Krištuš opomina na poslušanje oneh koji sediju na Mojžeševi stolici. Oholnost, želja za dobičkom i skazlivost farizejušev. Krištuš izgovarja jaj zvrhu njih i nazvešča porušenje varaša Jeruzalem.
- Onda je govoril Ježuš ljudstvu i svojem vučenikom
- govoreči: „Na Mojžešovu stolicu jesu se seli pisci i farizejuši.
- Vsa anda, koja goder vam rečeju, obdržavajte i činete, poleg njihoveh pako del ne činete ar oni veliju, a ne činiju.“
- Ar navežuju teške i nepodneslive trhe i nje ljudem na ramena nalažeju, sami se ih pako niti z jednem svojem prstom nečeju doteknuti.
- Vsa pako svoja dela činiju da se vidiju od ljudih ar raširavaju svoje Zakona napise i rube svojeh oprav načinaju velike.
- I ljubiju pri večerjah prva mesta, a vu sinagogah prva sedališča.
- I na trgih pozdravlenja ter da se od ljudih zoveju ʻrabiʼ.
- Vi pako ne dajte se ozivati ʻrabiʼ ar je jeden sam vaš Mešter, vi ste si pako vsi bratja.
- I nikoga na Zemlji ne zovite za vašega oca ar je jeden vaš Otec koj je vu Nebesih.
- Niti se ne dajte zvati za navučitele ar je jeden sam vaš Navučitel, Krištuš.
- Koj je med vami najvekši, naj bude vaš službenik.
- Koj goder pako samoga sebe izvišava, bude se ponizil i koj goder samoga sebe ponizuje, bude se izvisil.
- Jaj pako vam, pisci i farizejuši, vi skazlivci, koji Kraljestvo nebesko pred ljudmi zapirate! Ar vi sami nuter nejdete, a one koji hočeju nuter iti, ne puščate nuter vlesti.
- Jaj vam, pisci i farizejuši, vi skazlivci, koji požirate hiže vdovic z tem izgovorom da dugo molite! Zbog toga nadojde zvrhu vas oštreši sud.
- Jaj vam, pisci i farizejuši, vi skazlivci, koji okolo hodite po morju i po suhoj zemlji da jednoga obrnete na vašu veru i kad je obrnjen, včinite njega sina peklenskoga dvakrat bolje kak ste vi sami.
- Jaj vam, vi slepi vođe, koji velite: ʻKoj goder priseže na Cirkvu, to ni nikaj, koj pako priseže na cirkveno zlato, dužen je prisegu držati.ʼ
- Vi bedaki i slepci, ar kaj je več: zlato ali Cirkva koja posvečuje zlato?
- ʻI koj goder priseže na oltar, to ni nikaj, koj goder pako priseže na dar koj je na njem, dužen je.ʼ
- Vi slepci! Ar kaj je vekše: dar ali oltar koj posvečuje dar?
- Koj anda prisiže na oltar, on prisiže na njega i na vsa koja su na njem.
- I koj goder prisiže na Cirkvu, prisiže na nju i na onoga koj vu njoj prebiva.
- I koj prisiže na Nebo, prisiže na stolicu Božju i na onoga koj na njoj sedi.
- Jaj vam, pisci i farizejuši, vi skazlivci, koji desetinite meticu, koper i kumin, zapuščate pako ona koja su osebujneša Zakona: sud, milosrdnost i veru. Ova se moraju včiniti, a ona ne zapuščati!
- Vi, slepi vođe, koji precejate komare, a gamilu požirate!
- Jaj vam, pisci i farizejuši, vi skazlivci, koji zvana čistite vaš pehar i zdelu, a znutra jeste puni zgrabljivosti i nečistoče!
- Ti, slepi farizejuš, očisti prvlje to znutrešnje pehara i zdele da takaj ono kaj je zvana, čisto postane.
- Jaj vam, pisci i farizejuši, vi skazlivci, koji ste spodobni k pobeljenem grobom koji se zvana vidiju ljudem lepi, znutra pako jesu puni mrtvečkeh kostih i vsakojačkoga smrada.
- Tak se i vi vidite ljudem zvana pravični, znutra pako jeste puni skazlivosti i krivičnosti.
- Jaj vam, pisci i farizejuši, vi skazlivci, koji ziđete grobe prorokov i kinčite pokopališča pravičneh
- i velite: ʻDa smo mi bili vu dnevih našeh ocov, ne bi bili z njimi delniki vu krvi prorokov.ʼ
- Anda vi sami proti sebi svedočite pokehdob ste sini oneh koji su vmorili proroke
- i vi napunjavajte meru vašeh ocov.
- Vi, kače, i gadovo leglo! Kak budete sudu peklenskomu vušli?
- Zato, nut, ja pošiljam k vam proroke i mudre i pisce i zmed njih nekoje budete vmarjali i raspinjali, zmed njih nekoje budete vu vašeh sinagogah bičuvali i budete nje preganjali od varaša do varaša.
- Da dojde zvrhu vas vsa pravična krv koja je na zemlju prelejana, od krvi pravičnoga Abela do krvi Zakarijaša, sina Barakijaševoga, kojega ste vmorili med Cirkvom i oltarom.
- Stanovito velim vam da vsa ova dojdeju zvrhu ovoga pokolenja.
- Jeruzalem, Jeruzalem, koj vmarjaš proroke i kamenuješ one koji su k tebi poslati, kuliko krat sem hotel skup spraviti tvoje sine kak spravlja kokoš svoje piščence pod kreljuti i ti nesi hotel!
- Nut, ostavi se vam vaša hiža pusta!
- Ar velim vam, od vezda vre ne budete videli mene doklam ne rečete: ʻNaj bude blagoslovljen koj dohađa vu Gosponovem imenu!ʼ“
