Krištuš raspošljuje dvanajst apoštolov, podvuča nje zvrhu njihovoga zvanja, podeljuje njim osebujnu oblast, preporuča njim mertučljivost vu vremeniteh dugovanjih, razbornost, trpljivnost, zaufanost pri nastajučem razjedinenju pokolenja človečanskoga, prenazveščuje im muke i obeča im pomoč i naplačenje.
- I skup zezvavši svojeh dvanajst apoštolov, dal je njim oblast zvrhu nečisteh duhov da bi nje izganjali i vračili vsaki beteg i vsaku nemoč.
- Imena pako oveh dvanajsteh apoštolov jesu ova: prvi Šimun, koj se zove Peter, i Andraš, njegov brat,
- Jakop, sin Zebedejušev, i Januš, njegov brat, Filip i Bartol, Tomaš i Matej publikanuš, Jakop, sin Alfejušev, i Tadejuš,
- Šimun Kananejanec i Judaš Iškariot, koj isti je njega izdal.
- Ove dvanajst je Ježuš poslal i njim zapovedal govoreči: „Na put k poganinom ne zahajajte se i vu varaše Samaritancev ne hote.
- Nego dapače hote k pogubljenem ovcam izraelske hiže.
- Iduči pako prodekujte govoreči: ʻBlizu je Kraljestvo nebesko!ʼ
- Betežne vračete, mrtve prebuđavajte, gubave očiščavajte, vrage izganjajte, zahman ste dobili, zahman davajte.
- Ne spravljajte na ladanje zlata niti srebra niti penez vu vaše pojase.
- Niti si na put ne vzemite torbe niti dveh halj niti obutelji niti palice ar delavec je vreden svoje hrane.
- Vu koj goder pako varaš ali selo zajdete, spitavajte gdo je vu njem vreden i tam ostanite doklam dalje pojdete.
- Kada pako vu hižu stupite, pozdravete ju govoreči: ʻMir budi ovoj hiži!ʼ
- I ako bude ona hiža vredna, tak dojde vaš mir zvrhu nje, ako pako ona ne bude vredna, vaš mir se nazad povrne na vas.
- I koj goder ne prima vas niti ne posluhne vaša govorenja, iz ovoga hiže ali varaša izidite i stepite prah iz vašeh nog.
- Stanovito velim vam: sodomskoj i gomorskoj zemlji bude na Sudnji dan podnesivleše nego onomu varašu.
- Nut, ja pošiljam vas kakti ovce v sredinu med vuke. Budite anda pametni kakti kače i priprosti kakti golubi.
- Čuvajte se pako od ljudih. Ar oni budu vas predavali na sud i vu svojeh sinagogah budu vas bičuvali.
- I pred poglavare i kralje budete peljani za moju volju, njim i poganinom na svedočanstvo.
- Kad vas pako predaju, ne skrbete se kak i kaj budete govorili ar se vam podelji vu onoj vuri kaj budete govorili.
- Ar vi neste oni koji govoriju, nego duh vašega Oca je koj vu vas govori.
- Izdaval pako bude brat brata na smrt i otec sina i sini budu se osavljali proti svojem roditelom ter nje vmarjali.
- I vi budete vsem odurni zaradi mojega imena. Koj pako opstoji do kraja, on bude zveličen.
- Kada vas pako budu preganjali vu ovem varašu, bežite vu drugi. Stanovito velim vam: vi ne obidete vse varaše izraelske doklam dojde Sin Človečji.
- Vučenik neje zvrhu navučitela niti sluga zvrhu svojega gospodara.
- Vučeniku je dosta ako li je kakti njegov navučitel, a slugi ako li je kakti njegov gospodar. Ako su gospodara Belzebubom imenuvali, kuliko bolje budu njegve domače ovak ozivali?
- Ne bojte se anda njih ar nikaj ni skritoga kaj se ne bi očituvalo i nikaj ni otajnoga kaj se ne bi zezvedelo.
- Kaj vam ja velim vu tmici, to vi povečte vu svetlosti i kaj vu vuho čujete, prodekujte zvrhu krovov.
- I ne bojte se oneh koji moreju vmoriti telo, duše pako ne moreju vmoriti. Dapače, bojte se onoga koj more i dušu i telo pogubiti v pekel.
- Ne li dva vrapci kupuju se za jeden đukes ter vendar ni jeden zmed njih ne opada na zemlju prez vašega Oca?
- Vsi pako lasi vaše glave jesu prebrojeni.
- Ne bojte se anda, vi ste od vnogeh vrapcov boljši.
- Vsaki anda koj bude mene pred ljudmi valuval, budem i ja njega valuval pred mojem Ocom koj je na Nebesih.
- Koj pako zataji mene pred ljudmi, njega i ja zatajim pred mojem Ocom koj je na Nebesih.
- Ne štimajte da sem došel mir davat na Zemlji, nesem došel mir davat, nego meč.
- Ar sem došel razdruževat človeka od svojega oca, kčer od svoje matere i snehu od svoje svekrve.
- I neprijateli človeka budu njegvi domači.
- Koj ljubi oca ali mater več nego mene, taj ni vreden mene i koj ljubi sina ali kčer več neg mene, taj ni vreden mene.
- I koj ne jemlje svoj križ i ne nasleduje mene, taj ni vreden mene.
- Koj najde svoju dušu, on zgubi nju i koj zgubi svoju dušu zarad mene, on najde nju.
- Koj vas prijemlje, on prijemlje mene, a koj mene prijemlje, on prijemlje onoga koj je mene poslal.
- Koj prijemlje proroka vu imenu proroka, taj dobi najem proroka, a koj pravičnoga prijemlje vu imenu pravičnoga, taj dobi najem pravičnoga.
- I koj goder jednomu zmed oveh najmenjšeh ponudi piti neg samo jeden pehar mrzle vode vu imenu vučenika, stanovito velim vam: on ne zgubi svoj najem.“
