Nekoja vdovica daje od svojega siromaštva. Ježuš prenazvešča porušenje jeruzalemskoga varaša i skončanje sveta ter opomina na skoznuvanje i molitvu.
- Kad se je pako ogledal, videl je te bogatuše koji su devali svoje dare vu cirkvenu škrinju.
- Videl je pako takaj nekoju siromašku vdovicu koja je dva novčece nuter vrgla. Mark 12,41.
- I reče: „Zaisto velim vam da je ova siromaška vdovica više nuter vrgla nego vsi.
- Ar vsi ovi jesu iz svoje obilnosti med Božje dare vrgli, ova je pako iz svojega boštva vse kaj je imala za svoje zdržavanje nuter vrgla.“
- I kad bi nekoji od Cirkve govorili da je z dobrem kamenjem i darmi nakinčena, reče on:
- „Kaj se dotiče oveh koja vidite, tak nadojdu dnevi vu kojeh se ne ostavi kamen na kamenu koj se ne razruši.“ Mat 24,2; Mark 13,2; gore 19,44.
- Pitali su pako njega govoreči: „Navučitel, kad se ova budu dogodila i kakvo je znamenje kad ova pričmeju bivati?“
- I on reče: „Pazete da se ne zapeljate ar vnogi dojdu vu mojem imenu govoreči: ʻJa jesem, nadošlo je vremeʼ, ali najte za njimi iti!
- Kada pako budete čuli od bojov i puntih, najte se prestrašiti: vsa ova moraju se prvlje dogoditi, ali jošče ni taki konec.“
- Onda reče njim: „Podigne se narod suprot narodu i kraljestvo suprot kraljestvu
- i budu kajkud veliki potresi, kuge i glad i strahi iz neba i velika znamenja.
- Ali pred vsemi ovemi budu na vas polagali svoje ruke i vas preganjali pokehdob vas budu vu spravišča i vuze predavali, pred kralje i poglavare vodili zaradi mojega imena.
- To se pako vam bude na svedočanstvo događalo.
- Vzemete si anda k vašemu srcu da se vre vnapredek ne budete razmišljavali kak budete odgovarjali.
- Ar ja dam vam vusta i mudrost kojoj se vsi vaši suprotivniki ne budu mogli suprotstaviti niti suprotgovoriti.
- Vi pako budete izdavani od roditelov i bratov, rođakov i prijatelov i nekoje zmed vas vmoriju, Mat 10,21,
- i od vseh budete odurjavani zaradi mojega imena,
- ali niti jeden las ne pogine iz vaše glave.
- Vu vašoj trpljivnosti budete ladali vaše duše.
- Kad pako budete videli da se opstira Jeruzalem od vojske, onda znajte da se je njegvo opustenje približalo. Dan 9,27; Mat 24,15; Mark 13,14.
- Onda koji su vu Judeji, naj beže na gore i koji su vu sredini orsaga, naj odidu i koji su vu državah, naj nejdu nazad nuter.
- Ar ovo su dnevi fančenja da se spuniju vsa koja su pisana.
- Jaj pako nosečem i doječem vu oneh dnevnih. Ar na Zemlji bude velika stiska i srditost zvrhu ovoga ljudstva.
- I opadneju od oštroče meča ter zarobljeni budu se med vse narode vodili i Jeruzalem bude tlačen od poganinov dok se dopuniju vremena narodov.
- I na Suncu i Mesecu i zvezdah budu znamenja, a na Zemlji bude med narodi velika stiska zaradi strahovitoga šumenja morja i slapov, Iz 13,10; Ezek 32,7; Joel 3,15; Mat 24,29; Mark 13,24,
- i ljudi budu sehnuli od straha i čakanja oneh koja zvrhu vsega sveta nadojdeju ar se jakosti nebeske budu gibale.
- I onda budu videli dojti Sina Človečjega vu oblaku z velikum mogučnostjum i zmožnostjum.
- Kada pako ova bivati započmeju, onda se oglejte i podignite vaše glave ar se približava vaše otkuplenje.“
- I on im reče ovu priliku: „Poglejte figovo i ostalo drevje.
- Kad vre sad donašaju, tak znate da je blizu leto.
- Ravno tak i vi spoznate kada budete videli ova bivati da je blizu Kraljestvo Božje.
- Stanovito velim vam da ne prejde ovo pokolenje dok se vsa ova ne spuniju.
- Nebo i Zemlja prejde, moje pako reči ne prejdu.
- Pazete se pako da se morebiti ne optrše vaša srca z požrljivostjum, pijanostjum i skrbmi ovoga živlenja i da on dan zvrhu vas naglo ne nadojde
- ar kakti zanjka nadojde zvrhu vseh koji po vsoj Zemlji stanuju.
- Zato skoznujte i molete vsigdar da budete vredni znajđeni vujti vsem ovem koja nadojdeju i opstati pred Sinom Človečjem.“
- On pako je obdan vučil vu Cirkvi, a obnoč je van ishađal ter se zadržaval na gori koja se zove Olična.
- I vse ljudstvo je zajutra rano dohađalo k njemu vu Cirkvu njega poslušat.
