Ježuš optužuje se pred Pilatušem, pošilja se k Herodešu i nazad se vodi k Pilatušu. Barabaš se njemu pretpostavlja. Židovi priviraju da se raspne Ježuš. Njegvo ispeljavanje. Jeruzalemske žene oplakuju njega. Raspinanje. Pokoru čineči razbojnik. Smrt Ježuša Krištuša. Jožef iz Arimateje skrbi se za pokop Ježuševoga tela.
- I podignula se je vsa množina i otpeljali su ga k Pilatušu. Mat 27,2; Mark 15,1; Jan 18,28.
- Počeli su ga pako optužuvati govoreči: „Ovoga smo našli da potkapa naš narod i prepoveda dače davati cesaru pokehdob veli da je on Krištuš kralj.“ Mat 22,21; Mark 12,17.
- Pilatuš pako opita njega govoreči: „Jesi li ti kralj židovski?“ A on odgovori i reče: „Ti veliš!“ Mat 27,11; Mark 15,2; Jan 18,33.
- Pilatuš pako reče aldovničkem poglavarom i vnožinam: „Ja nikakve krivnje ne nahađam vu ovem človeku.“
- Oni pako jesu jošče bolje navaljuvali govoreči: „On punta ljudstvo pokehdob vuči po celoj židovski zemlji, od Galileje počemši tja do ovde!“
- Kad bi pako Pilatuš bil čul od Galileje, pital je je li ov človek Galilejanac.
- I kak je zeznal da je spod Herodeševe oblasti, poslal je njega k Herodešu koj je sam takaj vu Jeruzalemu bil one dneve.
- Herodeš pako kad bi bil videl Ježuša, kruto se je oveselil ar si ga je vse zdavna želel videti zato kajti je vnoga čul od njega i nadejal se je da videl kakvo znamenje koje on bude včinil. Gore 13,31; Mat 14,1.
- I on ga je od vnogeh stvarih spitaval, ali on mu ni nikaj odgovoril.
- Aldovnički pako poglavari i pismoznanci stali su onde i njega zajedno optužuvali.
- Herodeš pako skupa z svojum vojskum je njega zametaval i osmehaval ter vu bele svete oblekel i k Pilatušu nazad poslal.
- I od onoga dana postali prijateli Herodeš i Pilatuš ar predi su bili med sobum neprijateli.
- Pilatuš pako je skup zezval poglavare aldovničke i večnike i ljudstvo
- i rekel je njim: „Vi ste mi predali ovoga človeka kakti kakvoga koj ljudstvo odvrača i, nut, ja sem ga pred vami spitaval i ne nahađam vu ovem človeku nikakve krivnje zbog koje vi njega tužite.“ Jan 18,38 – 19,4.
- „Ali niti Herodeš, ar sem vas k njemu poslal, i nut, nikaj smrti vrednoga ni nad njim znajđeno.
- Ja ga anda hoču kaštigati i spustiti.“
- Moral je pako njim na svetke jednoga spustiti.
- Zakriknula je pako vsa skupa vnožina govoreča: „Vzemi ovoga i spusti nam Barabaša!“
- Ov je bil zaradi nekakve punte koja je bila včinjena vu varašu i zaradi ljudomorstva vu vuzu postavljen.
- Pilatuš pako je njim ipak govoril pokehdob je hotel spustiti Ježuša,
- ali oni jesu jošče jakše kričali govoreči: „Raspni ga, raspni!“
- A on njim i tretji put reče: „A kaj je ov zloga včinil? Ja nikakov zrok smrti ne nahađam, ja ga anda hoču kaštigati i spustiti.“
- A oni su privirali z velikem kričom i potrebuvali da bi se raspel i njihov krič je zmir vekši nastajal.
- I Pilatuš je odsudil da se spuni njihova prošnja.
- I spustil je njim onoga koj je bil zaradi ljudomorstva i postavljen vu vuzu, za kojega takaj jesu prosili, Ježuša pako je predal njihovoj volji.
- I kad bi ga peljali, pograbili su nekakvoga Šimuna Cirenenskoga, koj je dohađal iz polja, ter su mu naložili križ da bi ga nosil za Ježušem. Mat 27,32; Mark 15,21.
- Išla je pako za njim velika vnožina ljudstva i žen koje su se nad njim plakale i njega narekuvale.
- A Ježuš obrne se proti njim i reče: „Vi, kčere jeruzalemske, ne plačite se nad menum, nego se plačite same nad sobum i nad svojemi sinmi.
- Ar, nut, nadojdeju dnevi vu kojeh se bude reklo: ʻBlažene neplodne i vutrobe koje nesu rodile i prsi koje nesu pridajale.ʼ
- Onda počneju govoriti goram: ʻZrušete se na nas!ʼ i brežanjkom: ʻPokrite nas!ʼ Iz 2,19; Oz 10,8; Knj Oč 6,16.
- Kajti ako oni ovi činiju na sirovem drevu, kaj bude na suhem bivalo?“
- Peljani su pako z njim i drugi dva hudodelniki da bi se pogubili.
- I kad su došli na mesto koje se zove Mesto lubanj ili mrtvečkeh glav, onde su ga raspeli skupa z hudodelniki, jednoga zdesna, a drugoga zleva. Mat 27,33; Mark 15,22; Jan 19,17.
- Ježuš pako reče: „Otec, oprosti njim ar ne znaju kaj činiju.“ Razdeljili su si pako njegve oprave hitajuč zvrhu njih kocke.
- I stalo je ljudstvo i gledalo i zesmehavali su se iz njega poglavari z njimi govoreči: „Drugem je pomagal, naj sam sebi pomore ako je on Krištuš od Boga odebrani.“
- Osmehavali su pako njega i vojniki pristupljujuči i ponuđajuči njemu octa
- govoreči: „Ako si kralj židovski, pomozi sam sebi!“
- Bil je pako i natpisek napisan zvrhu njega z grčkemi i dijačkemi i židovskemi slovami: „Ovo je kralj židovski!“
- Jeden pako zmed hudodelnikov, koji su viseli, je njega blaznil govoreči: „Ako si ti Krištuš, pomozi sam sebi i nam!“
- On pako drugi odgovori i pokara njega govoreči: „Je li se ti takaj ne bojiš Boga premda si na jednaku kaštigu opsuđen?
- Mi dva zadnjič po pravici ar prijemljemo kaj su naša dela vredna, ov pako ni nikaj zla včinil.“
- I reče Ježušu: „Gospone, spomeni se iz mene kada vu tvoje Kraljestvo dojdeš.“
- I reče njemu Ježuš: „Stanovito velim tebi: denes budeš z menum v raju.“
- Bilo je pako okolo šeste vure i tmica je nastala po vsoj zemlji tja do devete ure.
- I Sunce je potemnelo i zakrivalo Cirkve raspraščilo se je po sredini.
- I Ježuš zakrikne z velikem glasom i reče: „Otec, vu tvoje ruke preporučam moju dušu!“ I kad bi ova bil izvustil, je preminul.
- Kad bi pako bil videl stotnik kaj se je bilo pripetilo, dičil je Boga govoreči: „Zaisto ov človek je bil pravičen.“
- I vsa vnožina oneh koji su skupa bili pri ovem gledališču i videli koja su bivala tukli su svoja prsa ter se povračali.
- Vsi pako njegvi znanci stali su izdaleka i žene koje su za njim iz Galileje došle, i oni su to videli.
- I, nut, nekoj človek imenom Jožef koj je bil tolnačnik, človek dober i pravičen, Mat 27,57; Mark 15,43; Jan 19,38,
- koj ni bil privoljil njihovomu tolnaču i njihovem činom, iz Arimateje, židovskoga varaša, koj takaj sam je čakal na Kraljestvo Božje,
- ov je išel k Pilatušu i prosil za Ježuševo telo.
- I kad bi nje bil dole znel i vu platno zavil, položil je nje vu novoisečeni grob vu koj jošče nigdo ni bil položen.
- I bil je dan pripravlanja i sobota je vre zasvitavala.
- Žene pako, koje su za njim došle iz Galileje, jesu nasleduvale, gledale grob i kak je bilo njegvo telo položeno.
- I one su se povrnule i pripravile začimbe i mazila, v sobotu pako jesu počivale poleg Zakona.
