Nerazdružljivost hižnoga zakona. Dobrovoljno devojačtvo je nebeski dar. Na drobnu decu postavlja ruke. Tolnač Krištušev čini bogatoga mladenca žalosnoga. Bogati se teško zveličiju. Koj vsa ostavlja, on se velike plače ima nadejati.
- I včinjeno je, kad bi Ježuš bil dokončal ovo govorenje, odišel je iz Galileje i došel vu krajnje Judeje prek Jordana
- i nasleduvala je njega vnožina ljudstva ter nje onde je zvračil.
- I pristupili su k njemu farizejuši ter su ga skušavali govoreči: „Je li je človeku slobodno otpustiti svoju ženu zbog kakvoga goder zroka?“
- On pako odgovori i reče njim: „Je li neste čteli da on, koj je iz početka stvoril človeka, muža i ženu je nje stvoril i rekel:
- ʻZbog toga ostavi človek oca i mater ter se pridruži k svojoj ženi i budu dva v jednem telu.ʼ
- Tak anda vre nesu dva, nego jedno telo. Kaj je anda Bog združil, to človek naj ne razdružuje.“
- Oni rečeju njemu: „Pak zakaj je Mojžeš zapovedal dati raspitni list ter ženu otpustiti?“
- Reče njim: „Kajti je Mojžeš zbog tvrdokornosti vašega srca vam dopustil otpustiti vaše žene, ali iz početka ni tak bilo.
- Velim pako vam da koj goder otpusti svoju ženu, zvun zbog kurvarije, i drugu vzeme, praznuje i koj otpuščenu vzeme, praznuje.“
- Rečeju njemu njegvi vučeniki: „Ako se dugovanje človeka z ženum tak ima, tak se ni dobro ženiti.“
- Reče njim: „Vsi ne razmeju ovu reč, nego samo oni kojem je dano.
- Ar je skopljenikov koji se jesu iz materinske vutrobe ovak porodili i jesu skopljeniki koji su od ljudih skopljeni i jesu skopljeniki koji se sami jesu skopili zaradi Kraljestva nebeskoga. Koj more razmeti, naj razme.“
- Onda su bila k njemu dopeljana deca da bi na nje ruke položil i zvrhu njih molil. Vučeniki pako jesu nje karali.
- Ježuš pako reče njim: „Puščajte decu i najte joj braniti k meni dohađati ar takoveh je Kraljestvo nebesko.“
- I kad bi na nje ruke bil položil, odišel je odonud.
- I, nut, pristupi nekoj i reče njemu: „Dobri mešter, kaj mi je dobroga včiniti da zadobim vekivečno živlenje?“
- On reče njemu: „Kaj me spitavaš od dobra? Jedini Bog je dober. Ako pako hočeš zajti vu žitek, obdržavaj zapovedi!“
- Reče njemu: „Koje?“ Ježuš pako reče: „Ne vmarjaj, ne praznuj, ne kradi, ne govori krivo svedočanstvo,
- poštuj tvojega oca i tvoju mater i ljubi bližnjega tvojega kak samoga sebe.“
- Reče njemu mladenec: „Vsa ova jesem obdržaval od moje mladosti. Kaj mi jošče menjka?“
- Reče njemu Ježuš: „Ako hočeš zvršen biti, hodi, podaj vsa koja imaš i daj siromakom i budeš imal kinč na Nebu i dojdi ter nasleduj mene.“
- Kad bi pako mladenec tu reč bil čul, odišel je žalosten ar je imal vnoga imanja.
- Ježuš pako reče svojem vučenikom: „Stanovito velim vam da bogati teško ide vu Kraljestvo nebesko.
- Ali ipak velim vam: lekše je gamili čez šivanjke luknju prejti kak bogatomu vlesti vu Kraljestvo nebesko.“
- Kaj kad bi njegvi vučeniki bili čuli, jako se jesu čudili govoreči: „Tak anda gdo se bude mogel zveličiti?“
- Ježuš pako pogleda nje i reče njim: „Pri ljudih je to nemoguče, ali pri Bogu vsa su moguča.“
- Onda odgovori Peter i reče njemu: „Nut, mi smo vsa ostavili i tebe nasleduvali. Anda, kaj budemo zato imali?“
- Ježuš pako reče njim: „Stanovito velim vam da vi, koji ste mene nasleduvali, vu preporođenju, kada Sin Človečji sedel bude na stolici svojega veličanstva, takaj na dvanajsteh stolicah budete sedeli i sudili dvanajstero pokolenje izraelsko.
- I vsaki koj ostavi ali hižu ali brate ali sestre ali oca ali mater ali ženu ali decu ali polja zaradi mojega imena, bude stokrat tuliko dobil i vekivečni žitek ladal.
- Vnogi pako koji su prvi, budu poslednji, a poslednji budu prvi. “
