Ježuš brani svoju čast po Ivanu Krstitelu. Prilika od ljudomorskeh goričarov i od vugelnoga kamena. Pitanje od dačnoga peneza. Od gorestajanja mrtveh. Mesijaš je sin Davidov. Skazlivost i gizdost farizejušev.
- I dogodilo se je vu jednem zmed oneh dnevov, kad je on ljudstvo vu Cirkvi vučil i Evangelijum nazveščal, da su se skup izišli aldovnički poglavari i pisci skupa starešinami, Mat 21,23; Mark 11,27,
- i rekli su njemu govoreči: „Poveđ nam, vu kakvoj oblasti ti činiš ova ali gdo ti je dal tu oblast?“
- Ježuš pako odgovori i reče njim: „I ja vas takaj hoču pitati za jednu reč. Odgovorete meni:
- krst Ivanov, je li je bil iz Neba ali od ljudih?“
- A oni su sami vu sebi mislili i govorili: „Ako rečemo: ʻIz Nebaʼ, tak on reče: ʻZakaj anda neste njemu veruvali?ʼ
- Ako pako rečemo: ʻOd ljudihʼ, tak nas ves puk bude kamenuval ar je opsvedočen da je Ivan prorok bil.“
- I odgovoriju da ne znaju otkud bi bil.
- Onda reče njim Ježuš: „Tak vam niti ja ne povem vu kakvoj oblasti ja ova činim.“
- On pako počme ljudstvu ovu priliku govoriti: „Nekoj človek je zasadil vinograd i njega je zamitil goričarom i bil je dugo časa zvan domovine. Iz 5,1; Jer 2,21; Mat 21,33; Mark 12,1.
- I ob vremenu bratve pošlje slugu k goričarom da bi mu od sada vinograda dali. Ovi su pako njega zbili i praznoga otpravili.
- A on ipak pošlje drugoga slugu, ali oni su i ovoga zbili, opšanili njega ter ga praznoga otpravili.
- A on pošlje i tretjega, ali oni su takaj ovoga ranili i van ishitili.
- Onda reče Gospodar vinograda: ʻKaj bi činil? Ja ču poslati mojega ljubljenoga sina, morebiti kada ovoga opaziju, budu se strsnuli.ʼ
- Kad bi ga bili goričari zagledali, jesu si vu sebi mislili i rekli: ʻOv je odvetek, vmoremo njega i odvečtvo postane naše.ʼ
- I ishitili su njega van iz vinograda i vmorili njega. Kaj njim anda gospodar vinograda bude včinil?
- Dojde i pogubi one goričare i da vinograd drugem.“ Kaj kad bi bili čuli, rekli su njemu: „Zevsema ne!“
- On pako pogledi nje i reče: „Kaj je anda to kaj je pisano: ʻKamen kojega su zidari zavrgli je postal za glavič vugla?ʼ Šolt 117,22; Iz 28,16; Mat 21,42; Č Ap 4,11; Rim 9,33; 1Pet 2,7.
- Vsaki koj opade na ov kamen razbije se, a na koga on opade zdrobi ga.“
- I iskali su aldovnički poglavari i pismoznanci na njega ruke položiti vu onoj vuri i bojali su se ljudstva ar su spoznali da je on ovu prliliku proti njim govoril.
- I oni su ga opažuvali i poslali zasednike koji se jesu imali za pravične kazati da bi ga vu govorenju vloviti ter poglavarstvu i oblasti orsačkoga ladavca predati mogli. Mat 22,15; Mark 12,13.
- I pitali su njega govoreči: „Mešter, mi znamo da prav govoriš i vučiš i na nikakvo preštimanje osobe ne paziš, nego Božji put vu istini vučiš.
- Je li je nam slobodno daču dati cesaru ali ne?“
- On pako je spoznal njihovu prevaru i reče njim: „Kaj me skušavate?
- Pokažete mi denjar: čiji ima kip i natpisek?“ Oni odgovoriju i rečeju njemu: „Cesarov.“
- I on reče njim: „Dajte anda koja su cesarova cesaru i koja su Božja Bogu!“ Rim 13,7.
- I oni nesu mogli ovu reč kuditi pred ljudstvom i čudili su se nad njegvem odgovorom i mučali.
- Pristupili su pako nekoji zmed saducejušev, koji tajiju da je gorestajanje, i pitali su njega, Mat 22,29; Mark 12,18,
- govoreči: „Mešter, Mojžeš je nam prepisal, ako čiji brat vumre koj ima ženu i on nikakvu decu ne ostavi, da vzeme njegov brat ženu i obudi odvetka svojemu bratu.
- Bilo je pako sedem bratov i prvi vzeme ženu i vumre prez dece.
- I sledeči vzeme nju, ali i on takaj vumre prez deteta.
- I tretji vzeme nju i vsi sedem spodobnem načinom i nesu nikakov odvetek ostavili i vumrli jesu.
- Zadnjič za vsemi vumre takaj žena.
- Ob gorestajanju anda kojega zmed njih bude žena pokehdob su nju sedem za ženu imali?“
- I reče njim Ježuš: „Deca ovoga sveta se ženiju i vdavaju za muža,
- oni pako koji su vredni znajđeni onoga veka i gorestajanja od mrtveh delniki postati, niti se vdavaju niti ne jemlju žene
- ar več nemreju vumreti i spodobni su angelom ter su Božja deca pokehdob su deca gorestajanja.
- Da se pako mrtvi gore staju je takaj Mojžeš pri pripovedanju od grma pokazal kak on Gospona imenuje Abrahamovem Bogom, Izakovem Bogom i Jakopovem Bogom.“ 2Moj 3,6.
- „Bog pako ni Bog mrtveh, nego živeh ar vsi njemu živeju.“
- Onda odgovoriju nekoji zmed pismoznancov i rečeju njemu: „Mešter, dobro si govoril!“
- I več nesu se ufali njega za kaj pitati.
- On pako reče njim: „Kak veliju da Krištuš je sin Davidov?
- Pokehdob vendar sam David vu Knjigi šoltarov veli: ʻGospon je rekel mojemu Gosponu: ‘Sedi se na moju desnicu, Šolt 109,1; Mat 22,24; Mark 12,36,
- doklam položim tvoje neprijatele za podnožje tvojeh nog.’ʼ
- David anda imenuje njega Gosponom, kak je anda on njegov sin?“
- Dok bi pako vse ljudstvo bilo poslušalo, reče on svojem vučenikom:
- „Čuvajte se od pismoznancov koji radi hodiju v dugeh svitah i ljubiju pozdravljanja na trgih i vu spraviščah prva sedališča, a pri goščenjih prva mesta. Mat 23,6; Mark 12,38; gore 11,43.
- Oni poždiraju hiže vdovic pod izlikum dugoga molenja. Zvrhu njih nadojde vekše opsuđenje.“ Mark 12,40.
