Preobraženje Krištuševo. Došestek Elijašev. Zvračenje nekojega mesečljivoga dečaka. Krepost vere zjedinjene z molitvum i postom. Ježuš nazvešča svoje muke i dava daču za se i za Petra.
- I za šestemi dnevi vzel je Ježuš z sobum Petra i Jakopa i Januša, njegvoga brata, i otpeljal je nje na visoku goru nasamom
- i preobrazil se je pred njimi. I presvetilo se je njegvo lice kakti Sunce, oprava pako njegva je postala bela kakti sneg.
- I, nut, iskazali su se njim Mojžeš i Elijaš z njim govoreči.
- Odgovori pako Peter i reče Ježušu: „Gospone, dobro je nam ovde biti, ako hočeš, napravemo ovde tri šatore: tebi jednoga, Mojžešu jednoga i Elijašu jednoga.“
- Dok bi jošče on govoril, nut, svetli oblak je nje opstrl. I, nut, glas iz oblaka govoreči: „Ovo je moj ljubljeni Sin vu kojem se je meni dobro dopalo, njega poslušajte!“
- Kaj kad bi vučeniki bili čuli, opali su na svoje lice ter su se kruto zbojali.
- I pristupi Ježuš ter se ih dotekne i reče njim: „Stanite se i najte se bojati!“
- Kad bi pako bili podignuli svoje oči, nikoga nesu videli, nego samoga Ježuša.
- I kad bi oni iz gore dole bili išli, je njim Ježuš zapovedal govoreči: „Nikomu ne povedajte ovoga viđenja doklam Sin Človečji od mrtveh gore ne stane!“
- I pitali su ga vučeniki govoreči: „Zakaj anda pisci vele da Elijaš prvlje dojti mora?“
- On pako odgovorivši reče njim: „Elijaš bude zaisto došel i vsa nazad popravil,
- velim pako vam da je Elijaš vre došel i nesu ga spoznali, nego su z njim včinili kaj su goder hoteli. Ovak i Sin Človečji bude od njih trpel.“
- Onda su vučeniki razmeli da im je od Ivana Krstitela govoril.
- I kad bi k ljudstvu bil došel, pristupil je k njemu nekoj človek koj se je pred njega na kolena hitil govoreči: „Gospone, smiluj se nad mojem sinom ar je mesečnjak i zlo se muči ar večkrat opada vu ogenj i gustokrat vu vodu.
- I dopeljal sem ga k tvojem vučenikom i nesu ga mogli zvračiti.“
- Ježuš pako odgovorivši reče: „O, neverno i spačljivo pokolenje! Kak dugo budem z vami? Kak dugo budem vas trpel? Donesite ga sim k meni!“
- I Ježuš se je njemu zagrozil i izišel je iz njega vrag i od one vure je ozdravel dečak.
- Onda su vučeniki k Ježušu skrovce pristupili i rekli: „Zakaj ga mi nesmo mogli van zegnati?“
- Reče njim Ježuš: „Zaradi vaše nevernosti. Ar stanovito velim vam: ako budete imeli vere za jedno muštardovo zrno, tak morete reči ovomu bregu: ʻPomekni se otud tam!ʼ i on se pomekne i nikaj vam ne bude nemoguče.
- Ova pako fela ne izganja se, nego po molitvi i postu.“
- Dok se bi pako vu Galileji bili zadržavali, reče njim Ježuš: „Sin Človečji bude se predal ljudem vu ruke.
- I oni budu njega vmorili i tretji dan bude gore stal.“ I kruto se jako jesu ražalostili.
- I kad bi vu Kafarnaum bili došli, pristupili su k Petru oni koji su štibru prijemali i rekli su njemu: „Kaj vaš mešter ne plača štibre?“
- On reče: „Nekak da plača.“ I kad bi vu hižu bil zašel, pretekel je njega Ježuš govoreči: „Šimun, kaj se tebi vidi, od kojeh jemlju kralji zemeljski daču ili štibru: od svojeh sinov ali od tuđeh?“
- A on reče: „Od tuđeh.“ Reče njemu Ježuš: „Anda su sini slobodni.
- Da je pako ne spačimo, hodi k morju i hiti vudicu ter onu ribu koja prvič gore dojde potegni van i otpri njejin gubec i najdeš penez. Njega vzemi i daj ga njim za me i za te.“
