Prilika od deset devic. Prilika od talentumov. Vekivečno razdruženje pokolenja človečanskoga na opčinskem sudu.
- „Onda bude Nebesko kraljestvo spodobno desetem devicam koje su vzele svoje svetnice i izišle su zaručniku i zaručnici naproti.
- Pet pako zmed njih je bilo bedasteh, a pet spametneh,
- ali pet bedaste jesu vzele svetnice, olja pako nesu vzele z sobum.
- Pametne pako jesu vzele olje vu svojeh posudah z svetnicami.
- Doklam bi se pako mudil zaručnik, vse su zadremale i pospale.
- Ob pol noči pako je nastala vika: ʻNut, zaručnik ide, izidite van pred njega!ʼ
- Onda se jesu stale vse one device i priredile svoje svetnice.
- Bedaste pako jesu rekle spametnem: ʻDajte nam od vašega olja ar naše svetnice dogarjaju.ʼ
- Spametne jesu odgovorile govoreče: ʻDa ga morebiti nam i vam ne zmenjka, hote rajši k prodavcem ter si ga kupete.ʼ
- Dok bi pako one bile odišle kupuvat, došel je zaručnik i koje su bile pripravne, išle su nuter z njim na svadbu i zaprla se jesu vrata.
- Najzadnjič pako jesu došle i ostale device govoreče: ʻGospone, gospone, otpri nam!ʼ
- On pako odgovorivši reče: ʻStanovito velim vam: ja vas ne poznam.ʼ
- Skoznujte anda ar ne znate dneva niti vure.
- Ar ravno kak je nekoj človek koj je na put othađal dozval svoje sluge i njim svoje blago izručil.
- I jednomu je dal pet talentumov, drugomu pako dva, a tretjemu jednoga, vsakomu poleg lastovite kreposti i sproti se je na put otpravil.
- Odišel je pako on koj je pet talentumov dobil i trguval je z njimi i dobil je drugeh pet.
- Spodobnem napretkom i on koj je dva prijel, dobil je druge dva.
- A on koj je jednoga dobil, je išel i zakopal ga je vu zemlju i skril peneze svojega gospona.
- Čez vnogo pako vremena je došel gospon oneh slug i je včinil z njimi račun.
- I pristupi koj je bil pet talentumov prijel i donesel je drugeh pet talentumov govoreči: ʻGospone, pet talentumov jesi dal meni, nut, ja sem drugeh pet talentumov dobil z njimi.ʼ
- Reče njemu njegov Gospon: ʻBlago si ga tebi, sluga dobri i verni, pokehdob da si vu malom bil veren, tak te hoču nad vnogem postaviti, hodi nuter vu veselje tvojega gospona.ʼ
- Pristupil je pako i on koj je dva talentuma prijel i reče: ʻGospone, dva talentuma jesi dal meni, nut, ja sem druge dva talentuma z njimi dobil.ʼ
- Reče njemu njegov gospon: ʻRaduj se, sluga dobri i verni, nad malem jesi bil veren, nad vnogem te postavim, hodi nuter vu veselje tvojega gospona.ʼ
- Kad je pako i on pristupil koj je jednoga talentuma prijel, je rekel: ʻGospone, ja znam da si ti tvrd človek, da ženješ gde nesi sejal i spravljaš gde nesi rasipaval
- i ja sem se bojal ter sem odišel i skril tvoj talentum vu zemlju: nut, ovo imaš kaj je tvoje.ʼ
- Odgovorivši pako njegov gospon reče njemu: ʻTi hmanji i leni sluga! Ti si znal da ja ženjem gde nesem sejal i da spravljam gde nesem rasipaval
- zato bi ti bil moral moje peneze predati menjavcem i kad bi ja bil nazad došel, bi ja bil zaisto to moje z dobičkom nazad dobil.
- Vzemite anda od njega talentum i dajte ga onomu koj ima deset.
- Ar vsakomu koj ima, bude se dalo i bude obiljuval. Od onoga pako koj nema, bude se vzelo takaj ono kaj se vidi imati.
- A toga nehasnovitoga slugu hitete van vu zvanjske tmice, onde bude plač i zubih škripanje.ʼ
- Kada pako dojde Sin Človečji vu svojem veličanstvu i vsi angeli z njim, onda bude sedel na stolici svojega veličanstva.
- I skup se spraviju pred njega vsi narodi i on je odluči jednoga od drugoga kak pastir odlučuje ovce od kozlov.
- I ovce postavi iz svoje desne, a kozle iz leve.
- Onda reče Kralj onem koji budu iz njegve desne: ʻHote, blagoslovljeni mojega Oca, ladajte Kraljestvo koje je vam od početka sveta pripravljeno.
- Ar sem bil gladen i vi ste mi dali jesti, bil sem žeđen i vi ste mi dali piti, bil sem putnik i vi ste me nastanili.
- Bil sem gol i vi ste me odeli, bil sem betežen i vi ste me pohađali, bil sem vu vuzi i vi ste došli k meni.ʼ
- Onda mu odgovoriju pravični govoreči: ʻGospone, kada smo te videli gladnoga i jesmo te nahranili ali žeđnoga i jesmo te napojili?
- I kada smo te videli putnika i jesmo te prestanili ali gologa i jesmo te odeli?
- Ali kada smo te videli betežnoga ali vu vuzi i jesmo došli k tebi?ʼ
- I odgovori njim Kralj ter reče: ʻStanovito velim vam da kaj ste goder včinili jednomu zmed oveh najmenjšeh mojeh bratov, to ste meni včinili.ʼ
- Onda reče i onem koji budu iz leve strani: ʻOthađajte od mene, vi prokleti, vu vekivečni ogenj koj je pripravljen vragu i njegvem angelom
- ar sem bil gladen i vi mi neste dali jesti, bil sem žeđen i vi me neste napojili,
- bil sem putnik i vi me neste prestanili, bil sem gol i vi me neste odeli, bil sem betežen i vu vuzi i vi me neste pohađali.ʼ
- Onda mu i oni odgovoriju: ʻGospone, kada smo te videli gladnoga ali žeđnoga ali putnika ali gologa ali betežnoga ali vu vuzi i nesmo ti podvorili?ʼ
- Onda govori njim govoreči: ʻStanovito velim vam: kaj goder neste včinili jednomu zmed oveh najmenjšeh, niti meni neste včinili.ʼ
- I pojdu ovi vu vekivečne muke, pravični pako vu vekivečni žitek.“
