Ivan Krstitel nazvešča pokoru. Ježuš da se krstiti med grešniki i odičuje se od Boga Duha Svetoga i od Oca.
- Vu oneh pako dnevih dojde Ivan Krstitel prodekujuči vu puščini Judeje
- i govoreči: „Činete pokoru ar se je Nebesko kraljestvo približilo!“
- Ar ovo je on koj je nazveščen po Izaijašu proroku govorečem: „Glas kričečega vu puščini: ʻPripravljajte Gosponovoga puta, ravne včinete njegve steze.ʼ“
- Isti pako Ivan je nosil opravu iz gamilskeh dlak, a okol svojeh bokov kožnati pojas, njegva pako hrana je bila kobilice i divji med.
- Onda je k njemu van ishađal Jeruzalem i vsa Judeja i ves kotar vuz Jordana
- i bili su od njega krščeni vu Jordanu i spoznavali su svoje grehe.
- Gda bi pako bil videl da k njegvomu krstu dohađaju vnogi farizejuši i saducejuši, reče njim: „Vi, kačje leglo, gdo vam je rekel bežati pred nastajučum srditostjum?
- Činete anda vreden sad pokore!
- I najte sami med sobum govoriti: ʻMi imamo oca Abrahamaʼ ar velim vam da je Bog moguč Abrahamu iz oveh kamenov obuditi sine.
- Ar sekira je vre na korenje drevja položena. Vsako anda drevo koje ne dopušča dober sad podseče se ter se vrže vu ogenj.
- Ja vas doisto krstim vu vodi na pokoru, ali koj za menum bude došel, je jakši od mene i ja nesem vreden nositi njegve obuče, ov isti bude vas krstil vu Svetem Duhu i vu ognju.
- On ima svoju vejaču vu svojoj ruki i očisti svoje guvno i spravi svoju pšenicu vu skedenj, pleve pako zežge z nepogašljivem ognjem.“
- Onda je došel Ježuš iz Galileje vu Jordan k Ivanu da bi se od njega krstil.
- Ivan se je pako branil njemu govoreči: „Ja se moram od tebe krstiti, a ti dohađaš k meni!“
- Odgovorivši pako Ježuš reče njemu: „Puščaj zasada ar tak se dostoja da mi ispunimo vsaku pravicu.“ Onda je njega puščal.
- Okrščen pako Ježuš sproti je van izišel iz vode. I, nut, otprla se jesu njemu nebesa i videl Duha Božanskoga spuščajučega se kakti goluba i zvrhu sebe dohađajučega.
- I, nut, glas iz nebes govoreči: „Ovo je moj ljubljeni sin vu kojem sem se kruto vdobrovoljil“.
