Aldovnički poglavari delaju tolnač kak bi Ježuša na smrt predali. Izdavanje Judaševo. Zadnja večerja. Naređenje presvetoga oltarskoga šakramenta. Pregovarjanje vučenikov gdo bi zmed njih vekši bil. Molitva za Petrovu veru. Ježuš prenazvešča svoje izdavanje. Ježuš moli na vrtu. On se vlovi i vodi k Kajfašu. Petrovo zatajenje i obrnenje. Ježušovo bičuvanje i opsuđenje.
- Približaval se je pako svetečni Dan nekvasnoga kruha koj se zove Vuzem. Mark 14,1; Mat 26,2.
- I aldovnički poglavari i pismoznanci jesu iskali priliku kak bi Ježuša vmorili, bojali su se pako ljudstva.
- Vlezel je pako Šatan vu Judaša, koj se je zval Iškariot i koj je bil jeden zmed dvanajsteh. Mat 26,14; Mark 14,10.
- I odide ter se dogovori z aldovničkemi poglavari i večniki kak bi ga njim vu ruke predal.
- I oni se jesu oveselili i pogodili da mu daju penez. Mat 26,15.
- I on je obečal i iskal priliku da bi ga njim prez zmutnje ljudstva predal.
- Došel je pako dan nekvasnoga kruha, na koj se je moralo klati vuzmeno janje. Mat 26,17; Mark 14,12.
- I pošlje Petra i Januša govoreči: „Hote i pripravete nam vuzmeno janje da je blagujemo.“
- A oni rečeju: „Gde hočeš da je pripravimo?“
- I on reče njim: „Nut, kada zajdete vu varaš, dojde vam naproti človek koj nosi vrč vode, hote za njim vu hižu vu koju on pojde
- i recite hižnomu gospodaru: ʻMešter ti veli: ‘Gde je obročnica vu kojoj budem z mojemi vučeniki blaguval vuzmeno janje?’ʼ
- I on vam pokaže veliku obročnicu prestrtu i onde nje pripravete!“
- Oni pako jesu išli i našli kak je njim rekel i pripravili su vuzmeno janje.
- I kad je došla vura, sede se k stolu i z njim dvanajst apoštolov. Mat 26,20; Mark 14,17.
- I on reče njim: „Kruto jako jesem želel z vami ovo vuzmeno janje blaguvati predi nego budem trpel.
- Ar velim vam: ja je več od vezda ne budem blaguval dok se ne spuni vu Božjem kraljestvu.“
- I on vzeme kelih, zahvali i reče: „Vzemite i razdeljete si ga med sobum.
- Ar velim vam da ja več ne budem pil iz ovoga trsnoga sada dok ne dojde Kraljestvo Božje.“ Mat 26,29.
- Vzeme pako i kruh, zahvali, prelomi i da ga njim govoreči: „Ovo je moje telo koje se bude za vas predalo. To včinete na moj spomenek.“ 1Kor 11,24.
- Spodobno vzeme takaj kelih, kad se je navečerjal, i reče: „Ovo je kelih novoga Zakona vu mojoj krvi koja se bude za vas prelejala.
- Ali, nut, ruka mojega izdajnika je z menum na stolu.
- I Sin Človečji ide zadnjič kak je odlučeno, ali jaj onomu človeku po kojem se on bude izdal.“ Mat 26,21; Mark 14,20; Jan 13,18; Šolt 40,10.
- I oni su se počeli med sobum spitavati koj bi bil zmed njih koj to bude včinil. Mat 26,22; Mark 14,19.
- Nastalo je pako med njimi takaj pregovarjanje koj bi se zmed njih vekši videl biti.
- On pako reče njim: „Kralji narodov gospoduju nad njimi i oni koji zvrhu njih imaju oblast, zoveju se dobročiniteli.
- Vi pako ne tak, nego koj je zmed vas vekši, naj postane kakti menjši i on koj je pretpostavljen, naj bude kakti dvorjanik.
- Ar koj je vekši, koj sedi za stolom ali koj dvori? Ne li da on koj sedi? Ja pako jesem oposred med vami kakti on koj dvori.
- Vi pako jeste koji ste z menum vu mojeh skušavanjih opstali
- i zato vam ja pripravljam kraljestvo kak je nje meni pripravil moj Otec
- da jete i pijete pri mojem stolu vu mojem Kraljestvu i sedite na kraljevskeh stolicah sudeči dvanajst pokolenj izraelskeh.“
- Reče pako Gospon: „Šimun, Šimun, nut, Šatan je sprosil da bi vas rešetal kakti pšenicu,
- ja pako jesem za te prosil da ne pomenjka tvoja vera i ti, kad se jednoč obrneš, tak objači tvoje brate.“
- On pako reče njemu: „Gospon, ja jesem pripraven z tobum i vu vuzu i na smrt iti.“
- A on reče: „Ja ti velim, Peter, pevec danas ne zapopeva dok me trikrat ne zatajiš da me ne poznaš.“ I on reče njim, Mat 26,34; Mark 14,30,:
- „Kad sem vas pošiljal prez mošnje i torbe i obutelji, je li vam kaj menjkalo?“ Mat 10,9.
- A oni su rekli: „Nikaj“. Onda im reče: „Ali sada koj ima mošnju, naj ju vzeme, ravno tak i torbu i koj nema, on naj proda svoju halju pak si naj kupi meč.
- Ar velim vam da se jošče ovo mora nad menum spuniti kaj stoji pisano: ʻI on je med krivične računjan.ʼ Ar ona koja su od mene pisana idu na konec.“ Iz 53,12.
- A oni su rekli: „Gospone, nut, ovo su dva meči.“ On pako reče njim: „Dosta je!“
- I kad je van izišel, išel je poleg navade na Oličnu goru, nasleduvali su ga pako takaj i vučeniki. Mat 26,30.36; Mark 14,26.32; Jan 18,1.
- I kad bi bil došel na mesto, reče njim: „Molete da ne zajdete vu skušavanje.“
- I on se je od njih odlučil na daljinu kaj bi se moči z kamenom nahititi i poklamkam bi se bil pokleknul, molil je, Mat 26,39; Mark 14,35,
- govoreči: „Otec, ako hočeš, vzemi od mene ov kelih, medtemtoga ne moja volja, nego tvoja naj bude!“
- Iskazal se je pako njemu angel iz Neba koj ga je krepil. I kad se z smrtjum boril, molil je duglje.
- I njegov pot je postal kakti krvne kaplje koje su na zemlju padale.
- I kad se je od molitve gore stal i k svojem vučenikom došel, našel je nje da su od žalosti spali.
- I reče njim: „Zakaj spite? Stanite se i molete da ne prepadnete vu skušavanje.“
- Dok bi on jošče govoril, nut, vnožina je bila ovde i jeden zmed dvanajsteh koj se je zval Judaš je pred njimi išel i približaval se je k Ježušu da bi ga kušnul. Mat 26,47; Mark 14,43; Jan 18,3.
- Ježuš pako reče njemu: „Judaš, ti z kušcom izdaješ Sina Človečjega?“
- Kad bi pako bili videli oni koji su okol njega bili kaj se bude dogodilo, rekli su njemu: „Gospone, bi li je z mečom vudrili?“
- I jeden zmed njih vudril je slugu aldovničkoga poglavara i odsekel mu je desno vuho.
- Ježuš pako odgovori i reče: „Pustete zasada!“ I kad bi se bil doteknul njegvoga vuha, zvračil je njega.
- Onem pako koji su nad njega došli, poglavarom aldovničkem i večnikom Cirkve i starešinam, reče Ježuš: „Kakti na tolvaja jeste izišli z meči i oščeki.
- Kad sem vsaki dan pri vas bil vu Cirkvi, neste na me pretegnuli ruke, ali ova je vaša vura i oblast tmice.“
- Oni pako pograbiju njega i otpeljaju vu hižu aldovničkoga poglavara, a Peter je njega izdalka nasleduval. Mat 26,57; Mark 14,53; Jan 18,24.
- Kad su si pako ogenj na sredini dvorišča zakurili i okolo njega poseli, bil je Peter oposred med njimi. Mat 26,69; Mark 14,66; Jan 18,25.
- Kad bi ga pako bila videla nekoja dekla sedeti pri svetlosti i vu njega pogledala, rekla je: „I ov je bil z njim.“
- A on je zatajil njega govoreči: „Žena, ja ga ne poznam!“
- I za kratek čas zagleda ga nekoj drugi i reče: „I ti si jeden zmed njih!“ Peter pako reče: „O, človek, nesem!“
- I za čas kakti jedne vure potvrđaval je nekoj drugi govoreči: „Zaisto, i ov je bil z njim ar je i on Galilejanec.“ Jan 18,26.
- A Peter reče: „Človek, ja ne znam kaj govoriš.“ I sproti, dok bi on jošče govoril, zapopeval je pevec.
- I obrne se Gospon i pogleda Petra. I spomenul se je Peter iz Gosponove reči kak je bil rekel: „Prvlje nego pevec zapopeva, tri puti me zatajiš.“ Mat 26,34; Mark 14,30; Jan 13,38.
- I Peter je izišel i žuhko se plakal.
- Oni pako ljudi koji su ga držali osmehavali su njega i bili
- i zavezali su mu oči i bili ga po obrazu i ispitavali su njega govoreči: „Prorokuj gdo je koj te je vudril?“
- I vnoge druge blaznosti jesu proti njemu govorili.
- I kad je dan nastal, skup se jesu spravili starešine ljudstva i aldovnički poglavari i pismoznanci i vodili su njega vu svoje spravišče govoreči: „Ako si ti Krištuš, tak poveđ nam.“
- I on reče njim: „Ako vam povem, ne budete mi veruvali.
- Ako pak i ja vas budem pital, ne budete mi odgovorili niti me ne budete ispustili.
- Ali od vezda bude Sin Človečji sedel na desnici Božje mogučnosti.“
- Rekli su pako vsi: „Anda si ti Sin Božji?“ On reče: „Vi velite ar ja jesem.“
71. Oni pako jesu rekli: „Kaj jošče potrebujemo svedočanstva? Ar smo sami iz njegveh vust čuli!“
