Farizejuški kvas. Jedinoga Boga se je bojati. Blaznost suprot Svetomu Duhu. Ježuš neče biti sudec med dvemi bratmi koji si med sobum deljiju odvečtvo i odgovarja od skuposti i skrbi za vremenita. Jedini Bog se mora iskati i morati je skoznuvati. Ogenj iz neba. Vreme milošče. Pomirenje.
- Kad bi pako vnoge vnožine okolo bile stale tak da bi se med sobum gazili, počel je svojem vučenikom govoriti: „Čuvajte se od kvasa farizejušev koj je skazljivost. Mat 16,6; Mark 8,15.
- Nikaj pako ni tak skritoga kaj se ne bi očituvalo niti nikaj otajnoga kaj se ne bi zeznalo.“Mat 10,26; Mark 4,22.
- Ar koja ste vu tmici rekli, budu se na svetlom govorila i koja ste vu vuho govorili vu hižah, budu se nazveščala na krovih.
- Vam pako, mojem prijatelom, velim: ʻNe bojte se oneh koji vmarjaju telo, a potlam nemaju več kaj včiniti.ʼ
- Ja vam pako pokažem koga se bojte: bojte se onoga koj, poklamkam je vmoril, oblast ima v pekel hititi. Tak vam velim: ovoga se bojte!
- Ne li pet vrapcov prodaje se za dva đukesa? Pak niti jeden zmed njih neje pozabljen pred Bogom.
- Dapače, takaj lasi vaše glave jesu vsi prebrojeni. Najte se anda bojati: vi ste boljši od vnogo vrapcov.
- Ja pako velim vam: koj me bude spoznaval pred ljudmi, i Sin Človečji bude ga spoznal pred angeli Božjemi. Mat 10,32; Mark 8,38; Tim 2,12.
- Koj me pako zataji pred ljudmi, bude se zatajil pred angeli Božjemi.
- I vsakomu koj reče reč proti Sinu Človečjemu, otpusti se, onomu pako koj bude proti Svetomu Duhu blaznil, ne bude se otpustilo. Mat 12,32; Mark 3,29.
- Kad vas pako budu vodili vu sinagoge i pred večnike i oblasnike, najte biti skrbljivi kak ali kaj budete odgovarjali ali kaj budete rekli
- ar Duh Sveti navči vas vu onoj istoj vuri kaj vi morate reči.“ Mat 10,19.20.
- Nekoj pako zmed vnožine reče njemu: „Mešter, reci mojemu bratu da razdelji z menum odvečinu.“
- A on reče njemu: „Človek, gdo me je za suca ali razdelitelja zvrhu vas postavil?“
- I on reče njim: „Gledajte i čuvajte se od vsake skuposti ar ako i ima gdo obilnost, tak vendar ne visi njegvo živlenje od njegvoga imetka.“
- Rekel je pako njim priliku govoreči: „Nekojega bogatoga človeka polje je doprineslo obilnoga sada
- i premišljaval je vu sebi govoreči: ʻKaj budem včinil pokehdob nemam mesta koj bi moj prirod spravil?ʼ
- I reče: ʻTo včinim: razmečem moje škednje i vekše napravim i tam spravim vsa koja su mi prirasla i moja dobra
- i rečem mojoj duši: ‘Duša, imaš vnoga dobra na vnoga leta spravljena, počivaj si, jeđ, pij, budi dobre volje!’ʼ
- Bog pako reče njemu: ʻBedak, ovu noč budu od tebe terjali tvu dušu, koja si pako spravil, čija budu?ʼ
- Tak se godi onomu koj sam sebi kinče spravlja, a ni pri Bogu bogat.“
- I reče svojem vučenikom: „Zato velim vam: najte biti skrbljivi za vaše živlenje, kaj budete jeli niti za telo, kaj budete oblačili. Šolt 54,23; Mat 6,2; 1Pet 5,7.
- Živlenje je više nego jestvina i telo je više nego oprava.
- Premislete karvane, oni niti ne seju niti ne ženju, oni niti imaju pivnice niti škednja i Bog je hrani. Kuliko vnogo boljši jeste vi od njih?
- Koj pako zmed vas more po svojem premišljavanju k svojoj višini neg jeden laket nadostaviti? Mat 6,27.
- Ako anda niti ono kaj je najmenjše ne morete, kaj se za druga skrbite?
- Premislite lilijume kak rasteju: ne delaju niti ne predeju. Velim pako vam: niti Šalomon vu vsoj svojoj diki ne se tak odeval kak jeden zmed oveh.
- Ako anda Bog travu koja je danas na polju, a zutra se v peč hiti, tak opravlja, kuliko bolje vas, vi maloverniki!
- I vi ne spitavajte kaj budete jeli ali kaj budete pili i najte se na visoko nositi.
- Ar za vsem ovem spitavaju narodi sveta. Vaš pako Otec zna da vi ova potrebujete. Mat 6,32.
- Nego iščite najprvič Kraljestvo Božje i njegvu pravicu i vsa ova pridaju se vam.
- Najte se bojati, vi malehna čreda, ar se je dopalo vašemu Ocu vam dati Kraljestvo.
- Prodajte koja imate i dajte almuštvo. Načinete si mošnje koje ne ostarneju, kinč koj ne pomenjka vu Nebesih kam se tat ne približa niti ga mol ne pokvari. Mat 6,21.
- Ar gde je vaš kinč, onde bude takaj vaše srce. Mat 6,21.
- „Naj budu vaši boki prepasani i vu vašeh rukah goruče svetnice.
- I vi budite spodobni ljudem koji čakaju na svojega gospona kad se povrne iz svadbe, da kada dojde i pokuči, sproti mu otpreju.
- Blaženi slugi oni koje gospon najde skoznujuče kada dojde, stanovito velim vam da se opaše i posadi je k stolu i okolo bude hodel ter njim dvoril.
- I ako dojde ob drugem skoznuvanju ali ako dodje ob tretjem skoznuvanju ter nje ovak najde, blaženi su oni slugi.
- To pako znajte da ako bi hižni gospodar znal ob kojoj vuri dojde tat, tak bi zaisto skoznuval i ne bi puščal potkopati svoje hiže.
- Tak anda i vi budite pripravni kajti Sin Človečji dojde ob vuri ob kojoj si vi ne mislite.“
- Reče pako njemu Peter: „Gospone, je li veliš ovu priliku samo za nas ali takaj za vse?“
- Reče pako Gospon: „Gdo, štimaš, je veren i spameten razdeljitel kojega je postavil Gospon zvrhu svoje družine da im da ob svojem vremenu primeren živlenja strošek?
- Blažen je on sluga kojega Gospon, kada dojde, najde da tak čini.
- Zaisto velim vam da ga postavi zvrhu vseh koja lada.
- Ako pako on sluga reče vu svojem srcu: ʻMoj Gospon odvlači dojtiʼ i začme biti sluge i dekle ter jesti i piti i zapijati se,
- tak dojde Gospon onoga sluge vu dnevu vu kojem se ne nadeja i ob vuri koju ne zna i odelji njega ter da njemu njegov del z nevernemi.
- On pako slugu koj je spoznal volju svojega Gospona i ne se pripravil niti ni včinil poleg njegve volje, bude jako bijen.
- Koj pako ni spoznal ter je včinil kaštige vredna, bude malo bijen. Od vsakoga pako kojemu je vnogo dano, bude se vnogo od njega potrebuvalo, a kojemu je vnogo izručeno, več budu od njega terjali.
- Ja sem došel ogenj na Zemlju poslati i kaj hoču drugoga, nego da se vužge!
- Ja se pako imam z krstom krstiti i kak se stiskavam dok se dovrši!
- Štimate da sem došel Zemlji mir davat? Ne, velim vam, nego razdruženje.“ Mat 10,34.35.
- „Ar od sada budu pet vu jednoj hiži razdeljeni, tri proti dvem, a dva proti trem:
- razdelji se otec proti sinu, a sin proti svojemu ocu, mati proti kčeri, a kči proti materi, svekrva proti svojoj snehi, a sneha proti svojoj svekrvi.“
- Rekel je pako takaj vnožini: „Kada vi vidite da se od zahoda zdiže oblak, tak kaki velite: ʻDežđ dohađaʼ i tak biva,
- a kada jug puše, velite: ʻBude vručinaʼ i biva.
56.Vi skazlivci! Spodobu neba i zemlje znate raspoznavati, a zakaj nečete ovo vreme zezveđati?
- Zakaj pako takaj sami od sebe ne sudite kaj je prav?
- Ti pako kad ideš z tvojem suprotivnikom pred poglavnika, tak se trsi na putu da se ga rešiš da te morebiti pred suca ne povleče i sudec tebe preda haharu, a hahar tebe postavi vu vuzu.
- Velim tebi: ti odonud ne izideš doklam takaj najzadnji novčec ne splatiš.“
