Podaljšenje ovoga Gorskoga prodečtva. Habanje od prevzetnoga sudenja. Sveto mora se od oskrunenja opčuvati. Prosenje, iskanje i kučenje. Ljubav. Vuzek put. Vkanljivi proroki. Drevo i sad. Bog je sudec. Zidanje na dobrem temelju.
- „Ne sudete da ne budete suđeni.
- Ar z kakvem sudom sudite, z takvem budete suđeni i z kakvum merum merite, z takvum bude vam nazad merjeno.
- Kaj pak vidiš treščicu vu oku tvojega brata, a brvna ne vidiš vu tvojem oku?
- Ali kak moreš reči tvojemu bratu: ʻPusti da ishitim treščicu iz tvojega okaʼ, i, nut, brvno je vu tvojem oku?
- Skazlivec, ishiti prvič brvno iz tvojega oka i onda budeš videl treščicu iz oka tvojega brata ishititi.
- Ne dajte sveto psom niti ne hitajte vaše đunđe pred svinje da je morebiti ne pogaze z svojemi nogami i da se ne povrneju ter vas rastrgaju.
- Prosete i dâ se vam, iščite i najdete, kučete i otpre se vam!
- Ar vsaki koj prosi, dobiva i koj išče, najde i koj kuči, otpre se njemu.
- Ali koj je človek med vami kojega, ako li njega njegov sin bude prosil za kruh, je li mu bude kamen podal?
- Ali ako ga bude za ribu prosil, je li mu bude kaču podal?
- Ako anda vi, premda jeste hmanji, znate vašoj deci dobre dare davati, kuliko bolje bude vaš Otec, koj je na Nebesih, dal dobra onem koji ga za nje prosiju?
- Vse anda kaj goder hočete da ljudi naj vam činiju, to isto i vi njim včinete. Ar ovo je Zakon i proroki.
- Hote nuter čez vuska vrata ar su široka vrata i prostran put koj pelja vu pogublenje i vnogo ih je koji po njem hodiju.
- Kak vuska su vrata i tesen put koj pelja vu živlenje i malo ih je koji ga najdeju.
- Čuvajte se od vkanljiveh prorokov koji dohađaju k vam vu ovčeh haljah, a znutra su zgrabljivi vuki.
- Iz njihovoga sada spoznate nje. Je li se bere iz trnja grozdje ali iz kupinja fige?
- Ovak vsako dobro drevo donaša dober sad, a zločesto drevo donaša zločest sad.
- Dobro drevo ne more zločest sad roditi, a zločesto drevo ne more dober sad doprinašati.
- Vsako drevo koje ne donaša dober sad podseče se ter se hiti vu ogenj.
- Zato iz njihovoga sada spoznate nje.
- Ne vsaki koj veli meni: ʻGospone, Gospone!ʼ, dojde vu Nebesko kraljestvo, nego koj čini volju mojega Oca, koj je na Nebesih, on pojde vu Nebesko kraljestvo.
- Vnogi rečeju meni vu onem dnevu: ʻGospone, Gospone, je li nesmo mi vu tvojem imenu prorokuvali i vu tvojem imenu vrage zganjali i vu tvojem imenu vnoga čudačinstva včinili?ʼ
- I onda budem njim valuval: ʻJa vas nigdar nesem poznal, othađajte od mene vsi koji zlo činite!ʼ
- Vsaki anda koj goder posluša ove moje reči ter nje zvršava, prispodobi se mudromu človeku koj si je hižu na pečini zezidal.
- I opala je ploha i izišle su dereče vode i puhali su vetri ter navalili na onu hižu i nè se podrla ar je bila vtemeljena zvrhu pečine.
- I vsaki koj posluša ove moje reči ter nje ne zvršava, spodoben bude bedastomu človeku koj je svoju hižu na pesku zezidal.
- I opala je ploha i izišle su dereče vode i puhali su vetri ter navalili na onu hižu i zrušila se je i vrušenje njejine je veliko bilo.“
- I včinjeno je, kada bi Ježuš bil dokončal ove reči, osupnulo se je ljudstvo nad njegvem navukom.
- Ar je on nje vučil kakti kakov koj oblast ima, a ne kak njihovi pismoznanci i farizejuši.
