Ivan Krstitel daje pitati Ježuša. Ježuševo očituvanje zvrhu Ivanovoga zvanja. Ivan i Krištuš obodva od Židovov zahičeni. Jaj zvrhu nespokorjeneh varašev. Mudri oslepljuju, a slabi se od Boga podvučaju. Jarem sladek i breme lehko.
- I včinjeno je, kad bi Ježuš bil dokončal navučati svojem dvanajstem vučenikom, odišel je odonud da bi vu njihoveh varaših vučil i prodekuval.
- Kad bi pako Ivan vu vuzi bil čul Krištuševe čine, poslal je dva zmed svojeh vučenikov
- i reče njemu: „Ti li si koj ima dojti ali drugoga čakamo?“
- I odgovori Ježuš i reče njim: „Hote, nazvestete Ivanu koja jeste čuli i videli.
- Slepi vidiju, hromi hodiju, gubavi se očiščavaju, gluhi čuju, mrtvi se gore staju, vbogem se nazveščuje evangelijum
- i blažen je koj se vu meni ne spači.“
- Kad bi pako oni bili odišli, počel je Ježuš ljudstvu govoriti od Ivana: „Kaj ste izišli gledat vu puščinu? Je li trstinu koja se od vetra sim pak tam giblje?
- Ali kaj ste izišli videt? Je li človeka mehkemi haljami oblečenoga? Nut, koji se vu mehke halje oblačiju, jesu vu kraljevskeh hižah.
- Ali kaj ste izišli videt? Je li proroka? Dapače, velim vam: i več nego proroka.
- Ar ov je on isti od kojega je pisano: ʻNut, ja pošiljam mojega angela pred tvojem licem koj bude tvoj put pred tobum pripravil.ʼ
- Stanovito velim vam: med onemi koji su od žen rođeni, né se vekši gore stal od Ivana Krstitela, koj pako je najmenjši vu Nebeskem kraljestvu, je vekši od njega.
- Od dnevov pako Ivana Krstitela tja do sada Nebesko kraljestvo trpi silu i siloviti nje grabe.
- Ar vsi proroki i Zakon jesu prorokuvali tja do Ivana
- i ako hočete prijeti, on je Elijaš koj dojti ima.
- Koj ima vuha na poslušanje, naj posluša!
- Komu pako prispodobim ov narod? On je spodoben deci koja sede na pijacu i kriče svojem pajdašem
- ter vele: ʻMi smo vam popevali, a vi neste plesali, mi smo narekali, a vi neste plakaliʼ.
- Ar je došel Ivan i ni jel niti pil i vele: ʻOn ima vragaʼ.
- Došel je Sin Človečji i je i pije i vele: ʻNut, ov človek je ožeruh i pijanec, prijatel publikanušev i grešnikov.ʼ I opravičena je mudrost od njihove dece.“
- Onda je počel spočitavati varašem vu kojeh je največ njegveh čud včinjeno kajti nesu činili pokoru.
- „Jaj tebi Korozajin! Jaj tebi Betšajida! Ar da bi vu Tirušu i Sidonu bila včinjena čuda koja su včinjena vu tebi, tak vre zdavna bi vu vreči i pepelu bili včinili pokoru.
- Ništar manje velim vam: Tirušu i Sidonu bude leglje na Sudnji dan nego vam.
- I ti Kafarnaum, je li se budeš do Nebes izvišaval? Ti budeš tja do pekla dole stupil. Ar da bi vu Sodomi bila včinjena čuda koja su vu tebi včinjena, morebiti bi do ovoga dneva bila ostala.
- Ništar manje velim vam da sodomskoj zemlji bude leglje na Sudnji dan nego tebi.“
- Vu onem vremenu odgovori Ježuš i reče: „Hvalu dajem tebi, Otec, gospon Neba i Zemlje, da si ova skril pred mudremi i spametnemi ter si nje očituval malahnem.
- Tak, Otec, ar ovak je bilo dopadno pred tobum!
- Vsa su meni predana od mojega Oca. I niti gdo pozna Sina, nego Otec, niti gdo pozna Oca, nego Sin i kojemu bude hotel Sin očituvati.
- Hote k meni vsi koji se trudite i jeste optršeni i ja vas okrepim.
- Vzemite moj jarem na se i vučete se od mene ar ja jesem krotek i iz srca ponizen i najdete pokoj vašem dušam.
- Ar moj jarem je sladek i moje breme lehko.“
