Krištuš kudi spačljive farizejušev običaje, ozdravljuje kananejanske žene kčer i kajkakve druge betežne i nahranjuje z sedmemi hlebmi četiri jezera ljudih.
- Onda su k njemu pristupili iz Jeruzalema pisci i farizejuši govoreči:
- „Zakaj tvoji vučeniki prekršuju običaje starešeh? Ar si ne vmivaju svoje ruke kada kruh jeju.“
- On pako odgovorivši reče njim: „Zakaj i vi prekršujete zapovedi Božje zaradi vašeh običajev? Ar je Bog rekel:
- ʻPoštuj oca i mater i koj prekune oca ali mater, naj z smrtjum vumre.ʼ
- Vi pako velite ʻGdo goder rekel bude ocu ali materi: ‘Kakov goder dar ja aldujem, tebi bude hasnel.’ʼ
- Ov je vre spunil četrtu zapoved akoprem nigdar ne poštuje svojega oca ali svoje matere i zavrgli jeste zapoved Božju zarad vašeh običajev.
- Vi, skazlivci! Dobro je od vas prorokuval Izaijaš, govoreči:
- ʻOvo ljudstvo mene poštuje z vustmi, ali njihovo srce je daleko od mene.
- Ali zahman me poštuju pokehdob oni navuke i zapovedi človečanske vučiju.ʼ“
- I kad bi ljudstvo k sebi bil pozval, rekel je njim: „Poslušajte i razmite:
- kaj čez vusta nuter ide, ne oskrunuje človeka, nego kaj iz vust van ishađa, to oskrunuje človeka.“
- Onda su pristupili njegvi vučeniki i rekli njemu: „Je li znaš da se farizejuši jesu spačili kada su čuli ovu reč?“
- On pako odgovorivši je rekel: „Vsaki zasad kojega ni moj Otec nebeski zasadil bude se iskorenil.
- Pustete je. Oni su slepi i vođe slepeh. Ako pako slepi vodi slepoga, obodva vu jamu opadneju.“
- Odgovorivši pako Peter reče njemu: „Rastolnači nam ovu priliku.“
- A on reče: „Anda li ste i vi jošče prez razuma?
- Je li ne razmete da vse kaj vu vusta ide, vu trbuh dojde ter se vu kumernjak spušča?
- Koja pako iz vust ishađaju, ishađaju iz srca i ova oskrunuju človeka
- ar iz srca ishađaju zločesta mišlenja, ljudomorstva, lotrovanja, praznosti, tatbine, kriva svedočanstva, blaznosti.
- Ova jesu koja oskrunuju človeka. Z nevmivenemi pako rukami jesti, to ne oskrunuje človeka.“
- I kad bi Ježuš odonud bil odišel, povdal se je na strani Tiruša i Sidona.
- I, nut, nekoja kananejanska žena, koja je iz oneh kotarov izišla, kričala je za njim govoreča: „Gospone, Sin Davidov, smiluj se meni, moja kči zlo se muči od vraga.“
- On joj pako niti reči ni odgovoril. I pristupivši njegvi vučeniki prosili ga jesu govoreči: „Otpusti ju ar kriči za nami.“
- On pako odgovorivši reče: „Nesem poslan, nego k pogubljenem ovcam hiže izraelske.“
- Ona pako dojde i nakloni se njemu govoreča: „Gospone, pomozi mi!“
- On odgovorivši reče: „Ni dobro vzeti kruh sinov i hitati ga pred pse.“
- Ona pako reče: „Dapače, Gospone, ar i ščeniči jeju od droptinja koje opada iz stola njihoveh gosponov.“
- Onda odgovorivši Ježuš reče njoj: „O, žena, velika je tvoja vera! Naj ti bude kak hočeš.“ I ozdravela je njejina kči od one vure.
- I kad bi Ježuš odonud bil odišel, došel je k Galilejanskomu morju i izišel je na breg i onde si je vsel.
- I pristupila je k njemu vnožina ljudstva koje z sobum je imalo neme, slepe, šantave, slabe i vnoge druge i polagali su je k njegvem nogam i on je nje zvračil
- tak da se je čudilo ljudstvo pokehdob su videli neme govoriti, šantave hoditi, slepe videti i dičili su Boga izraelskoga.
- I kad bi Ježuš skup zezval bil svoje vučenike, je rekel: „Milo mi je ljudstva ar vre tri dni ostaje pri meni i nema kaj bi jelo, a tešče neču je otpustiti da ne bi opešalo na putu.“
- I rečeju njemu vučeniki: „Otkud anda vzememo vu puščini tuliko kruha da bi tuliko ljudstva zasitili?“
- I reče njim Ježuš: „Kuliko hlebov kruha imate?“ A oni su rekli: „Sedem i nekuliko ribic.“
- I zapovedal je ljudstvu da bi poselo na zemlju.
- I on je vzel oveh sedem hlebov i ribice, zahvalil i prelomil nje i dal je svojem vučenikom, vučeniki pako dali su ljudstvu.
- I vsi su jeli i zasitili se. I falacev koji su preostali nabrali su sedem puneh košar.
- Oneh pako koji su jeli, bilo ih je četiri jezera ljudih, zvun dece i žen.
- I kad bi ljudstvo bil otpustil, stupil je vu ladjicu i došel vu kraje Magedan.
