Ježuš govori od znamenj koja pred porušenjem Jeruzalema i Cirkve i pred koncom sveta nadojdeju. Vreme toga je istem angelom neznano zbog česa je morati zmir skoznuvati i na došestek Gosponov vsigdar pripravnomu biti.
- I kad je Ježuš iz Cirkve van izišel, proč se je povdal. I pristupili su njegvi vučeniki da bi mu Cirkvena stanja pokazali.
- On pako odgovorivši reče njim: „Je li vidite vsa ova? Stanovito velim vam: ne ostavi se ovde kamen na kamenu koj ne bude razvaljen.“
- Kad bi pako sedel na Olivetanskoj gori, pristupili su k njemu vučeniki nasamom govoreči: „Poveđ nam kada budu ova? I kakvo bude znamenje tvojega došestka i skončanja sveta?“
- I odgovorivši Ježuš reče njim: „Pazete da vas gdo ne napelja.
- Ar vnogi dojdeju vu mojem imenu govoreči: ʻJa jesem Krištušʼi vnoge zapeljaju.
- Ar čuli budete boje i glase bojov. Pazete da se ne zmutite ar vsa ova moraju bivati, ali jošče ni konec.
- Ar se podigne narod proti narodu i kraljestvo proti kraljestvu i bude pomor i glad i potresi na vnogeh mestah.
- Vsa ova pako jesu lestor početek žalostih.
- Onda izdaju vas na muke i vmoriju vas i budete odurni vsem narodom zbog mojega imena.
- I onda se vnogi budu spačili i med sobum izdavali i jeden drugoga odurjavali.
- I podigneju se vnogi krivi proroki i zapeljaju vnoge.
- Ter pokehdob da obiljuje krivičnost, bude ljubav vnogeh ohladela.
- Koj pako opstoji do konca, on se zveliči.
- I ov evangelijum Kraljestva bude se po vsem svetu nazveščal na svedočanstvo vsem narodom i onda nadojde konec.
- Kada anda videli budete odurnost opustenja, koja je po Danijelu proroku povedana, da stoji na svetem mestu – koj čteje, naj pazi!
- Onda, koji su vu Judeji, naj beže na gore.
- I koj je na krovu, naj nejde dole da bi kaj vzel iz svoje hiže.
- I koj je na polju, naj se ne povrača da bi vzel svoju halju.
- Jaj, pako nosečem i doječem vu oneh dnevih.
- Molete pako da vaše bežanje ne nastane v zimi ali v sobotu.
- Ar onda bude veliko traplenje, kakvo ni bilo od početka sveta do sada niti ne bude.
- I da ne bi oni dnevi bili prikračeni, tak se ne bi nijeden človek zveličil, ali zbog izebraneh budu se prikratili oni dani.
- Onda ako vam gdo reče: ʻNut, ovde je Krištuš!ʼ ali ʻOnde!ʼ, najte veruvati.
- Ar se podigneju krivi krištuši i krivi proroki i budeju činili velika znamenja i čuda tak da bi se takaj izebrani (da bi moguče bilo) vu bljudnost napeljali.
- Nut, ja sem vam naprvo povedal.
- Zato ako vam rečeju: ʻNut, vu puščini je!ʼ, najte iziti. ʻNut, vu hižah je!ʼ, najte veruvati.ʼ
- Ar kakti god oblesk ishađa od Sunčenoga ishoda ter sveti do Sunčenoga zahoda, tak bude i došestek Sina Človečjega.
- Gde goder bude truplo, tam se budu i orli skup spravljali.
- Taki pako po traplenju oveh isteh dnevov Sunce potemne i Mesec ne bude daval svoje svetlosti i zvezde budu padale iz neba i jakosti nebeske budu se stepale.
- I onda se na nebu skaže znamenje Sina Človečjega i onda budu javkali vsi narodi Zemlje i budu videli dojti Sina Človečjega vu nebeskeh oblakih z velikum jakostjum i zmožnostjum.
- I pošlje svoje angele z trubentum i velikem glasom i oni budu skup spravljali njegve izebrane od četireh vetrov, od jednoga kraja nebes tja do drugoga.
- Od figovoga pako dreva vučete se priliku: kada njegva svrž vre žitka postaje i listje spušča, znajte da je blizo leto.
- Tak i vi, kada vsa ova bivati budete videli, znajte da je blizu pred vratmi.
- Stanovito velim vam da ne prejde ovo pokolenje dok se vsa ova ne spuniju.
- Nebo i Zemlja prejdeju ali moje reči ne prejdeju.
- On pako dan i vura nikomu ni znana, niti angelom nebeskem, nego samomu Ocu.
- Kak je pako bilo vu Noemoveh dnevih, tak bude i došestek Sina Človečjega.
- Ar ravno kak su vu dnevih pred potopom jeli i pili, ženili se i vdavale se tja do onoga dneva gda je Noe nuter išel vu barku
- i nesu spoznali doklam ni došel potop i vse vzel, tak bude takaj došestek Sina Človečjega.
- Onda budu dva na polju: jeden se vzeme, a drugi ostavi.
- Dve budu mlele vu melinu: jedna se vzeme, a druga ostavi.
- Zato skoznujte ar ne znate koju vuru vaš Gospon dojde.
- To pako znajte da bi hiže gospodar znal ob kojoj vuri tat dojde, bi zaisto skoznuval i ne bi dal potkopati svoju hižu.
- Zato i vi budite pripravni kajti ne znate ob kojoj vuri Sin Človečji dojde.
- Gdo štimaš je veren sluga i pameten kojega je njegov gospon postavil nad svojum družinum da njoj podelji hranu ob svojem vremenu?
- Blažen je on sluga kojega njegov gospon, kada dojde, bude našel da tak čini.
- Stanovito velim vam da ga nad vsem svojem imetkom postavi!
- Ako bi pako ov sluga hmanji bil ter vu svojem srcu rekel: ʻMoj gospon odvlači dojtiʼ
- ter bi počel svoje skupslužbenike tuči, jesti pako i piti z pijanci,
- tak gospon onoga sluge dojde v dnevu vu kojem se ne nadeja i ob vuri koju ne zna.
- I bude ga odružil i njemu dal njegov del z skazlivci, onde bude plač i zubih škripanje.“
