegveh svrših.“ Mat 13,31; Mark 4,31.
- A ipak je rekel: „K čemu budem prispodobil Kraljestvo nebesko?
- Spodobno je kvasu kojega je vzela žena i med tri merice melje skrila dok se je vse skvasilo.“ Mat 13,33.
- I išel je po varaših i vesih ter je vučil i putuval vu Jeruzalem.
- Reče pako njemu nekoj: „Gospone, je li ih je malo koji se zveličiju?“ On pak reče njemu:
- „Trsete se vlesti čez tesna vrata ar velim vam: vnogi budu iskali vlesti, pak ne budeju mogli.
- Kad bu pako hiže gospodar vleznul i zaprl vrata, budete počeli zvana stajati i na vratih kučiti govoreči: ʻGospone, otpri nam!ʼ, a on odgovori i reče vam: ʻJa vas ne poznam otkud jeste.ʼ Mat 25,10.
- Onde budete počeli govoriti: ʻMi smo jeli pred tobum i pili i ti si na našeh vulicah vučil.ʼ
- I reče vam: ʻJa vas ne poznam otkud jeste. Othađajte od mene, vsi vi zlotvori!ʼ
- Onde bude plač i škripanje zubih. Kad budete videli Abrahama i Izaka i Jakopa i vse proroke vu Kraljestvu Božjem, vas pako van istirane. Mat 7,23; Šolt 6,9; Mark 25,41.
- I dojdeju od ishoda i od zahoda i od severa i od juga i posedeju se k stolu vu Kraljestvu Božjem. Mat 8.11.
- I, nut, koji su sada poslednji, budu prvi i koji su prvi, budu poslednji.“ Mat 19,30;20,16; Mark 10,31.
- On isti dan pristupili su nekoji zmed farizejušev govoreči njemu: „Othađaj i vugni se otud ar te Herodeš kani vmoriti.“
- I reče njim: „Hote i recite ovoj lisici: ʻNut, ja izganjam vrage i zvračenja opravljam danas i sutra, a po tretjem danu budem se dokončal.ʼ
- Vendar moram ja danas i zutra i sledeči dan hoditi ar ne more biti da bi prorok zvan Jeruzalema poginul.
- Jeruzalem, Jeruzalem, koj vmarjaš proroke i kamenuješ one koji se k tebi pošiljaju, kuliko krat sem hotel skup spraviti tvoje sine kak ptica svoje mlade pod kreljuti ter nesi hotel!“ Mat 23,37.
- „Nut, ostavi se vam vaša hiža pusta. Velim pako vam da me ne budete videli doklam ne dojde vreme kad budete rekli: ʻBlagoslovljen budi koj dohađa vu imenu Gosponovem!ʼ“ Mat 23,39.
