Ježuš posti, skušava se od vraga, njega oblada i poklamkam je bil Ivan vlovljen, započimlje vu Galileji prodekuvati. Izbere četiri apoštola i čini čuda.
- Onda je bil Ježuš otpeljan od Duha vu puščinu da bi se skušaval od vraga.
- I kada bi četrdeset danov i četrdeset nočih bil postil, onda je zagladel.
- I pristupi k njemu skušitelj i reče: „Ako si Sin Božji, tak reci da ovo kamenje kruhom postane.“
- On pako odgovori i reče: „Pisano je: ʻNe žive človek ob samem kruhu, nego ob vsakoj reči koja ishađa iz vust Božjeh.ʼ“
- Onda vzeme njega vrag z sobum vu sveti varaš i postavi ga na vrhunec Cirkve
- ter mu reče: „Ako si Sin Božji, spusti se dole ar je pisano: ʻOn je zapovedal svojem angelom od tebe i na rukah budu nosili tebe da morebiti ne vražiš na kamen tvoje noge.ʼ“
- Reče njemu Ježuš: „Pisano je ipak: ʻNe skušavaj Gospona Boga tvojega!ʼ“.
- Ipak vzeme njega vrag na kruto visoku goru i pokaže njemu vsa kraljestva ovoga sveta i njihovu diku
- i reče njemu: „Vsa ova dam tebi ako se poklekneš ter se meni budeš vklanjal.“
- Onda reče njemu Ježuš: „Othađaj, Šatan, ar je pisano: ʻGosponu Bogu tvojemu budeš se vklanjal i njemu samomu služil.ʼ“
- Onda je ostavil njega vrag i, nut, pristupili su angeli i njemu služili.
- Kad bi pako čul bil Ježuš da je Ivan vu vuzu postavljen, odišel je vu Galileju.
- I ostavivši varaša Nazaret, došel je i stanuval vu Kafarnaumu, koj vuz morje leži, na međah Zabulona i Neftali,
- da bi se spunilo kaj je rečeno po Izaijašu proroku:
- „Zemlja Zabulon i zemlja Neftali, put vuz morje iz one strani Jordana, Galileja poganinov,
- ljudstvo koje sedi v tmici vidi veliku svetlost i onem koji sediju vu kotaru smrtne tenje ishađa svetlost.“
- Od ovoga časa je počel Ježuš prodekuvati i govoriti: „Činete pokoru ar se je Kraljestvo nebesko približalo!“
- Kad bi pako Ježuš vuz Galilejansko morje bil hodil, videl je dva brate, Šimuna, koj se zove Peter, i Andraša, njegvoga brata, ravno kad su hitali mreže vu morje ar su bili ribiči.
- I reče njim: „Hote za menum i načinim iz vas ljudih ribiče.“
- A oni sproti su ostavili svoje mreže i nasleduvali su njega.
- I kad bi odonud bil dalje odišel, videl je dva druge brate, Jakopa, sina Zebedejuševoga, i Januša, njegvoga brata, vu lađi z Zebedejušem, njihovem ocom, koji su popravljali svoje mreže i zval je nje.
- Oni pako mahom jesu ostavili mreže i svojega oca i odišli su za njim.
- I Ježuš je ophađal vsu Galileju i navučal vu njihoveh sinagogah ter prodekuval evangelijum Kraljestva i ozdravljal je vsaku mlahavost i vse betege med ljudmi.
- I razišel se je njegov glas po vsoj Siriji i donašali su k njemu vse koji si zlo čutili jesu i koji su z razlučnemi bolmi i mukami bili optršeni, takaj od vraga opseđene i mesečnjake i z gutum vudrene i zvračil je nje.
- I sleduvala je njega velika vnožina iz Galileje i iz Deset varašev i iz Jeruzalema i iz Judeje i iz one strani Jordana.
