Krištuš zvrači gubavoga i slugu stotničkoga ter punicu Petrovu. Od Ježuševoga nasleduvanja. Krištuš vtišuje morje. Izganja dva vrage ter im dopušča da vu svinje vlesti smeju.
- Kad bi pako Ježuš iz brega bil dole došel, nasleduvala je njega velika vnožina ljudstva.
- I, nut, nekoj gubavec dojde i nakloni se njemu govoreči: „Gospone, ako hočeš, moreš me očistiti.“
- I pretegne Ježuš ruku i dotekne se njega govoreči: „Hoču, budi čist.“ I sproti je postal očiščen od svoje gube.
- I reče njemu Ježuš: „Pazi se da nikomu ne poveš, nego hodi, pokaži se aldovniku i alduj dar kojega je zapovedal Mojžeš njim na svedočanstvo.“
- Kad bi pako Ježuš vu Kafarnaum bil došel, pristupi k njemu nekoj stotnik koj ga je prosil
- i govoreči: „Gospone, moj dečak leži vu mojoj hiži gutum vudren ter se kruto muči.“
- I reče njemu Ježuš: „Ja dojdem i zvračim njega.“
- I odgovori stotnik ter reče: „Gospone, ja nesem vreden da ti dojdeš pod moj krov, nego reci samo jednu reč i moj dečak ozdrave.
- Ar i ja jesem človek pod oblastjum postavljen i imam pod sobum vojnike i kad velim ovomu: ʻIdi!ʼ, i ide i drugomu: ʻSim hodi!ʼ, i dojde i mojemu službeniku: ʻČini ovo!ʼ, i čini.“
- Kad bi pako Ježuš to bil čul, začudil se je i onem koji su za njim išli reče: „Stanovito velim vam: tulike vere nesem našel vu Izraelu!
- Velim pako vam da dojdeju vnogi od sunčenoga ishoda i zahoda i posedaju se z Abrahamom, Izakom i Jakopom vu Nebeskem kraljestvu,
- sini pako Kraljestva ishitiju se van vu zvunjske tmice; onde bude plač i škripanje zubih.“
- I reče Ježuš stotniku: „Hodi i kak si veruval, tak ti naj bude!“ I onu istu vuru je ozdravel njegov dečak.
- I kad bi Ježuš bil došel vu Petrovu hižu, videl je da njegva punica leži vu zimljici.
- I doteknul se je njejine ruke i ostavila je nju zimljica i ona se je stala i njim dvorila.
- Kad bi pako večer bil nastal, donašali su k njemu vnoge koji su bili od duhov nečisteh opseđeni i izganjal je duhe lestor z rečjum i vse betežne je zvračil
- da bi se spunilo kaj je rečeno po Izaijašu proroku govorečem: „On je naše nemočnosti na se vzel i naše betege on je nosil.“
- Kad je pako Ježuš vnožinu ljudstva okolo sebe videl, zapovedal je vučenikom prek morja prejti.
- I pristupi nekoj pismoznanec i reče njemu: „Mešter, ja te hoču nasleduvati kamgoder pojdeš.“
- Ježuš pako reče njemu: „Lisici imaju jame i ptice nebeske gnjezda, a Sin Človečji nema gde bi si glavu nagnul.“
- Nekoj drugi pako zmed njegveh vučenikov reče njemu: „Gospone, dopusti mi prvlje nazad domom iti i pokopati mojega oca.“
- Ježuš pako reče njemu: „Nasleduj mene i puščaj mrtve pokapati svoje mrtve.“
- I kad bi on bil stupil vu ladjicu, nasleduvali su njega njegvi vučeniki.
- I, nut, veliko zburkanje je nastalo na morju tak da bi se ladjica pokrivala od slapov, a on je spal.
- I pristupili su k njemu njegvi vučeniki i zbudili ga govoreči: „Gospone, pomozi nam, pogibamo!“
- I reče njim Ježuš: „Kaj ste tak bojazlivi, vi male vere ljudi?“ Onda se je gore stal i zapovedal vetrom i morju i postala je velika tišina.
- Ljudi se pako jesu čudili govoreči: „Kaj je ovo za jednoga da su mu vetri i morje pokorni?“
- I kad bi prek morja bil došel vu kotar Gerazencov, zdrčali su pred njega dva od duhov nečisteh opseđeni koji su iz grobov van izišli i bili su jako besni tak da po onem putu nigdo ni mogel hoditi.
- I, nut, kričali jesu govoreči: „Kaj je nam z tobum, Ježuš, Sin Božji? Ti li si sim došel nas pred vremenom mučiti?“
- Bila je pako nedaleko od njih čreda vnogeh svinj koje se jesu tam pasle.
- Duhi pako nečisti jesu njega prosili govoreči: „Ako nas otud isteraš, tak nam dopusti iti vu ovu čredu svinj.“
- I on reče njim: „Hote!“ Oni pako iziduči vleznuli jesu vu svinje i, nut, cela čreda je se z velikum naglostjum naglavce vu morje prekopitila i vu vodah potopila.
- Pastiri pako jesu odbežali i kad su došli vu varaš, nazvestili jesu vsa, takaj kaj se je z onemi dogodilo koji su bili od duhov nečisteh opseđeni.
- I, nut, ves varaš je pred Ježuša van izišel i kad su ga zgledali, prosili su njega da odide od njihoveh kotarov.
