Ivanu Krstitelu vzeme se glava. Ježuš nahranjuje vu puščini čudnovitem načinom više jezer ljudih. Po dokončanoj samočnoj nočni molitvi hodi Ježuš po morju. Isti škric njegve halje zvrači.
- Vu onem vremenu čul je Herodeš, četrtostrančni ladavec, glas od Ježuša
- i reče svojem službenikom: „Ovo je Ivan Krstitel, on se je od mrtvih gore stal i zato čuda bivaju vu njem.“
- Ar Herodeš je vlovil Ivana i zvezal njega ter postavil vu vuzu zaradi Herodijašice, svojega brata žene.
- Ar Ivan je njemu govoril: „Tebi ni slobodno nje imati.“
- I hotel ga je vmoriti ali se je bojal ljudstva ar je njega kakti proroka preštimavalo.
- Na dan pako Herodeša narođeni plesala je kči Herodijašova vu sredini i dopalo se je Herodešu.
- Zato je njoj z prisegum obečal da joj da kaj goder bude od njega prosila.
- Ali ona vpučena od svoje matere, rekla je: „Daj mi ovde na zdeli glavu Ivana Krstitela.“
- I ražalostil se je kralj, medtemtoga zbog prisege i zbog oneh koji su skupa pri stolu sedeli zapovedal je dati.
- I poslal je i dal odseči glavu Ivanu vu vuzi.
- I donešena je njegva glava na zdeli i dana dekljiču i odnesla ju je svojoj materi.
- I pristupivši njegvi vučeniki odnesli su njegvo telo ter nje pokopali i iduvši nazvestili su Ježušu.
- Kaj kad bi čul bil Ježuš, ognul se je odonud vu lađici vu pusto mesto na samom i kad bi ljudstvo bilo začulo, nasleduvalo ga je pešice iz varašev.
- I iziduvši videl je vnogo naroda i smiluval se je nad njim i zvračil njihove betežnike.
- Kad bi pako večer bil nastal, pristupili su k njemu njegvi vučeniki govoreči: „Ovo mesto je pusto, a vura je vre prešla, otpusti to ljudstvo da odide vu sela i kupi si hranu.“
- Ježuš pako reče njim: „Ni im potrebno oditi, vi im dajte jesti.“
- Odgovorili su njemu: „Nemamo ovde nego samo pet hlebov i dve ribe.“
- On reče njim: „Donesite mi je sim.“
- I kad bi ljudstvu bil zapovedal posesti na seno, vzel je pet hlebov i dve ribe, pogledal vu nebo, nje blagoslovil i prelomil hlebe ter je nje dal vučenikom, vučeniki pako dali su je ljudstvu.
- I vsi su jeli i zasitili se. I pobrali su dvanajst puneh košar falatov koji su preostali.
- Broj pako oneh koji su jeli je bil pet jezer muškeh, zvun žen i dece.
- I sproti je Ježuš prisilil vučenike stupiti vu ladjicu i pred njim prek morja prejti doklam bi ljudstvo raspuščal.
- I kad bi ljudstvo bil raspuščal, izišel je na goru sam molit. Kad bi pako večer bil nastal, sam je bil onde.
- Ladjica pako na sredini morja hitala se je od morskeh slapov ar je bil suprotiven veter.
- Ob četrtem pako nočnem skoznuvanju došel je k njim hodeč po morju.
- I kad su ga videli po morju hoditi, prestrašili su se govoreči da je strašilo. I od straha su kričali.
- I sproti reče njim Ježuš govoreči: „Imajte zaufanost, ja jesem, najte se bojati.“
- Odgovorivši pako Peter reče: „Gospone, ako si ti, zapoveđ da ja po vodi k tebi dojdem.“
- On pako reče: „Dojdi!“ I izišel je Peter iz ladjice i hodil po vodi da bi k Ježušu došel.
- Kad bi pako silni veter videl, bojal se je i kad bi se vtapljati bil pričel, kričal je govoreči: „Gospone, oslobodi me!“
- I sproti je Ježuš pretegnul ruku, prijel njega i rekel njemu: „Ti malovernik, zakaj si dvojil?“
- I kad bi vu ladjicu bil stupil, prestal je veter.
- Koji su pako vu ladjici bili, došli su i vklanjali se njemu govoreči: „Za istinu Sin Božji jesi.“
- I kad bi se bili prek morja prepeljali, došli su vu zemlju Genezaret.
- I kad bi ga ljudi onoga mesta bili prepoznali, rasposlali su po vsem onem kotaru i donesli su k njemu vse betežne.
- I prosili su ga da bi se neg samo škrica njegve halje doteknuli. I koji se goder jesu doteknuli, jesu ozdraveli.
