Ježušev vuhod vu Jeruzalem. Izganjanje kupcev i tršcev iz Cirkve. Hvala iz dečinskih vust. Preklinanje figovoga dreva i moč molitve. Opšanenje aldovničkeh poglavarov po pitanjih i prilikah od dveh sinov i zločesteh zidarov.
- I kad bi se bili približavali k Jeruzalemu i došli vu Betfage do Olivetanske gore, onda je Ježuš poslal dva vučenike
- govoreči njim: „Hote vu ovu ves koja je pred vami i taki najdete oslicu privezanu i žrebe z njum: odvežite ju i dopeljajte ju meni!
- I ako vam gdo kaj bude govoril, recite da ih je Gosponu potrebno.“ i mahom je otpusti.
- Vse pako ovo je včinjeno da bi se ispunilo kaj je rečeno po proroku govorečem:
- „Povečte kčeri sionskoj: ʻNut, tvoj kralj dohađa k tebi krotek, sedeč na oslici i na žrepcu vozne oslice.ʼ“
- Vučeniki pako jesu odišli i včinili tak kak je njim zapovedal Ježuš.
- I dopeljali su oslicu i žrepca i prestrli su na nje svoje halje i njega su gore posadili.
- Velika pako vnožina ljudstva je prestirala svoje halje po putu, drugi pako jesu sekli svržje iz drevja i nastirali po putu,
- ljudstvo pako, koje je napred išlo i odzad nasleduvalo, je kričalo govoreče: „Hozana, Sinu Davidovomu! Blagoslovljen koj je došel vu ime Gosponovo! Hozana na visini!“
- I kad bi vu Jeruzalem bil zašel, zbučil se je ves varaš govoreči: „Gdo je to?“
- Ljudstvo pako je govorilo: „Ovo je Ježuš, prorok od Nazareta iz Galileje.“
- I išel je Ježuš nuter vu Cirkvu Božju i izegnal je vse prodavce i kupce vu Cirkvi i prevrnul je stole penez menjavcev i sedališča prodavcov golube.
- I reče njim: „Pisano je: ʻMoja hiža bude se zvala hiža molitveʼ, a vi ste iz nje napravili ʻjamu tolvajsku.ʼ“
- I pristupili su k njemu vu Cirkvi slepi i šantavi i zvračil je nje.
- Kad bi pako poglavari aldovnički i pismoznanci bili videli čuda koja je včinil i decu kričeču vu Cirkvi i govoreču: „Hozana, Sinu Davidovomu!“, srdili se jesu.
- I rekli njemu: „Je li čuješ kaj ovi govoriju?“ Ježuš pako reče njim: „Nekak da čujem, kaj neste nigdar čteli da iz vust maleneh i sesnujučeh pribavil si jesi hvalu?“
- I ostavivši nje, izišel je van zvun varaša vu Betaniju i onde je ostal.
- Vu jutro pako, kad bi se bil povrnul vu varaš, je bil ogladel.
- I kad bi kraj puta bil videl jedno figovo drevo, išel je k njemu i nikaj ni na njem našel kak samo listje i reče njemu: „Naj se nigdar više iz tebe ne raja sad naveke.“ I on čas je posehnulo ovo figovo drevo.
- Kaj kad bi vučeniki bili videli, čudili se jesu govoreči: „Kak je to figovo drevo mahom posehnulo.“
- Ježuš pako odgovorivši reče njim: „Stanovito velim vam: ako budete imali veru i ne budete dvojili, tak to ne budete samo figovomu drevu včinili, nego takaj ako rečete ovoj gori: ʻZdigni se i hiti se vu morje!ʼ, dogodi se.
- I vsa za koja goder vi vu molitvi budete prosili, zadobite ako budete veruvali.“
- I kad bi vu Cirkvu bil došel, pristupili su k njemu, ravno kad je vučil, poglavari aldovnički i starešine ljudstva govoreči: „Vu kakvoj oblasti ova činiš i gdo ti je dal ovu oblast?“
- Ježuš odgovorivši reče njim: „I ja vas budem jednu reč pital koju ako mi povete, onda i ja vam povem vu kakvoj oblasti ja ova činim.
- Krst Ivanov otkud je bil, iz Neba ali od ljudih?“ Oni pako jesu vu sebi premišljavali govoreči:
- „Ako rečemo: ʻIz Nebaʼ, reče nam: ʻZakaj anda neste njemu veruvali?ʼ Ako pako rečemo: ʻOd ljudihʼ, bojimo se ljudstva ar vsi jesu Ivana kakti za proroka držali.“
- I odgovorivši Ježušu jesu rekli: „Ne znamo.“ Onda reče njim i on: „Tak vam niti ja ne povem vu kakvoj oblasti ja ova činim.
- Kaj se pako vam vidi? Nekoj človek je imal dva sine i stupivši k prvomu, reče: ʻSinko, hodi, delaj danas vu mojem vinogradu.ʼ
- On pako odgovorivši reče: ʻNeču!ʼ Potlam pako mu je bilo žal i odišel je vu vinograd delat.
- Pristupivši pako k drugomu, reče njemu ravno tak. On pako odgovorivši reče: ʻIdem, gospone!ʼ Pak ni išel.
- Koj je zmed oveh dveh spunil volju oca?“ Rečeju njemu: „Prveši.“ Reče njim Ježuš: „Stanovito velim vam da publikanuši i kurve pred vami pojdeju vu Kraljestvo Božje.
- Ar je došel k vam Ivan po putu pravice i neste njemu veruvali, publikanuši pako i kurve jesu njemu veruvali, vi pako akoprem ste videli, neste se niti potlam spokorili da bi njemu veruvali.
- Poslušajte drugu priliku: bil je nekoj človek hižni gospodar koj je zasadil vinograd i njega z plotom obgradil i skopal je vu njem prešu i zezidal turen i zamitil je njega poljodelavcem i povdal se je na put.
- Kad bi se pako vreme bratve bilo približavalo, pošlje svoje sluge k poljodelavcem da bi njegov dohodak pobrali.
- Poljodelavci pako pograbivši njegve sluge nekojega su zbili, nekojega vubili, nekojega pako jesu kamenuvali.
- On je ipak druge sluge poslal več od teh prveh i njim su ravno tak včinili.
- Zadnjič pako poslal je k njim svojega sina govoreči: ʻMojega sina budu se bojali.ʼ
- Ali kad bi poljodelavci bili videli sina, rekli su med sobum: ʻOvo je odvetek, hote, vubijmo njega i budemo njegvo odvečtvo ladali.ʼ
- I pograbivši njega, ishitili su ga iz vinograda i vubili.
- Kada anda gospon vinograda dojde, kaj bude včinil onem poljodelavcom?“
- Veliju njemu: „Zločeste bude zlo pogubil, a svoj vinograd bude zamitil drugem poljodelavcom koji njemu budu davali sad ob svojem vremenu.“
- Reče njim Ježuš: „Je li nigdar neste čteli vu pismih: ʻKamen kojega su zavrgli zidari, on včinjen je za glavu vugla. To je včinjeno od Gospona i je čudnovito vu našeh očih.ʼ?
- Zato velim vam da se Kraljestvo Božje od vas bude vzelo ter se da narodu koj bude njegov sad doprinašal.
- I koj na ov kamen opadne, razbije se, na koga pako ov kamen opade, njega zdrobi.“
- I kad bi poglavari aldovnički i farizejuši bili čuli njegve prilike, spoznali su da on od njih govori.
- I iskali jesu priliku kak bi njega vloviti mogli, ali se ljudstva jesu bojali ar su njega kakti za proroka držali.
