Farizejuši i saducejuši potrebuju znamenje iz Neba, ali Ježuš ne daje njim drugo kak Jonaša proroka, svoje vučenike odgovarja od farizejuškoga i saducejuškoga kvasa. Valuvanje i pretpostavlanje svetoga Petra. Krištuš nazvešča svoje muke, smrt i gorestajanje i kara Petra koj ga od toga zdržati hoče; opominja vse na ljubav križa i na krotenje tela.
- I pristupili su k njemu farizejuši i saducejuši da bi ga skušavali i prosili su ga da bi im znamenje iz Neba pokazal.
- On pako odgovorivši reče njim: „Kad večer nastaje, onda velite: ʻVedro bude ar je črleno nebo.ʼ
- A vu jutro: ʻDenes bude halabuka ar se tužno črleni nebo.ʼ
- Anda spodobu neba znate rasuditi, znamena pako časov ne morete znati? Zločesto i lotersko pokolenje prosi znamenje i znamenje se njemu ne da, nego znamenje Jonaša proroka.“ I ostavivši nje, je odišel.
- I kad bi njegvi vučeniki prek morja bili došli, pozabili su z sobum kruha vzeti.
- On reče njim: „Gledajte i čuvajte se od farizejuškoga i saducejuškoga kvasa.“
- Oni su pako vu sebi mislili med sobum govoreči: „Kajti nesmo vzeli kruha?“
- Ježuš pako, koj je to znal, je rekel: „Vi, maloverniki! Kaj mislite vu sebi kajti kruha nemate?
- Kaj jošče ne razmete niti se ne spominjate iz pet hlebov kruha z kojemi se je pet jezer ljudih zasitilo i kuliko košar jeste pobrali?
- Niti iz sedem hlebov kruha med četiri jezera ljudih razdeljenoga i kuliko košar jeste pobrali.
- Zakaj ne razmete da nesem od kruha govoril (kad sem rekel): ʻČuvajte se od farizejuškoga i saducejuškoga kvasaʼ?“
- Onda su razmeli da ni rekel: „Čuvajte se od krušnoga kvasa“, nego: „od navuka farizejušev i saducejušev“.
- Kad bi pako Ježuš vu strane varaša Cezareje Filipa bil došel, pital je svoje vučenike govoreči: „Kaj govoriju ljudi, gdo je Sin Človečji?“
- A oni su rekli: „Jedni govoriju da je Ivan Krstitel, jedni da je Elijaš, a drugi da je Jeremijaš ali koj zmed prorokov.“
- Reče njim Ježuš: „Kaj pako vi velite, gdo sem ja?“
- Odgovori Šimun Peter i reče: „Ti si Krištuš, Sin živoga Boga.“
- Odgovori njemu Ježuš i reče: „Blažen jesi, Šimun, sin Jonašev, ar telo i krv neje tebi toga očituvala nego moj Otec koj je na Nebesih.“
- I ja velim tebi, ti si Peter i zvrhu ove pečine podignem moju Cirkvu i vrata peklenska nju ne premoreju.
- I tebi dam ključe Kraljestva nebeskoga. I kaj goder zavežeš na Zemlji, bude zavezano i vu Nebesih. I kaj goder odvežeš na Zemlji, bude odvezano i vu Nebesih.
- Onda je prepovedal svojem vučenikom da ne bi nikomu povedali da je on Ježuš Krištuš.
- Od onoga časa je počel Ježuš obznanuvati svojem vučenikom da je njemu potrebno iti vu Jeruzalem i vnoga trpeti od starešin, piscev i poglavarov aldovničkeh i vmoriti se i tretji dan gore stati.
- Peter pako vzel ga je na stran i počel ga je karati govoreči: „Nigdar, Gospone, naj se to tebi ne pripeti!“
- On se pako obrne i reče Petru: „Othađaj od mene, Šatan, ti si mi na spačku ar ne razmeš ona koja su Božja, nego ona koja su človečanska.“
- Onda reče Ježuš svojem vučenikom: „Ako gdo za menum hoče iti, on naj zataji samoga sebe i naj vzeme svoj križ ter naj mene nasleduje.
- Ar koj bude hotel svoju dušu opčuvati, pogubi nju, koj pako pogubi svoju dušu zbog mene, najde nju.
- Ar kaj hasni človeku ako on ves svet dobi, dušu pako svoju pogubi? Ali kakvu zamembu bude dal človek za svoju dušu?
- Ar Sin Človečji bude došel vu diki svojega Oca z svojemi angelmi i onda povrne svakomu poleg njegveh delih.
- Stanovito velim vam: jesu nekoji zmed ovde stoječeh koji ne budu kušali smrti doklam ne budu videli Sina Človečjega dojdučega vu svojem kraljestvu.“
