Ozdravlenje gutum vudrenoga. Pozivanje Matejevo. Ježuš vuči buduče ponovlenje, ozdravlja one koji se lestor škrica njegve halje dotikavaju, osmehava se, obuđuje na živlenje dekliča, dvem slepem podeljuje viđenje, a jednomu nemomu govorenje. Velika čreda, malo pastirov; velika žetva, malo žnjačev.
- I on stupi vu ladjicu, prebrodi se i dojde vu svoj varaš.
- I, nut, doneseju pred njega nekojega gutum vudrenoga koj je ležal na postelji. I kad bi Ježuš bil videl njihovu veru, reče gutum vudrenomu: „Zaufaj, sinko, otpuščaju se tebi tvoji grehi.“
- I, nut, nekoji zmed pismoznancev rekli su vu sebi: „Ov blazni.“
- I kad bi Ježuš bil videl njihova mišlenja, reče: „Zakaj zlo mislite vu vašeh srcah?
- Kaj je lekše reči: ʻOtpuščaju se tebi tvoji grehi!ʼ ali reči: ʻStani se i hodi!ʼ?
- Da pako znali budete da Sin Človečji ima oblast na Zemlji grehe otpuščati.“ Onda reče gutum vudrenomu: „Stani se, vzemi postelju i odidi vu tvoju hižu!“
- I stal se je i odišel vu svoju hižu.
- Kaj kad bi ljudstvo bilo videlo, zbojalo se je i dičilo Boga koj je takvu oblast dal ljudem.
- I kad bi Ježuš odonud bil odišel, videl je človeka sedečega na malti, imenom Mateja. I reče njemu: „Nasleduj mene!“ I stal se je i nasleduval njega.
- I, nut, kad bi on vu hiži za stolom bil sedel, dogodilo se je da je vnogo publikanušev i grešnikov došlo koji su si z Ježušem i njegvemi vučeniki k stolu seli.
- Kaj kad bi farizejuši bili videli, rekli su njegvem vučenikom: „Zakaj vaš mešter je z publikanuši i grešniki?“
- Kaj kad bi Ježuš bil čul, reče: „Zdravi ne potrebuju vračitela, nego betežni.
- Pojte anda, pak se vučete kaj je to: ʻJa hoču milosrdnost, a ne aldov.ʼ Ar nesem došel zvat pravičneh, nego grešnikov.“
- Onda su pristupili k njemu vučeniki Ivana Krstitela govoreči: „Zakaj se mi i farizejuši ob tom gušče puti postimo, a tvoji se vučeniki ne postiju?“
- I reče njim Ježuš: „Je li se moreju svati zaručnikovi žalostiti dok je z njimi zaručnik? Dojdeju pako dnevi kad se od njih vzeme zaručnik i onda se oni budu postili.
- Nigdo pako ne meče krpu presnoga sukna na staru opravu ar krpa presna odere se skupa z rubom od oprave i prelo gorše postaje.
- Niti ne nalevaju novo vino vu stare mehe, drugač se raspucaju mehi i vino steče i mehi pod nikaj prejdu. Nego novo vino vlevaju vu nove mehe i obodvoje se obdrži.“
- Dok bi njim on ova bil govoril, nut, pristupi nekoj poglavnik i vklanjal se je njemu govoreči: „Gospone, moja kči je sada vumrla, nego hodi, položi na nju tvoju ruku i ožive.“
- I stal se je Ježuš i nasleduval njega i vučeniki njegvi.
- I, nut, nekoja žena koja je dvanajst let krvni otok trpela, pristupi odzad i dotekne se kraja njegve halje
- ar je rekla vu sebi: „Ako se neg doteknem njegve halje, tak ozdravim.“
- Obrne se pako Ježuš i kad bi nju bil videl reče: „Zaufaj se, kči! Tvoja vera je tebe zdravu včinila.“ I ozdravela je žena od one vure.
- Kad bi pako bil došel Ježuš vu hižu poglavnika i videl šipuša i halabučeče ljudstvo, reče:
- „Odstupete, ar deklička ni vumrla, nego spi!“ I oni se jesu iz njega zesmehavali.
- I kad bi ljudstvo van zegnjano bilo, stupi nuter i prime ju za njejinu ruku. I stala se je deklička.
- I razišel se je ov glas po vsoj onoj zemlji.
- I kad bi Ježuš odonud bil odišel, išli su za njim dva slepci koji su kričali i govorili: „Ti si sin Davidov, smiluj se nam!“
- Kad bi pako domom bil došel, pristupili su k njemu slepci i Ježuš reče njim: „Je li verujete da ja to vam včiniti morem?“ Rečeju njemu: „Zaisto, Gospone!“
- Onda se on dotekne njihoveh očih govoreči: „Naj vam bude poleg vaše vere!“
- I otprle se jesu njihove oči, a Ježuš zagrozi se njim govoreči: „Pazete se da nigdo ne zezvede.“
- Oni pak jesu izišli i njega razglašuvali po vsoj onoj zemlji.
- Kad bi pako oni bili izišli, nut, dopeljaju k njemu nekojega človeka koj je bil nem i duha nečistoga opseđen.
- I kad bi duh nečisti bil izegnjan, pregovori nemi, ljudstvo pako se je začudilo i govorilo: „Nigdar se nikaj takvoga ni videlo vu Izraelu!“
- Farizejuši pako jesu rekli: „On po vražjem poglavniku izganja vrage.“
- I Ježuš je vse varaše i gradišča ophađal i vučil vu njihoveh sinagogah, nazveščal evangelijum Kraljestva i vračil je vsaku mlahavost i vsaki beteg med ljudstvom.
- Kad bi pako on bil videl ljudstvo, smiluval se je nad njim ar je bilo raspršano i zapuščeno kakti ovce koje nemaju pastira.
- Onda reče svojem vučenikom: „Žetva doisto je velika, ali delavcev je malo.
- Prosete anda gospona žetve da pošlje delavcev vu svoju žetvu.“
